Read lunyore 1 PETERO 5 Bible Online

1 PETERO 5 - lunyore bible

1 PETERO 5

¹Ise omukhulundu khulwe yaka mombelesianga abakhulundu abali mwinywe singa omukhulundu wasienywe owali okhulolakhwo okhusalisibwa khwa Kristo, omusanji wobukhongo obulibisukha mbu:

²Mwaye esiayo sia Nyasaye esia mwahebwa mbu musilinde, nimusiaya sila okhunichilisibwa, nebutswa mukhole omulimo nomwoyo kwokhulalila.

³Murabba abaruchi khubo abamwahebwa okhwaya tawe, nebutswa mubetsenje imbeli wabwe singa ebilolelo biesiayo siatsana.

⁴Ne nyinga Omwayi Omukali alibisulwa, mulihebwa olusimbi lwobukhongo oluranialanga tawe.

⁵Kata inywe ababuukha, mwetutuyie khubakhulundu benywe. Khandi inywe mwesi mwebiikhe okhwetutuyia, murumikhenje simulala khuwasie sichila Amahandiko Amatsienukhu kaboolanga mbu “Nyasaye afukulanga abekhonyanga, nebutswa abetutuyianga ababeelanga esirenda.”

⁶Kho mwetutuyie mumukhono omukufuhalu kwa Nyasaye, ma naye yakhamuchingule munyinga ekwanile;

⁷nimumutukha esihenda mwoyo sienywe siosi, sichila niye omuhendel'langa inywe.

⁸Mube abachesi, mube meso! Omusuku wenywe Setani, ali singana esimba ehuumanga ne ayeyemanga habundu hosi, naruna owalia.

⁹Mukufuhale mukhusubila khwenywe ma mumufukule sichila mumanyile mbu abasubili basienywe abali musibala siosi basalisibwanga singa inywe musalisibwanga.

¹⁰Nebutswa olwa muba nimusaaliye khulwo oluhono lutititi, Nyasaye wesirenda siosi, owali okhumulanjila obukhongo bubwe oburahwa mu Kristo, alamusiya namuralisia, namuhelesia tsingufu nende omusinji kwatooto.

¹¹Obwami nobubwe emihika nemihika. Amina.

¹²Mandikanga ebarwa inyimbichiti yino khulwo obukhonyi bwa Sila owa mbuchil'langa singa omwana wefwe omusubilwa. Nyenyanga okhumuyunjia, nende okhumuribul'la mbu yisi nisio esirenda siatooto esia Nyasaye. Muralile butinyu musio.

¹³Abasubili basienywe abelwa singa inywe bamusiesisie; khandi Mariko omwana wanje umusiesisie.

¹⁴Musiesanie abene khubene nobuyanzi bwobuta. Emilembe chibe khwinywe mwesi abali mu Kristo.