Read lunyore 2 PETERO 2 Bible Online

2 PETERO 2 - lunyore bible

2 PETERO 2

¹Abaroobi bobubehi bamala okhulolekha mubandu mumatukhu akabira, khandi nimbwo abebaali bobubehi bakhalolekhe mwinywe. Bakhenjisie amebaalo kokhwononia akabula akatooto, khandi bakhamweyambakhane Omwami owali okhubanunula, nimbwo bakheler're abene okhwononibwa khwabwangu.

²Ma abandu abenji bakhalonde tsinjila tsiabwe tsiesifwabwi, ma khulwabwe, abandi bakhal'lome obubi khuke Injila yatooto.

³Mubulangu bwabwe abebaali bobubehi yabo bakhenyol'le obukhala khulwa okhumubool'la tsimbakha tsiobubehi. Nebutswa khulwo oluhono olurambi omukhalachi wabwe werechekhele ne Omwononi wabwe ali meso!

⁴Nyasaye siyababelel'la abamalaika abakhola tsimbi tawe, nebutswa yabafuuba m'mul'lo kwe Kehena, omwa babikhwa khuminyol'lo musiilima nibalindil'langa litukhu liokhukhalachilwa esiina.

⁵Nyasaye siyabelel'la esibala siakhale tawe, nebutswa yalera ifula ingali eyolucheka[1] khusibala yisio esiabandu abaramuritsanga Nyasaye; abayahonia bali butswa Noa owakambanga akobulunji nende abandu bandi bane nabataru.

⁶Nyasaye yali okhuhana esinyasio khumatookho ka Sodoma nende Gomora, nakasamba nomul'lo, ma nakalomba okhuba esilolelo khukakhekhole khubandu abararitsanga Nyasaye.

⁷Yali okhuhonia Loti, omundu omulunji; owali okhubelesibwa nende liba libi liesifwabwi siobusambale, eliabandu yabo abakholi bobubi.

⁸Omundu omulunji uyo yamenya mubandu bene yabo, ne khulwa amatukhu amenji omwoyokwe omulunji kwali mukhusalila okhwinji olwa yalola nende okhuhul'la ebikholwa biabwe ebibi.

⁹Omwami wamanya singa obwokhuhonia abandu abaritsanga Nyasaye okhurula mumatemo kabwe, nende obwo okhubiikha abandu ababi musinyasio okhwola Khwitukhu liokhukhalachilwa Esiina,

¹⁰okhusila muno yabo abalondanga okhwekomba khwabwe okhubi nende okhuchiaya obunyali bwa Nyasaye. Yaba abebaali bobubehi nabeikholo ma abomwekhonyo, sibamanyianga oluyali khubilonge biobukhongo ebie ikulu tawe; musilenje isio babinyekanga.

¹¹Kata abamalaika abali abakufu okhusila khandi abobunyali okhuyomba abebaali bobubehi yaba, sibabayilanga musiina nende okhubanyeka mumoni mwo Mwami tawe.

¹²Abandu yabo abanyekanga butswa esindu siosi esiabaramanyile, bafwana butswa nende tsinyama etsirali nobuchesi, etsibulwanga ne olunyuma tsifumilwa nende okhusinzwa! Bakhamumwe okhurulana khububi bwabwe abene,

¹³ne bakharungwe namanyakhano khumanyakhano aka abene bali okhulera. Okhusangala khwabwe nokhukhola esindu siosi esiokhukosia olusa lwabwe olwomubili habulafu; baleranga es'simba murwe nende as'sinyo olwa beyonganga n'nenywe khubiokhulia bienywe ne nibasangal'la tsinjila tsiabwe etsiobukati.

¹⁴Mumoni mwabwe sibenyanga okhuhenga khusindu sindi siosi tawe harali abakhasi abasambale; olusa lwabwe khutsimbi siluhwetsanga tawe. Bemel'langa abandu abatekhele okhwinjila mumubero. Emioyo chiabwe chianala okhuba nende okhwekomba emiandu. Bali musilaano sia Nyasaye!

¹⁵Balekha injila inunji baakora ma balondanga injila ya Balaamu, omwana wa Beori yalondakhwo, owali okhuyanza okhunyoola amapesa khulwo okhukhola obubi,

¹⁶nakondekhelwa khulwe tsimbi tsitsie. Esikhili eral'lomanga yal'loma nomwoyo kwomundu niyikal'la obulalu bwomuroobi uyo.

¹⁷Abandu yabo bali singa ebitaho ebiakhama, singa amalumbesi akahilwanga nende omuyeka; Nyasaye wabarechekhela habundu musiilima esimwamu t'ti.

¹⁸Bal'lomanga kesunga nende akoluhingwa, nende okhurumikhila okhwekomba khwabwe okhubi okhwomubili okhubatiila yabo abachiaka okhwilukha okhurula mubandu abamenyanga mubukati.

¹⁹Basubisianga abandu bandi mbu nabaabe abalakhule, ne khane nabo abene nabahambe bobwononi; sichila omundu nomuhambe[2] wesindu siosi isio esimurukanga.

²⁰Nikaba abandu abamala okhuhonokokha okhurula khubwononi bwesibala okhubir'ra mukhumanya khwabwe khwo Mwami nende Omuhonia wefwe Yesu Kristo, ma nibaba nibahambwa khandi mubwononi tsana ma nibubalekel'la, abandu bene yabo babetsanga muliiba libi okhusila olwokhumal'likha okhuyomba obwa balinji olwokhuranga.

²¹Bwakhabeye obulahi okhusila khulwabo okhubula okhuba nibamanya injila yobulunji okhuyomba okhuchimanya ma khandi okhusukhana okhurula khwilako litsienukhu elia bali okhuhebwa.

²²Akekholekha khubo kamanyianga mbu aketsingano tsiboolanga nakatooto. “Imbwa ekalukhanga okhulia ebiayali okhusala” khandi “Ingulube emal'le okhusaabwa ekalukhanga okhukalakala mubutoyi.”