Read lunyore 2 PETERO 3 Bible Online

2 PETERO 3 - lunyore bible

2 PETERO 3

¹Abandayanza, yino luno nebarwa eyakhabili eyamuhandichiye. Mutsiombi ndemele okhubuusia amapaalo amasiyikhu munganakani tsienywe khulwa okhumwitsusia ebindu yibi.

²Runanga mwitsul'le amang'ana akali okhul'lomwa khale nende abaroobi abatsienukhu, nende lilako eliarula khu Mwami nende Omuhonia, eliamwali okhuhebwa nende abarumwa benywe.

³Eliokhuranga khukosi, okhwola mumanyilisie mbu mumatukhu kokhumal'likha yaka abandu bandi bakharul'lemwo abobulamu bwabwe bwemel'lwanga nende okhwekomba khwabwe okhubi. Bakhamutsekhel'le

⁴ne bakharebe, nibaboola: “Yali okhulaka mbu yakhetse sikali mbwo? Ali hena? Abapapa befwe bamala okhufwa, nebutswa ebindu biosi bisili butswa singa obwabiali okhurula esibala nisilombwa!”

⁵Basulanga okhuhuchil'la mbu khale Nyasaye yahana lilako, ma likulu nesibala nibilongwa. Esibala sialombwa okhurula khumaatsi khandi khulwa amaatsi,

⁶khandi kali khulwa amaatsi yako akomukhulul'la mbu esibala esikhulu siamalwa.

⁷Likulu nende esibala ebiliho leelo bilindwanga khulwe lilako elia Nyasaye litelwa yilio khulwo okhumumwa nomulilo. Bilindibwanga khulwe litukhu olwa abandu abararitsanga Nyasaye bakhakhalachilwe esiina nende okhumumwa.

⁸Nebutswa murebil'la esindu silala tawe, abayanzwa! Sibuliho obwabukhani bwosi mumoni mwo Mwami hakari welitukhu elala nende emihika elefu ndala tawe; khuye kosi kabili kafwanana.

⁹Omwami sali omwekhwesu okhukhola amasubisioke singa obwa abandi bapaalanga tawe. Mubukono yibwo, nowokhesimilisia n'nenywe, sichila siyenyanga omundu wosi atibe tawe, nebutswa yenyanga bosi basukhane barule mutsimbi tsiabwe.

¹⁰Nebutswa Litukhu lio Mwami liakhetse singa omwibi. Litukhu liene yilio likulu liakhanyokhile nende esirundukho esikali, ebilonje biomwikulu biakhasambwe ma bilamumwe, ne esibala nende biosi ebilimwo biakhanyokhile.[3]

¹¹Olwe ebindu biosi biakhamumwe munjila yiyi, khe nenywe mukwananga mwaba abandu bambila sina? Obulamu bwenywe bukwananga bube obutsienukhu ma obwahanwa khu Nyasaye,

¹²olwe inywe mulindanga Litukhu lia Nyasaye nimukhola amalahi okhulilomba litse bwangu — Litukhu yilio olwe likulu liakhasambwe nokhumumwa, khandi olwebilonje biomwikulu biakhaba nibisal'lusibwe nende oluya.

¹³Nebutswa ifwe, okhulondokhana nende akelisubisio lia Nyasaye, khulindil'le likulu liyia nende esibala esiyia esietsulamwo obulunji.

¹⁴Khulwe yako abandayanza, nimuba nimulindil'langa Litukhu yilio, mukhole esinani okhuba abasiyikhu abarali nesikha mumoni mwa Nyasaye nende okhuba mumulembe n'naye.

¹⁵Mwenyekhanga mulole obwesimilisi bwo Mwami okhuba nobweyangu obwaye amuhelesianga mbu muhonibwe, singa obwa Paulo amwabo wanje omuyanzwa yamuhandichila narumikhilanga obuchesi obwa Nyasaye yamuha.

¹⁶Yaka niko aka Paulo aboolanga mutsibarwa tsitsie tsiosi olwa ahandikanga khwichoomo yili. Kaliho amang'ana kandi mutsibarwa tsitsie akali amatinyu okhumanyilisia, amang'ana akabandu abahingwa, abaramanyile esindu benoosianga mubusiamu singa obwa bakoyanianga mumbeka mundi omwa Amahandiko Amatsienukhu. Munjili yiyi belombelanga okhutiba khwabwe abene.

¹⁷Nebutswa inywe, abandayanza, mwamala okhumanya yaka. Mube meso, khe mubule okhuhilwa nende obusiamu bwabandu abarali netsifwo tsindahi ma mukwe okhurula mubukono bwenywe obulahi.

¹⁸Nebutswa mutsilil'le okhukhula musirenda nende mukhumumanya Omwami wefwe omuhonia Yesu Kristo. Obukhongo bube khuye leelo nende inziayo! Amina.