Read lunyore 1 YOHANA 2 Bible Online

1 YOHANA 2 - lunyore bible

1 YOHANA 2

¹Abaana banje abayanzwa, muhandichilanga amang'ana yaka mbu murakhola tsimbi tawe. Ne omundu khwinywe naba nakhola tsimbi, khuli nende omukhonyi onyala okhukhusaayila khu Papa, ne naye niye Yesu Kristo Omulunji.

²Naye niye omusango okwokhubeela tsimbi tsiefwe; ne sikuli okwetsimbi tsiefwe fwenyene tawe, nebutswa okwetsimbi tsiabandu bosi abali musibala.

³Nikhuba nikhufumila amalako ka Nyasaye khulamanya mbu khwamumanya.

⁴Omundu oboolanga mbu “Ndamumanya Nyasaye,” nebutswa narafumilanga amalako kaake nomubehi, ne akatooto sikali muye tawe.

⁵Nebutswa okholanga ling'ana lia Nyasaye, siahene obuyanzi bubwe khu Nyasaye buhesikhile muye. Ne nimbwo khunyala okhumanya mbu khuli muye.

⁶Omundu oboolanga amenyanga mu Nyasaye kamuhel'le achende singa obwa Yesu Kristo yachenda.

⁷Abandayanza, simuhandichilanga lilako liyia, nebutswa lilako liakhale elia mwali n'nalio okhurula mukhuchiaka khwesibala. Lilako liakhale neling'ana elia mwahulila.

⁸Ne kata mbwo lilako eliamuhandichilanga neliyia, sichila obwatooto bwalio buli mwinywe. Okhuba esiilima sibiranga, ne obulafu bwatooto bwakhanga.

⁹Omundu oboolanga mbu ali mubulafu, ne nabihil'lwanga omwana wabwe, omwene uyu asili musiilima kata luno.

¹⁰Omundu oyanzanga omwana wabwe, omwene uyo amenyanga mubulafu, ne okhwesikar'ra sikhuli muye tawe.

¹¹Nebutswa obihil'lwanga omwana wabwe, omwene uyo ali musiilima, achendanga musiilima, salolanga ahatsitsanga, sichila esiilima siamala okhubofusia tsimoni tsitsie.

¹²Inywe abaana banje, muhandichilanga sichila mwamala okhulekhelwa tsimbi tsienywe khulwe eliira lia Kristo.

¹³Muhandichilanga inywe abapapa, sichila mwamumanya uyo owalinjiho okhurulana mukhuchiaka khwesibala. Muhandichilanga inywe abababukha sichila mwamuleka Omubi. Muhandichiye inywe abaana batu, sichila mwamumanya Papa.

¹⁴Muhandichilanga inywe abapapa sichila mwamumanya owalinjiho okhurula mukhuchiaka khwesibala. Muhandichilanga inywe, ababukha, sichila muli netsingufu, ne ling'ana lia Nyasaye liamenya mwinywe, ma mwaleka omubi.

¹⁵Murayanza esibala, nohomba ebindu ebili musibala. Omundu wosi naba nayanza esibala, khe sayanzanga Papa tawe.

¹⁶Ebindu biosi ebili musibala, okhwekomba khwomubili nende okhwekomba khwetsimoni nende obwekhonyi bwosi obwobulamu yibu sibirulanga khu Papa tawe, nebutswa birulanga khusibala.

¹⁷Esibala nende okhwekomba khwasio bibiranga, nebutswa okholanga obulalilo obwa Nyasaye amenyanga khasotso.

¹⁸Abaana banje, esihesi sili ahembi; ne singa mwali okhuhulila mbu Omufukuli wa Kristo yetsanga, ne kata luno abafukuli ba Kristo tsana bamal'le okhulolekha abenji; ma khulwako khumanyile mbu esihesi siol'le.

¹⁹Nabo barula khu ifwe, nebutswa sibaali abolubeka lwefwe tawe. Balaba nibali abowefwe, khane bakhamenyele halala n'nefwe, nebutswa barula, mbu babisukhe singa obwa barali bosi abowefwe tawe.

²⁰Nenywe mwamala okhunyoola Omwoyo Omutsienukhu okhurula khu Uyo Omutsienukhu ma mwamanya akatooto.

²¹Simuhandichiye sichila mwakorwa akatooto, nebutswa sichila mukamanyile, khandi mumanyile mbu obubehi sibunyoolekhanga mukatooto tawe.

²²Niwina oli omubehi narali uyo oboolanga, Yesu siali Kristo tawe? Uyo oweyambakhananga Papa nende Omwana nomusuku wa Kristo?[1]

²³Omundu osuulanga Omwana, omwene uyo khandi asuulanga Samwana, omundu ohuchil'langa Omwana, omwene uyo khandi ahuchil'langa Samwana.

²⁴Nebutswa inywe, mulole mbu amang'ana aka mwahulila okhurulana olwokhuranga kamenye mwinywe. Ne yaka akamwahulila okhurulana olwokhuranga nikaba nikamenya mwinywe, inywe khandi mulamenya mu Mwana, nende mu Papa.

²⁵Lisubisio eliayakhusubisia ndieli mbu: Obulamu oburahwa.

²⁶Muhandichilanga amang'ana akabandu yabo abatemanga okhumukosia.

²⁷Nebutswa khu inywe, Kristo watsukhil'la Omwoyowe Omutsienukhu mwinywe. Oluhono olwo Omwoyo uwe ali mwinywe, ne simutakha omundu wosi okhumwibaal'la tawe. Okhuba Omwoyo uwe amwibaal'langa amang'ana kosi, ne akamwibaal'langa nakatooto, sikali okobubehi tawe, kho mufumile amebaalo ko Mwoyo, ma mumenye mubulala na Kristo.

²⁸Ne luno, abaana banje, mumenye mu Kristo, kho naba niyakhabisulwa, khwakhoma ikholo, ne sikhwakhasimba omurwe imbeli uwe Khwitukhu liokhwitsa khukhwe tawe.

²⁹Nimuba nimumanya mbu Kristo nomulunji, kho mumanyile mbu siomundu okholanga obulunji no Mwana wa Nyasaye.