Read lunyore 1 YOHANA 3 Bible Online

1 YOHANA 3 - lunyore bible

1 YOHANA 3

¹Lole nibuyanzi sina obwa Papa Nyasaye yali okhukhuyanza ifwe mbu khulangwe abaana baabe; ma tooto khuli mbwo. Esifune esichilanga abomusibala nibarakhumanya ifwe tawe sili mbu sibamumanyile Nyasaye tawe.

²Aba ndayanza, luno ifwe khuli abaana ba Nyasaye, ne kasili okhubisulwa singa obwa khwakhabe. Khwamanya mbu olwa Kristo alitsa, khulifwanana n'naye; sichila khulimulola singa obwaali.

³Siomundu oli nende okhunaya yikhu mu Kristo yesiyanga omwene, singa obwa Kristo ali omusiyikhu.

⁴Ne siomundu okholanga tsimbi akholanga esikala marwi; sichila tsimbi tsibetsanga esikala marwi.

⁵Ne mwamanya mbu Kristo yabisukha mbu ahinie tsimbi tsiefwe; ne mu Kristo tsimbi sitsilimwo tawe.

⁶Omundu wosi omenyanga mu Kristo sakholanga tsimbi tawe ne omundu otsilil'langa okhukhola tsimbi samulolanga, nohomba samumanyile tawe.

⁷Abaana banje, omundu aramukosia. Ne omundu okholanga obulunji omwene uyo nomulunji singa obwa Kristo ali omulunji.

⁸Omundu okholanga tsimbi nowa Setani, sichila Setani yakholanga tsimbi okhurula mukhuchiaka khwesibala. Khulwe yako Omwana wa Nyasaye yabisukha mbu, yononie emilimo chia Setani.

⁹Omundu owebulwa khu Nyasaye satsilil'langa okhukhola tsimbi tawe, sichila liiba lia Nyasaye limenyanga muye, ne sichila waibulwa khu Nyasaye sanyala okhukhola tsimbi tawe.

¹⁰Khwing'ana yili abaana ba Nyasaye bamanyikha, khandi abaana ba Setani bamanyikha. Omundu orakholanga obulunji siali owa Nyasaye tawe, kata omundu orayanzanga omwana wabwe siali owa Nyasaye tawe.

¹¹Yaka namang'ana aka mwahulila okhurula mukhuchiaka mbu, okhwola khuyanzane abene khubene.

¹²Khurabba singa Kaini owarula khumubi ma niyera omwana wabwe tawe. Ne naye yamwira busina? Sichila emilimo chichie chiali emibi, ne echio omwana wabwe chiali emilunji.

¹³Murachenya abaana befwe, olwa abandu abomusibala bamubihil'lwanga.

¹⁴Ifwe khwamanya mbu khwamala okhurula mukhufwa, ma khwainjila mubulamu, sichila khuyanzanga abaana befwe. Ne omundu orayanzanga abaana babwe wamenya mukhufwa.

¹⁵Siomundu obihil'lwanga omwana wabwe nomwiri; nenywe mwamanya mbu abulaho omwiri oli nende obulamu oburahwa obumenyanga muye.

¹⁶Mwing'ana yili khwamanya obuyanzi nisina sichila Kristo yahana obulamu bubwe khulwefwe, nefwe kakhuhel'le okhuhana obulamu bwefwe khulwa abaana befwe.

¹⁷Nebutswa omundu oli nobuhinda bwesibala yisi, kho nalutsi omwana wabwe nali omutakha, naranyala okhumubelel'la tawe, kho yakhaboola mbwena wayanza Nyasaye?

¹⁸Abaana banje, khurayanza mwing'ana butswa, nohomba nende ol'limi butswa; nebutswa okhuyanza khube mumilimo nende mukatooto.

¹⁹Nimbwo khulamanya mbu khuli abatooto, ne khulisubisia emioyo chiefwe imbeli wa Nyasaye.

²⁰Emioyo chiefwe nichiba nichikhukhalachilanga mwo esiina, khwamanya Nyasaye nomukali okhuyomba emioyo chiefwe ma wamanya amang'ana kosi.

²¹Abandayanza, emioyo chiefwe njiba njirakhukhalachilanga esiina, khuli abatinyu ikholo imbeli wa Nyasaye.

²²Ne amang'ana kosi akakhusaba khwakhanyoola okhurula khuye, sichila khufumilanga amalako kaake nikhukhola amang'ana akayanzilwe imbeli uwe.

²³Ne lilako lilie ndieli mbu, khusubile mu Mwana uwe Yesu Kristo, ma khuyanzane singa obwa yakhulaka.

²⁴Siomundu ofumilanga amalako ka Nyasaye amenyanga mu Nyasaye, naye Nyasaye amenyanga muye. Ne khulwo Mwoyo owa Nyasaye yakhuhelesia khwamanya mbu Nyasaye amenyanga halala n'nefwe.