Read lunyore 1 YOHANA 4 Bible Online

1 YOHANA 4 - lunyore bible

1 YOHANA 4

¹Abandayanza, murasubila bosi ababoolanga mbu bali nende Omwoyo wa Nyasaye, nebutswa mubahengelesie mubweyinikhu mulole nikaba nikali bemel'lwanga nende Omwoyo wa Nyasaye nohomba tawe. Sichila abaroobi bobubehi basalaana musibala.

²Mwing'ana yili mwamanya Omwoyo wa Nyasaye: siomundu oweyamanga Yesu Kristo yetsa singa omundu, omwene uyo ali nende Omwoyo wa Nyasaye.

³Ne siomundu oreyamanga yaka khu Yesu sali nende Omwoyo wa Nyasaye tawe. Omwoyo owali n'naye arulanga khumufukuli wa Kristo, owa mwahulila mbu yetsanga; ne kata luno aliho musibala.

⁴Inywe abaana banje, muli aba Nyasaye, ne mwaleka abaroobi bobubehi sichila Omwoyo oli mwinywe ali nobunyali obukhongo okhuyomba omwoyo oli mubandu bomusibala.

⁵Abaroobi bobubehi yabo baboolanga amang'ana akesibala, ne esibala sibahulilanga sichila yabo nabesibala.

⁶Nebutswa ifwe khuli aba Nyasaye, omundu owamanya Nyasaye akhuhul'langa ifwe; ne omundu orali owa Nyasaye siakhuhul'langa ifwe tawe. Khulwe yaka khwamanya omwoyo watooto, nende omwoyo wokhukosia.

⁷Abandayanza, khuyanzane: sichila obuyanzi burulanga khu Nyasaye. Ne siomundu oyanzanga, no Mwana wa Nyasaye, ne wamumanya Nyasaye.

⁸Omundu orali nobuyanzi siyamumanya Nyasaye tawe; sichila Nyasaye nobuyanzi.

⁹Mwing'ana yili obuyanzi bwa Nyasaye bwabisukha mwifwe, sichila Nyasaye yaruma Omwana uwe omutelwa musibala mbu khube nende obulamu muye.

¹⁰Yibwo nibwo obuyanzi, sikhuli ifwe nifwe abali okhuyanza Nyasaye, nebutswa niye owakhuyanza, naruma Omwanawe abe omusango kwokhukhuhinisia tsimbi tsiefwe.

¹¹Abandayanza, nikali Nyasaye wakhuyanza singa mbwo, kho kakhuhel'le ifwe khandi okhuyanzana.

¹²Abulaho omundu owalolakhwo Nyasaye kata hati, nikhuba nikhuyanzana, ne Nyasaye yakhamenya mwifwe ne khandi obuyanzi bubwe bwakhahesibwa mwifwe.

¹³Mwing'ana yili khwamanya khumenyanga mu Nyasaye naye amenyanga mwifwe, sichila wakhuha Omwoyo uwe.

¹⁴Nefwe khwalola ma khandi khwakobokhela mbu Papa yamuruma Omwana uwe abe omuhonia wabandu abomusibala.

¹⁵Siomundu olieyama mbu Yesu no Mwana wa Nyasaye, khe Nyasaye amenyanga muye ne naye namenya mu Nyasaye.

¹⁶Ifwe khumanyile khandi khusubilanga obuyanzi obwa Nyasaye ali n'nabwo khwifwe abene. Nyasaye nobuyanzi; ne naye omenyanga mubuyanzi, amenyanga mu Nyasaye ne Nyasaye amenyanga muye.

¹⁷Mu yaka obuyanzi buhesiibwe mwifwe, kho nefwe khwome ikholo Mwitukhu Liesiina, nefwe khulabunyoola sichila singa obwa Kristo ali, nimbwo khufwana musibala muno.

¹⁸Sibuliho oburi mubuyanzi nebutswa obuyanzi obuhesikhu bwakhafuba oburi esioba, sichila oburi buleranga esinyasio; ne omundu oritsanga, obuyanzi busili okhuhesibwa muye.

¹⁹Ifwe khuyanzanga, sichila Nyasaye yali okhukhuyanza olwokhuranga.

²⁰Omundu naba naboola, “Ndayanza Nyasaye,” ne nabihil'lwanga omwana wabwe, nomubehi. Okhuba omundu orayanzanga omwana wabwe owalolangakhwo, siyakhanyala okhuyanza Nyasaye owaralolangakhwo tawe.

²¹Ne lilako yili Kristo yakhuha mbu omundu oyanzanga Nyasaye kamuhel'le ayanze khwo omwana wabwe mbwo.