Read lunyore 1 YOHANA 5 Bible Online

1 YOHANA 5 - lunyore bible

1 YOHANA 5

¹Siomundu osubilanga mbu Yesu niye Kristo[2] wamala okhwibulwa khu Nyasaye; ne omundu oyanzanga Papa khandi ayanzanga Omwanawe.

²Khumanyile mbu khuyanzanga abaana ba Nyasaye, olwa khuyanzanga Nyasaye nikhufumila amalako kaake.

³Obuyanzi bwefwe khu Nyasaye buli mbu khufumile amalako kaake. Ne amalako kaake sikali amatinyu tawe.

⁴Owebulwa khu Nyasaye alekanga esibala. Khunyoolanga okhuleka esibala khulwo obusubili bwefwe.

⁵Ne naye niwina owakhanyala okhuleka esibala narali uyo osubilanga mbu Yesu niye Omwana wa Nyasaye?

⁶Uyu niye Yesu Kristo owetsa namaatsi kokhubaputiswa khukhwe nende amaatsahi kokhufwa khukhwe; sikali namaatsi konyene tawe, nebutswa yetsa namaatsi nende amatsahi. Omwoyo niye okobokhelanga, sichila Omwoyo niye owatooto.

⁷Baliho abakobokhelanga bataru:

⁸Omwoyo, amaatsi, nende amatsahi; ne yabo bataru bahuchilisanianga.

⁹Nikhuba nikhuhuchil'la obukobokheli bwabandu, kho obukobokheli bwa Nyasaye nobukali okhuyomba obwabandu; sichila obukobokheli bwa Nyasaye mbwobu, obwa yakobokhela khu Mwana uwe.

¹⁰Omundu osubilanga mu Mwana wa Nyasaye ali nende obukobokheli bwene yibwo muye; nebutswa omundu orasubilanga Nyasaye amukholanga okhuba omubehi, sichila siyasubila obukobokheli obwa Nyasaye yakobokhela khu Mwana uwe tawe.

¹¹Ne obukobokheli tsana mbwobu mbu, Nyasaye yakhuhelesia obulamu oburahwa, ne obulamu tsana buli mu Mwana uwe.

¹²Ne naye omundu oli no Mwana ali nobulamu; ne orali no Mwana wa Nyasaye siali nobulamu yibu tawe.

¹³Amang'ana yaka muhandichilanga inywe mbu mumanye muli nende obulamu oburahwa, inywe abasubilanga mu Mwana wa Nyasaye:

¹⁴Yikhu nikhwo okhwoma ikholo khwefwe imbeli wa Nyasaye mbu nikhuba nikhusaba esindu singa obwa yenyele, yakhakhuhulila.

¹⁵Nikhuba nikhumanya mbu ahulilanga kosi akakhumusabanga, khwamanya khuli nokhusaaya okhwa khusabanga khuye.

¹⁶Omundu naba nalola omwana wabwe nakholanga tsimbi etsirali tsiokhwira, alasaaya khu Nyasaye ne Nyasaye alamuhelesia obulamu. Yaka kali khuyabo abarakholanga tsimbi tsiokhwira. Tsiliho tsimbi tsiokhwira; simboolanga osabe khulwe etsiene yitsio tawe.

¹⁷Obusiamu bwosi netsimbi, ne tsiliho tsimbi etsirali tsiokhwira.

¹⁸Khwamanya omundu owebulwa khu Nyasaye satsilil'langa okhukhola tsimbi tawe; okhuba Omwana wa Nyasaye amusoolanga, ne Omubi samutilangakhwo tawe.

¹⁹Khwamanya mbu khuli abaana ba Nyasaye, ne abomusibala bosi bamenyanga mubunyali bwomubili.

²⁰Khwamanya mbu Omwana wa Nyasaye waitsa, wakhuhelesia obuchesi, mbu khutoole okhumanya Nyasaye watooto, khandi ifwe khumenyanga mu Nyasaye watooto, mubuhambani bwo Mwana uwe Yesu Kristo. Omwene uyu niye Nyasaye watooto, nende obulamu oburahwa.

²¹Abaana banje mwelinde abene khubanyasaye bobubehi.