Read lunyore ABAKHALACHI 1 Bible Online

ABAKHALACHI 1 - lunyore bible

ABAKHALACHI 1

¹Olunyuma lwokhufwa khwa Yoshwa, Abaisiraeli bareeba OMWAMI mbu, “Nibena khu ifwe abanabarange okhutsia okhuseera Abakanaani?”

²OMWAMI yakalusia naboola mbu, “Abolwibulo lwa Yuda nabarange okhutsia. Reeye esibala yisio mumakhono kabwe.”

³Abolwibulo lwa Yuda babool'la abolwibulo lwa Simioni mbu, “Mutsie n'nefwe mulusoma olwa khwakabul'lwa, ne nakhulwane Abakanaani nikhuli halala. Ma nakhutsie n'nenywe mulusoma olwa mwakabul'lwa.” Kho abetsinzibulo tsianga Simioni

⁴nende Yuda batsia mwihe halala. OMWAMI yabahelesia obulechi khubandu ba Kanaani nende khubandu ba Peresi ma nibalekela abandu etsielefu likhumi mwitookho lia Beseki.

⁵Banyoolayo Adonibeseki ma nibamulwana.

⁶Niyelukha, nebutswa bamulondel'la, nibamufumila, ma nibamukhalaka ebitere bikali nende ebino bikali.

⁷Adonibeseki yamala naboola mbu, “Abaruchi amakhumi kane nakataru abakhalakwa ebitere biabwe ebikali nende ebino biabwe ebikali batobelesisie ebibungulukhile hasi wemeesa yanje. Nyasaye umal'le okhuukhol'la akandali okhubakhol'la.” Yahilwa Yerusalemu aha yamala nafwila.

⁸Abolwibulo lwa Yuda baseera Yerusalemu ma nibalileka. Bali okhwira abandu bomwitookho yilio ma nibalisamba nomul'lo.

⁹Olunyuma lweyaka, batsilil'la okhulwana abandu ba Kanaani abamenyanga mubikulu, hasi webikulu, nende musitsiimi esili enandete.

¹⁰Bachenda nibalwana Abakanaani abamenyanga mwitookho lia Heburoni, eliali nililangwanga Kiriatsi Arabba. Habwene yaho baleka abebilibwa bia Sheshai, Ahimani, nende Talimai.

¹¹Okhurula habwene yaho abolwibulo lwa Yuda baseera litookho lia Tebiri, elialangwanga olwene yilwo Kiriatsi Seferi.

¹²Mulala khubo owalangwa Kalebu, yaboola mbu, “Nambaane omukhaana wanje Akisa okhutesibwa nomundu owanoleke litookho lia Kiriatsi Seferi.”

¹³Otsinieli, omusiani wamwabo Kalebu omutu owalangwa Kenasi, niye owamala naleka litookho yilio. Kho Kalebu yahelesia Otsinieli omukhaanawe Akisa amuteekhele.

¹⁴Litukhu lies'selelo Otsinieli yahomba omukhasiwe uyo okhusaba samwana omukunda. Yamala niyekha hasi okhurula khupunda yiye, ma Kalebu namureeba aboole esiayenyanga.

¹⁵Akisa namukalusia naboola mbu, “Runanga umbekhwo ebitaho biamaatsi. Omukunda kwawambelesia kuli musitsiimi.” Kho Kalebu yamuhelesia ebitaho biemukulu nende ebiemwalo.

¹⁶Abolwibulo lwa samwana omukhasi wa Musa, Omukeni batsia halala nende abolwibulo lwa Yuda okhurula Yeriko, litookho liemisaala chiamasindu okhwola musitsiimi esili enandete welitookho lia Aradi musibala sia Yuda. Ebwene iyio bamenya halala na Bamaleki.

¹⁷Abolwibulo lwa Yuda batsia nabolwibulo lwa Simioni, ma bosi halala nibaleka abandu ba Kanaani abali nibamenya mwitookho lia Sefatsi. Balaama litookho yilio, nibalimulula ma nibalilanga Norima.

¹⁸Abandu ba Yuda khandi baleka amatookho ka Gasa, Ashikeloni, nende Ekironi halala netsisoma etsia kabotokhana.

¹⁹OMWAMI yali okhukhonya abandu ba Yuda ne bamala nibabukula liloba liokhusikulu. Nebutswa sibanyal'lwa okhukhunga abandu abamenyanga khutsindulo tsieinyanza tawe, sichila bali nende amakaari kebibia.

²⁰Singa obwa Musa yali niyalaka, Heburoni liahanwa khu Kalebu, owamala nakhunga abebilibwa bitaru, abetsukhulu ba Anaki okhurula mwitookho yimwo.

²¹Nebutswa abandu bolwibulo lwa Benjameni sibaali okhukhunga Abayebusi abamenyanga Yerusalemu okhurula mwitookho yilio tawe, ma okhurula olwene yilio Abayebusi batsilil'la okhumenya mwitookho yilio nende abandu ba Benjameni.

²²Abetsinzibulo tsia Efuraimu nende Manase batsia okhuseera litookho lia Betseli ne OMWAMI yabakhonya.

²³Baruma abalambuuli bamasilisi khwitookho yilio, ne olwene yilwo lialangwanga Lusi.

²⁴Abalambuuli yabo balola omundu narulangamwo ma nibamureeba mbu, “Noyanza khumanyie obwa khwakhenjila mwitookho yimu, ne sikhulakhusaalisia tawe.”

²⁵Yamala nabamanyia, ma abetsinzibulo tsia Efuraimu nende Manase nibeera siomundu mwitookho yimwo, narali omundu owabamanyia injila uyo, nende abeinyumba yiye.

²⁶Olunyuma yamala natsia musibala sia Bahiti, niyombokhayo litookho ma nalilanga mbu Lusi ne lisilangwanga mbwo okhwola leelo.

²⁷Abolwibulo lwa Manase sibakhunga abandu abamenyanga mumatookho ka Betsi Shani, Taanaki, Tori, Ibileamu, Mekito, nende amataala akali ahembi khuko tawe. Abakanaani batsilil'la butswa okhumenyamwo.

²⁸Olwa Abaisiraeli bameetekha tsingufu, bali okhuhakia abandu ba Kanaani okhubatiyila, nebutswa sibabakhunga okhurula musibala yisio tawe.

²⁹Abolwibulo lwa Efuraimu sibakhunga Abakanaani abamenyanga mwitookho lia Keseri tawe, ma mbwo batsilil'la butswa okhumenyamwo n'nabo.

³⁰Abolwibulo lwa Sabuloni sibakhunga abandu abamenyanga mumatookho ka Kituroni nende Nahalali tawe. Ma kho Abakanaani batsilil'la okhumenyamwo n'nabo, ma Abaisiraeli nibabahakia okhubatiyila.

³¹Abolwibulo lwa Asheri sibakhunga Abakanaani abamenyanga mumatookho ka Ako, Sidoni, Ahilabu, Akisibu, Heliba, Afeki, nende Rehobu tawe.

³²Abolwibulo lwa Asheri bamenya nende Abakanaani abali nibamenyanga musibala yimwo, sichila sibaali nibabakhunga okhurulamwo tawe.

³³Abolwibulo lwa Nafutali sibakhunga abandu abamenyanga mumatookho ka Betsi Shemeshi nende Betsi Anatsi tawe. Abolwibulo lwa Nafutali bamenya nende Abakanaani abali nibamenyanga musibala yimwo ne bahachia okhubatiyila.

³⁴Abaamori bahachia abandu bolwibulo lwa Dani okhwinjila musibala siomubikulu ma sibabalekha betse mwiloba liomusipaapi tawe.

³⁵Abaamori batsilil'la okhumenya mu Aiyaloni, Shaalibimu, nende musikulu sia Heresi, nebutswa abetsinzibulo tsia Efuraimu nende Manase babamenyia hasi hoburuchi bwabwe ma nibabahakia okhubatiyilanga.

³⁶Esinyolu wa Sela, olwakho lwa Edomu lwabir'ra mulung'anyi lwa Akirabimu.