Read lunyore ABAKHALACHI 10 Bible Online

ABAKHALACHI 10 - lunyore bible

ABAKHALACHI 10

¹Abimeleki namal'le okhufwa, Tola omusiani wa Pua, omwitsukhulu wa Dodo, yeetsa okhusoola Isiraeli. Yali owomulwibulo lwa Isakari ne namenyanga Shamiri musibala siomubikulu esia Efuraimu.

²Yali omwemeli wa Isiraeli khulwemihika amakhumi kabili nende chitaru. Khe yali okhufwa ma nayabilwa mu Shamiri.

³Inyuma wokhufwa khwa Tola, Yairi okhurula Gileadi yemel'la Isiraeli khulwemihika amakhumi kabili nende chibili.

⁴Yali nabasiani amakhumi kataru abachendelanga khutsipunda amakhumi kataru. Bali nende amatookho amakhumi kataru musibala sia Gileadi, ne kasilangwa butswa amataala ka Yairi.

⁵Yairi yafwa ma nayabilwa mu Kamoni.

⁶Khandi Abaisiraeli bameeta okhol'la OMWAMI tsimbi khulwo okhwekayakaya ebiniini bia Baali nende Asitarete, kata nende abanyasaye ba Siria, Sidoni, Moabu, Amoni nende Filisiti. Bebil'la OMWAMI khandi nibalekha okhumwekayakaya.

⁷Kho OMWAMI yamala nasinyikhila Abaisiraeli, ma nalekha Abafilisiti nende Abaamoni nibabaleka.

⁸Khulwemihika likhumi namunane Abafilisiti bakhupia Abaisiraeli bosi esibi, abamenyanga musibala sia Baamori esili ebukwe womuchela kwa Yorodani mu Gileadi.

⁹Khandi Abaamoni bambukha Yorodani okhulwana abetsinzibulo tsia Yuda, Benjameni, nende Efuraimu. Isiraeli yali mukhutsunwa okhukali.

¹⁰Khe Abaisiraeli balakaya khu MWAMI nibaboola mbu, “Khwakhukhol'la tsimbi, okhuba khwakhukhupa omukongo, ibe Nyasaye wefwe, nikhwekayakaya ebiniini bia Baali.”

¹¹OMWAMI yabahelesia likalusio yili mbu: “Abaamisiri, Abaamori, Abaamoni, Abafilisiti,

¹²Abasidoni, Abaamaleki, nende Abamaoni bamusandia amatukhu kabira ma nimulakaya khu ise. Ise sindaali khumusoola okhurula khubo?

¹³Nebutswa mwatsilil'la okhundekha nimwekayakaya abanyasaye bandi, kho luno sinzitsanga okhumusoola khandi tawe.

¹⁴Tsie mulakayile abanyasaye bamwamala okhwela. Lekhe bamusoole olwa namunyoolenge amanyakhano.”

¹⁵Nebutswa abandu ba Isiraeli babool'la OMWAMI mbu, “Khwakhola tsimbi. Khola liosi elia wenya nebutswa noyanza, okhusoole leelo.”

¹⁶Kho bamala nibahiniaho abanyasaye babwe bebucheni ma nibekayakaya OMWAMI. Ne omwoyo wo OMWAMI yetsula nesibeela khulwo okhutsunwa khwa Isiraeli.

¹⁷Khe abasikari ba Amoni niberechekha okhulwana lihe ma nibombokha ekambi mu Gileadi. Abaisiraeli bebunjikha halala nibalomba ekambi yabwe ha Misipa mu Gileadi.

¹⁸Yaho abandu nende abemeli betsinzibulo tsia Baisiraeli nibareebana mbu, “Niwina owanochaake okhulwana lihe nende Abaamoni? Uyo owanochaake nabe omwemeli wabandu bosi abali mu Gileadi!”