Read lunyore ABAKHALACHI 11 Bible Online

ABAKHALACHI 11 - lunyore bible

ABAKHALACHI 11

¹Yefutsa, omusikari omululu okhurula Gileadi, yali omwana womukhasi omutamba. Papawe yalangwanga Gileadi

²ne yali nabasiani bandi mumukhasiwe, ne olwa abasiani yabo bakhula, bakhunga Yefutsa okhurula hango. Bamubool'la mbu, “Siwakhalaamilwekhwo esindu siosi okhurula khu papa wefwe tawe; oli omusiani womukhasi undi.”

³Yefutsa yelukha okhurula khubasiani babwe ma namenya musibala sia Tobu. Ebwene iyo yamala nanyoola omukanda okwabandu barali matsami, ma nikumulonda khulwo khuyaaka.

⁴Olunyumakhwo Abaamoni batsia okhulwana lihe nende Abaisiraeli.

⁵Olwe yaka kekholekha, abemeli ba Gileadi batsia okhwenda Yefutsa okhurula musibala sia Tobu.

⁶Nibamubool'la mbu, “Yitsa ma okhwemel'le, khe khube abanyala okhulwana Abaamoni.”

⁷Nebutswa Yefutsa nakalusia naboola mbu, “Mwali okhuusula okhusila nimuukhunga okhurula munyumba ya papa wanje. Busina mwitsanga khu ise olwa muli mumunyakhano?”

⁸Abemeli yabo nibabool'la Yefutsa mbu, “Khwitsanga khuibe luno sichila khwenyanga ibe otsie n'nefwe khulwo okhulwana Abaamoni ma khandi wemel'le abandu ba Gileadi bosi.”

⁹Yefutsa yamala nababool'la mbu, “Nimuba nimungalusia ingo okhulwana Abaamoni ma OMWAMI yambe tsingufu tsiokhubaleka kho, nambe omuruchi wenywe.”

¹⁰Nabo nibakalusia nibaboola mbu, “Khuhuchiliye? OMWAMI nomukobokheli wefwe.”

¹¹Kho Yefutsa yatsia nende abemeli ba Gileadi, ma abandu nibamwemekha okhuba omuruchi wabwe khandi omwemeli welihe. Yefutsa yakalukhila mumang'ana kabali nibahuchilisanisie nali Misiba imbeli wo MWAMI.

¹²Ma Yefutsa naruma abarume khumuruchi wa Amoni okhumureeba mbu, “Khufunananga sina n'nenywe? Busina inywe nimuseera esibala siefwe?”

¹³Omuruchi wa Amoni nakalusia omurume wa Yefutsa namubool'la mbu, “Olwa Abaisiraeli barula Emisiri, babukula liloba lianje okhurula khumuchela kwa Arinoni okhwola khumuchela kwa Yaboku nende omuchela kwa Yorodani. Luno okhwola mulikalusie mumulembe.”

¹⁴Yefutsa yaruma omurume okhukalukha khumuruchi wa Amoni,

¹⁵nende likalusio yili mbu, “Sikali akatooto mbu Isiraeli yabukula liloba lia Moabu nohomba liloba lia Amoni tawe.

¹⁶Akali okhwekhola ngakano mbu: olwa Abaisiraeli barula Emisiri, babir'ra musitsiimi okhutsia khu Nyanza Inzakhanyu ma nibetsa Kadeshi.

¹⁷Ma nibaruma abarume okhutsia khumuruchi wa Edomu okhumureeba omunwa mbu bahuchil'le babir're musibala sisie. Nebutswa naye siyabahuchil'la tawe. Khandi nibareeba omuruchi wa Moabu, nebutswa khandi naye siyali okhubahuchil'la babir're musibala sisie tawe. Kho Abaisiraeli bamenya Kadeshi.

¹⁸Kho bamala babir're musitsiimi, nibabotokhana esibala sia Edomu nende esibala sia Moabu okhwola olwa boola khulubeka lwebukwe wa Moabu, khuluchinga lwomuchela kwa Arinoni. Bakhupa ekambi yabwe habwene yaho, nebutswa sibayambukha omuchela kwa Arinoni tawe, sichila nikwo okwali olwakho lwa Moabu.

¹⁹Khe Abaisiraeli nibaruma abarume nibatsia khu Sihoni, omuruchi wa Baamori owaruchilanga Heshiboni, nibamureeba nayanza ahuchil'le babir're musibala sisie nibatsia musibala siabwe.

²⁰Nebutswa Sihoni siyali okhuhuchil'la Abaisiraeli babir're musibalasie tawe. Naleera abasikari baabe bosi halala, ma nibakhupa ekambi yabwe habundu mbu Yahasi, ma nibaseera Isiraeli.

²¹Nebutswa OMWAMI, Nyasaye wa Isiraeli yahelesia Abaisiraeli tsingufu tsiokhuleka Sihoni halala nabasikari baabe. Kho Abaisiraeli nibabukula liloba liosi elia Baamori abamenyanga musibala yimwo.

²²Babukula esibala siosi esia Baamori okhurula khumuchela kwa Arinoni olubeka lwenandete okhutsia Yaboku khulubeka lwesinyolu khandi okhurula khusitsiimi esili ebukwe okhwola khumuchela kwa Yorodani okuli emasaba.

²³Kho OMWAMI, Nyasaye wa Isiraeli niye owakhunga Abaamori okhurula musibala yisio khulwo okhusihaana khubandu baabe, Abaisiraeli.

²⁴Kho wenyanga okhusibukula khandi? Ibe obukule siosi esia nyasaye uwo Kemoshi yakhuhelesia. Nebutswa ifwe khwitsa okhubukula siesindu siosi esio MWAMI Nyasaye wefwe yakhuhelesia.

²⁵Opaalanga oli omulahi okhuyomba Balaki omwana wa Sipori, omuruchi wa Moabu? Balaki siyasolanakhwo nende Isiraeli nohomba kata okhulwanakhwo n'nabo tawe?

²⁶Khulwemihika etsimia tsitaru Isiraeli yabukula Heshiboni nende Aroeri, nende amataala kali ahembi khubibala yibi, nende amatookho kosi akali khuluchinga lwomuchela kwa Arinoni. Busina siwakachelesia khulwoluhono yilu lwosi tawe?

²⁷Tawe, ise sili okhukhukholelakhwo obubi bwosi. Ibe okholanga obubi khulwokhunwana. OMWAMI niye omukhalachi. Yetsa okhukhalaka olwaleelo hakari ha Baisiraeli nende Abaamoni.”

²⁸Nebutswa omuruchi wa Amoni siyabukulakhwo obuha mumang'ana yaka akarula khu Yefutsa tawe.

²⁹Khe omwoyo wo MWAMI yetsa khu Yefutsa. Ma Yefutsa natsia okhubir'ra mu Gileadi nende Manase, nakalukha Misipa elili mu Gileadi ma khandi natsilil'la okhutsia Amoni.

³⁰Yefutsa yali okhwesuhila OMWAMI namubool'la mbu, “Noba niwakhambelesia tsingufu tsiokhuleka Abaamoni,

³¹nakhuhaan'ne omusango omusambe singa esihanwa khumundu owanorange okhurula munyumba mwanje okhumbukan'na olwa nambe ninjelelanga okhurula mubulechi. Nambane omundu uyu khuibe singa omusango.”

³²Kho Yefutsa niyambukha omuchela okhutsia okhulwana Abaamoni, ma OMWAMI namuha obulechi.

³³Yafumila amataala amakhumi kabili okhurula Aroeri okhwola ahembi Minitsi khandi okhwola Abeli Keramimu. Abandu abenji berwa, ma Abaisiraeli nibaleka Abaamoni.

³⁴Olwa Yefutsa yakalukha ingo uwe mwitookho lia Misipa, omukhaana uwe niye owarula okhumwakan'na, nasinanga nokhusaaia amanyanga. Niye owali omwana uwe yenyene.

³⁵Olwa Yefutsa yamulola, yarandula tsingubotsie khulwesibeela ma naboola mbu, “E, omukhaana wanje! Usaalisisie omwoyo kwanje! Busina ibe niumbelesia esibeela? Mal'le okhwesuhila OMWAMI ma sindi onyala okhukalukhana tawe!”

³⁶Omukhaana nabool'la samwana mbu, “Noba niwesuhiye OMWAMI, khola akawabooye nokhole khu ise, sichila OMWAMI uchil'le urunjile es'sialia khubasuku baabo, Abaamoni.”

³⁷Nebutswa yareeba samwana mbu, “Khol'la ling'ana elala. Undekhe mbe sienyene khulwe emiesi chibili, kho mbe onyala okhutsia nende abalina banje okhuchenda chenda mubikulu nende okhwekhuula mbu okhwola fwe nisili nolukhaana.”

³⁸Yamubool'la atsie ma amenye khulwe emiesi chibili. Ye nende abalina baabe banichila okhutsia mubikulu ma nibekhuul'layo sichila yali natsitsanga okhufwa naraateesibwa khandi sila omwana.

³⁹Olunyuma lwemiesi chibili yakalukha khusamwana. Samwana yakhola obwa yali niyesuhila OMWAMI, ma nafwa nasili nolukhaana. Yibu nibwo obwali obuchiachilo bweifwo mu Isiraeli

⁴⁰eyabakhasi ababuukha okhutsitsanga okhwekhuula khulwomukhaana wa Yefutsa omusiani wa Gileadi khulwa amatukhu kane buli muhika.