Read lunyore ABAKHALACHI 12 Bible Online

ABAKHALACHI 12 - lunyore bible

ABAKHALACHI 12

¹Abaefuraimu balanga abasikari babwe okhutsia mwihe ma nibambukha omuchela kwa Yorodani okhutsia Safoni ma nibabool'la Yefutsa mbu, “Busina nosiila olwakho okhutsia okhulwana Abaamoni norakhulanga khutsie n'nawe? Nakhukhusambile munyumba!”

²Nebutswa Yefutsa nabakalusia naboola mbu, “Ise nende abandu banje khwali nobusoolo obukali nende Abaamoni. Ndali okhumulanga, nebutswa simwaisoola okhurula khubo tawe.

³Olwa ndol'le mbu simwakhasool'le tawe, ndaali okhura obulamu bwanje mubutinyu ma nikhalania olwakho okhutsia okhubalwana, ne OMWAMI amal'le niyamba tsingufu tsiokhubaleka. Kho busina mwitsanga okhunwana luno?”

⁴Khe nilwo olwa Yefutsa yaleera abandu ba Gileadi bosi halala, nibalwana Abaefuraimu ma nibabaleka. (Abaefuraimu bali nibabooye, mbu, “Inywe abandu ba Gileadi abali Efuraimu nende Manase, mwelukha okhurula Efuraimu!”)

⁵Khulwa okhwikal'la Abaefuraimu okhubula okhwilukha, Abagileadi bafumila habundu hokhwambukhila khumuchela kwa Yorodani. Olwa Omuefuraimu wosi owatemanga okhwilukha yareebanga ahuchil'lwe okhwambukha omuchela, abandu ba Gileadi bamureebanga mbu, “Ibe oli Omuefuraimu?” Naye naboola mbu, “Tawe,”

⁶ne bamubool'la aboole mbu, “Shiboletsi.” Nebutswa naye aboola mbu, “Siboletsi,” sichila siyakhalilanjile bulahi tawe. Khe bakhamutiil'le ma bamwir'ra habwambukhilo bwa Yorodani. Munyinga iyo etsielefu amakhumi kane nende tsibili etsia Abaefuraimu beerwa.

⁷Yefutsa yemel'la Isiraeli emihika chisasaba ma nafwa nayabilwa mwitaala liabwe lia Gileadi.

⁸Inyuma wokhufwa khwa Yefutsa, Ibisani okhurula Betselehemu yemel'la Isiraeli.

⁹Yali nabasiani amakhumi kataru nende abakhaana amakhumi kataru. Yahaana abakhaanabe okhuteesibwa nabebilibwa bindi khandi naleera abakhaana amakhumi kataru okhurula mubilibwa bindi khulwo khuteesibwa nabasiani baabe. Ibisani yemel'la Isiraeli khulwemihika chine nachitaru,

¹⁰ma nafwa nayabilwa mwitookho lia Betselehemu.

¹¹Inyuma wokhufwa khwa Ibisani, Eloni okhurula mulwibulo lwa Sabuloni yemel'la Isiraeli khulwemihika likhumi.

¹²Yamala nafwa manayabilwa mwitookho lia Aiyaloni mulusoma lwa Sabuloni.

¹³Inyuma wokhufwa khwa Eloni, Abudoni omusiani wa Hileli okhurula Piratsoni yemel'la Isiraeli.

¹⁴Yali nabasiani amakhumi kane nende abetsukhulu amakhumi kataru, abachendelanga khutsipunda amakhumi kane nakataru. Abudoni yemel'la Isiraeli khulwemihika munane,

¹⁵ma nafwa nayabilwa Epiratsoni mulusoma lwa Efuraimu oluli mubikulu bia Bamaleki.