Read lunyore ABAKHALACHI 14 Bible Online

ABAKHALACHI 14 - lunyore bible

ABAKHALACHI 14

¹Litukhu lindi Samusoni yakongoma natsia Timuna, owa yali okhulola omukhaana Omufilisiti.

²Yakalukha ingo ma nabool'la samwana nende nyina mbu, “Aliyo omukhaana Omufilisiti mu Timuna unyanzisisie. Tsia munder're. Nyenyanga okhumuteesia.”

³Nebutswa samwana nende nyina nibamureeba mbu, “Nisina esiakhachila otsie okhuteesia omukhasi okhurula mu Bafilisiti abanasibala? Sionyala okhunyoola omukhaana musilibwa siefwe siene nohomba mubandu befwe bosi tawe?” Nebutswa Samusoni nabool'la samwana mbu, “Ye niye owanyenyanga munder're. Ndamuyanza.”

⁴Abebuli baabe sibamanya mbu OMWAMI niye owemel'langa Samusoni okhukhola akene yaka tawe, sichila OMWAMI yali nakhaabanga obweyangu bwokhulwana Abafilisiti. Mumatukhu kene yaka Abafilisiti bali nibarukanga Isiraeli.

⁵Kho Samusoni yakongoma natsia Timuna nende samwana halala nanyinawe. Olwabali nibachendanga okhubir'ra mumukunda kwemisabibu ebweneiyo, yahulila esimba imbukha nehumanga.

⁶Nonoho obunyali bwo MWAMI nibukufuhasia Samusoni okhuba netsingufu ma niyabulania esimba hakari nali namakhono ameele. Yachiabulania butswa singa esimeme sieimbusi. Nebutswa siyabool'lakhwo abebuli baabe akayali nakhol'le tawe.

⁷Khe yatsia nal'loma nomukhaana uyo ma namuyanza.

⁸Inyuma wamatukhu matititi, Samusoni yakalukha natsia okhumuteesia. Nali khuluchendo yebera natsia okhulola esimba yayali okhwira, ne kali okhumuchenyia okhunyoola omulinga kwetsinzukhi nende obuukhi nibili mukari mwomubili kweesimba yafwa.

⁹Yahiniamwo obuukhi namakhonoke nalia ne nachenda. Ma natsia khusamwana nanyina nabahakhwo. Khe nibalia, nebutswa siyababool'lakhwo mbu ahinisie obuukhi yibwo okhurula m'mubili kwesimba yafwa tawe.

¹⁰Samwana Samusoni yatsia munyumba yomukhaana wa Samusoni yenyanga khuteesia, ma Samusoni nalombelamwo lisabo. Yiyi yali ifwo eyakholwanga nababuukha.

¹¹Olwa Abafilisiti bamulola, baruma ababuukha basiani amakhumi kataru okhumenya n'naye.

¹²Ma Samusoni nababool'la mbu, “Lekhe mukhupilekhwo esitandawili[3]. Nimuba nimusibuula amatukhu kane nakataru kelisabo nikasili okhuhwa, namuhelesie ebitonye amakhumi kataru biekatani indahi nende ebitonye amakhumi kataru bietsingubo tsindi.

¹³Nebutswa nimuba nimuranyala okhubuula, kho namumbelesie ebitonye amakhumi kataru biekatani indahi nende ebitonye amakhumi kataru bietsingubo tsindi.” Nibamubool'la, “Khubool'le esitandawili sisio khusihulile.”

¹⁴Samusoni naboola mbu, “Mu uyo oulitsanga, mwarulamwo esiokhulia; ne uyo owetsingufu, mwarulamwo esindu esielungu.” Inyuma wamatukhu kataru bali nibasili okhubuula esitandawili isio.

¹⁵Litukhu liakhane nibabool'la omukhasi wa Samusoni mbu, “Hombelesia omusaatsa uwo abe onyala okhukhubool'la ifwe esifune siesitandawili sisie. Norakhola mbwo nakhusambe abeinyumba ya papa uwo halala n'nawe. Inywe mwakhulanjile kho muyaake ebindu biefwe, sikali mbwo?”

¹⁶Kho omukhasi wa Samusoni yatsia khuye nalakayanga ma namubool'la mbu, “Siwainyanza tawe! Waisuula! Wareeba abalina banje esitandawili ne siwaimbool'la esifune siesitandawili tsana tawe!” Samusoni naye namubool'la mbu, “Lola, sili kata okhubool'lakhwo papa wanje namama wanje tawe. Busina mbool'le ibe?”

¹⁷Kho omukhasiwe yalakaya khulwa amatukhu kane nakataru akelisabo khulwamang'ana akene yaka. Nebutswa litukhu liakhane nakhataru Samusoni yamubool'la esifune siesitandawili sichila yamunichilisia khulwo oluhono mbu amubool'le. Khe omukhasiwe yabuul'la Abafilisiti esitandawili yisio.

¹⁸Kho khwitukhu liakhane nakhataru, Samusoni nasili okhutsia musikoti siokhukona, abandu bomwitookho bamubool'la mbu, “Nisina esinyala okhuba esielunga okhuyomba obuukhi? Nisina esili netsingufu okhuyomba esimba?” Samusoni nabakalusia nababool'la mbu, “Mulaba nimuralimiyenje ing'ombe yanje, khane simwakhamanyile elia mukalusia tawe.”

¹⁹Nonoho obunyali bwo MWAMI nibumukhola okhuba netsingufu, ma natsia Ashikeloni, owayamala niyeera abandu amakhumi kataru, nabukula ebiabali n'nabio, ma nahaana tsingubo tsiabwe tsindahi khubandu abali nibabuul'le esitandawili. Olunyuma lweyako, yakalukha ingo, nasinyikhile khulwa akali nikekhol'le,

²⁰ma omukhasiwe nahaanwa khumusaatsa owali omusinjil'li uwe mus'selelo.