Read lunyore ABAKHALACHI 15 Bible Online

ABAKHALACHI 15 - lunyore bible

ABAKHALACHI 15

¹Inyuma wamatukhu nalebe Samusoni yatsia okhukonya omukhasiwe mumatukhu kelichesa lieingano ma namuhil'la esimeme seimbusi. Nabool'la samwana omukhasiwe mbu, “Runanga okhutsia musikoti siomukhasi wanje.” Nebutswa siyamuhuchil'la atsiemwo tawe.

²Nabool'la Samusoni mbu, “Tooto ndapaalanga mbu wamusuula, kho ndamuhaana khumulinawo. Nebutswa kata mbwo omukhaana wabwe omutititi ali nelikondo lilahi. Onyala okhumubukula, musilenjesie.”

³Samusoni naboola mbu, “Luno sinzitsanga okhuba nesikha khu kosi akanzia okhukhol'la Abafilisiti tawe!”

⁴Kho yamala natsia nafumila ebibwe etsimia tsitaru nabohania emisila chiabuliebibwe b'bili, ma nara tsimuli mumafundikhilo kemisila tsana.

⁵Yamala nahambia omul'lo mutsimuli tsana ma nalakhula ebibwe mumikunda chieingano ya Abafilisiti. Munjila yiyi yasamba ingano eyali necheselwe nende eyali nesili mumikunda halala nende emiseituni.

⁶Olwa Abafilisiti bareeba niwina okhol'le yaka, banyoola mbu Samusoni niye owali nakakhol'le sichila samwana omukhasiwe yali nahaan'ne omukhasi wa Samusoni khumulina wa Samusoni. Kho Abafilisiti batsia ma nibasamba omukhasi uyo halala nabeinyumba yasamwana ma bosi nibafwa.

⁷Samusoni nababool'la mbu, “Nikali yaka niko akamukhol'le, ndesuhanga mbu, sinambuluukhekhwo, okhwola olwa nambe nirunjile es'sialia tawe!”

⁸Yamala nabasena noburima obukali ma niyeera abenji khubo. Yamala natsia okhumenya mulwanga lwelichina lirambi elili mwitookho lia Etamu.

⁹Abafilisiti betsa nibakhupa ekambi yabwe mu Yuda, ma nibaseera litaala lia Lehi.

¹⁰Abandu ba Yuda nibabareeba mbu, “Busina mukhuseeranga?” Nabo nibakalusia nibaboola mbu, “Khwitsile okhuboha Samusoni ma khumukhol'le singa yakhukholeye.”

¹¹Kho abandu ba Yuda abahela etsielefu tsitaru batsia mulwanga lwelichina elili mwitookho lia Etamu ma nibareeba Samusoni mbu, “Ibe siomanyile mbu Abafilisiti nibo abakhurukanga tawe? Nisina esiokhukholeye yisi?” Samusoni nakalusia naboola mbu, “Mbakholeye butswa akanabo baakhol'la.”

¹²Nabo nibaboola mbu, “Khwitsile hano okhukhuboha, kho khube abanyala okhukhuhaana khubo.” Samusoni nababool'la mbu, “Mundesuhile mbu simwitsa okhunzira inywe abene tawe.”

¹³Nabo nibaboola mbu, “Kosi namalahi, khwitsa okhukhuboha butswa ma khukhuhaane mumakhono kabwe. Sikhukhwira tawe.” Kho bamala nibamuboha nende tsimbuno tsinzibulo tsibili ma nibamuhinia mulwanga.

¹⁴Olwa yoola mwitookho lia Lehi, Abafilisiti beetsa khuye nibelukhanga nibamuhibukhilanga. Nonoho obunyali bwo MWAMI bwamukhola okhuba netsingufu ma nakatula tsimbuno etsiali nitsibohele amakhono singa okatulanga obuusi obusambilwe.

¹⁵Ma yanyoola esikumba sioluseya lwepunda eyali niyafwiye nemal'le amatukhu mati. Yenama nalutoola, ma niyeera abandu abahela elefu ndala n'nalwo.

¹⁶Kho Samusoni niyemba naboola mbu, “Ndali okhwira abandu elefu ndala nende esikumba sioluseya lwepunda, Ndali okhubabunjikha mubituma nende esikumba sioluseya lwepunda.”

¹⁷Inyuma weyako, yafuuba esikumba sioluseya ehale. Habundu heyaka kekholekhela halangwa Ramatsi Lehi[4].

¹⁸Khe Samusoni yamala nahambwa nobuluho obwinji okhusila, kho yalanga khu MWAMI ma naboola mbu, “Waimbelesisie obulechi obukali yibu, kho busina fwe khulwo obuluho bwamaatsi ma fumilwe nende Abafilisiti abanasibala yaba?”

¹⁹Khe Nyasaye yekula habundu omuluhu mwiloba lia Lehi, ma amaatsi nikarulamwo. Samusoni yakanywa ma nachaaka okhuhul'la obulahi okhusila. Kho esitaho yisio sialangwa mbu Hakikore; ne sisili mwitookho lia Lehi okhwola leelo.

²⁰Samusoni yemel'la Isiraeli khulwemihika amakhumi kabili olwa Abafilisiti bali nibarukanga esibala.