Read lunyore ABAKHALACHI 16 Bible Online

ABAKHALACHI 16 - lunyore bible

ABAKHALACHI 16

¹Litukhu elala Samusoni yatsia mwitookho lia Bafilisiti elilangwanga Kasa, omwayanyoola omutamba ma nakona n'naye.

²Abandu ba Kasa babool'lwa mbu Samusoni ali mwitookho, kho bamala nibafumbila habundu yaho ma nibamulinda obutukhu bwosi hasilibwa sielitookho. Bali masilisi obutukhu bwosi nibaboolanga mumioyo chiabwe mbu, “Khwitsa okhulinda okhwola olwa busia, ma nakhumwire.”

³Nebutswa Samusoni yabuutsa musitanda okhwola mubutukhu hakari. Khe yabuukha ma natila esilibwa sielitookho ma nasikhunyula. Yakhunyula emiliango, amatilwa, nende ebindu bindi biosi ebialikhwo. Yabira khwibeka ma nabichinga biosi okhuhila khubutenje bwesikulu esihengan'ne nende Heburoni.

⁴Inyuma weyaka, Samusoni yayanza omukhasi owalangwa Delila, owamenyanga Mwibanda lia Soreku.

⁵Abaruchi barano Abebufilisti batsia khu Delila nibamubool'la mbu, “Hombelesia Samusoni aluhe akhubool'le nisina esichilanga naba netsingufu tsinyinji, khandi nisina esiakhwakhola kho khumulekel'le, ma khube abanyala okhumuboha, nokhumukhola okhuba oranyala esindu tawe. Buli mulala khu ifwe nakhuhelesie ebitonye biefetsa elefu ndala nende emia ndala.”

⁶Kho Delila nabool'la Samusoni mbu, “Noyanza mbool'la esikhukholanga okhuba netsingufu tsinyinji. Omundu wosi niyakhenya akhubohe ma akhukhole okhuba oranyala esindu, yakhakhola mbwena?”

⁷Samusoni nakalusia namubool'la mbu, “Abandu nibakhamboha emikoye chine nachitaru echiobuhingo echisili okhwomibwa, nemba butswa omutofu singa omundu undi wosi.”

⁸Kho abaruchi ba Filisiti baleer'ra Delila emikoye emiyia chine nachitaru echiobuhingo emiyia echiali nichisili okhwomibwa, ma naboha Samusoni.

⁹Delila yali nabandu bandi nibekonekhele musikoti sindi, kho yamala nalanjisia naboola mbu, “Samusoni! Abafilisiti mbabo beetsanga!” Nebutswa Samusoni yakatula butswa emikoye singa oluusi lukhalikhanga omul'lo nikwolanga khulwo. Kho sibaali nibamanyilisisie ahetsingufu tsitsie tsirulanga tawe.

¹⁰Delila nabool'la Samusoni mbu, “Lola, ukholanga omuhingwa ma siumbool'langa akatooto tawe. Noyanza mbool'la singa omundu anyala okhukhuboha.”

¹¹Samusoni nakalusia naboola mbu, “Nibakhamboha nemikoye emiyia echisili okhurumikhakhwo tawe, nambe butswa omutofu singa omundu undi wosi.”

¹²Kho Delila nabukula emikoye chindi emiyia namubohela. Khe nalanjisia naboola mbu, “Samusoni! Abafilisiti mbabo beetsanga!” Abandu abali nibekonekhele bali nibalindil'langa musikoti sindi. Nebutswa yakatula emikoye okhurula khumakhonoke singa oluusi.

¹³Delila nabool'la Samusoni mbu, “Osiikholanga butswa omuhingwa ma siumboolanga akatooto tawe. Mbool'la singa obwomundu anyala okhukhuboha.” Samusoni namukalusia mbu, “Noba niwakhanaba amafundikhilo kane nakataru akeliswi lianje singa omukoye kweingubo, ma akabohe butinyu khusibambo, ne nambe butswa omutofu singa omundu undi wosi.”

¹⁴Kho Delila namuhombelesia nakona ma nabukula mafundikhilo kane nakaturu akokhumurwekwe nakanaba singa omukoye kweingubo. Yakaboha khusibambo butinyu ma nalanjisia naboola mbu, “Samusoni! Abafilisiti mbabo beetsanga!” Nebutswa yabuukha nakhwesa liswilie nilitendeya okhurula khusibambo.

¹⁵Kho Delila yamala namubool'la mbu, “Wakhaboola mbwena wainyanza, olwa oramanyianga obuyanzibwo? Wakhakhola okhuba omuhingwa esiakhataru, ne osili kata okhumbool'la esikhukholanga okhuba netsingufu okhusila.”

¹⁶Yatsilil'la okhumureeba bulitukhu. Amang'ana kokhumureeba nende akokhumuhachia kamukhola okhuba omulwaye khandi omuchonyu okhusila,

¹⁷ma olwokhumal'likha yamala namubool'la akatooto. Yamubool'la mbu, “Liswi lianje lisili okhubekwakhwo kata l'lala. Ndali okhuhanwa khu Nyasaye singa Omunasariti okhurula olwa ndebulwa. Liswi lianje niliakhabekwa ndakhakosia tsingufu tsianje, mambe butswa omutofu singa omundu undi wosi.”

¹⁸Olwa Delila yamanyilisia mbu umubooleye akatooto, yaruma amang'ana khubaruchi ba Bafilisiti ma nababool'la mbu, “Kalukhe luno lwonyene. Umal'le okhumbool'la akatooto.” Khe betsa nibalerana amapesa.

¹⁹Delila nahombelesia Samusoni okhukona khumakulu kaake ma nalanga omundu owamubeka nahinia amafundikhilo kane nakataru akeliswi lilie. Khe nachaaka okhumusaalisia okhuba yali namal'le okhukosia tsingufu tsitsie.

²⁰Ma nalanjisia naboola mbu, “Samusoni! Abafilisiti mbabo betsanga!” Yabuukha ma napaala mbu, “Nzia okhwebohol'la ma mbe omulakhuule singa khasotso.” Siyamanya mbu OMWAMI yali namulekhele tawe.

²¹Abafilisiti bamufumila ma nibamufutula tsimonitsie. Nibamuhila Kasa, nabohelwe nende eminyol'lo chiemikasa, ma nibamura khumilimo okhusa khuluchina nali mubuhambe.

²²Nebutswa liswi lilie liachiaka okhumela.

²³Abaruchi ba Bafilisiti bebunjikha halala okhusangala nende okhulomba omusango omukali khu nyasaye wabwe olangwanga Dakoni. Bemba nibaboola mbu, “Nyasaye wefwe ukhuhelesisie tsingufu tsiokhuleka omusuku wefwe Samusoni!”

²⁴Olwabandu bamulola betsoomia nyasaye wabwe nibaboola mbu, “Nyasaye wefwe ukhuhelesisie tsingufu tsiokhuleka omusuku wefwe owali okhumulula esibala siefwe niyeera abandu abenji mwifwe.”

²⁵Ne olwa bali nibasangalanga abene, bamala baboole mbu, “Khulanjile Samusoni yetse akhusin'nekhwo.” Kho Samusoni yalangwa okhurula mubuhambe nibamura hakari wetsisiilo tsieinyumba ma nabasin'na.

²⁶Samusoni nabool'la omusiani owamwemel'langa namutiil'le omukhono mbu, “Ndekha ndiilekhwo etsisiilo etsiatiila eliombokho lino. Runanga okhwesetamiakhwo.”

²⁷Eliombokho liali nditsuyemwo abandu abasaatsa nende abakhasi. Abaruchi ba Bafilisiti bosi barano balimwo, khandi khwalimwo nabasaatsa nende abakhasi abahela ahembi etsielefu tsitaru nibanin'ne khusilama sieinyumba nibakolanga singa Samusoni asinanga.

²⁸Khe Samusoni nasaaya naboola mbu, “OMWAMI Nyasaye. Noyanza nzitsul'la; noyanza, Nyasaye, mbelesiakhwo tsingufu tsianje butswa l'lala lwonyene, ma numbe l'lala etsisiilo yitsi ma runge Abafilisiti es'sialia khulwa okhufutula tsimoni tsianje tsibili.”

²⁹Kho Samusoni nafumila etsisiilo tsiahakari tsibili etsiatiila eliombokho. Yara omukhono mulala khusiilo ndala ne okundi khusiilo yindi niyelumba khutsio

³⁰ma nalangisia naboola mbu, “Lekha ise fwe halala nende Abafilisiti!” Niyelumbakhwo netsingufutsie tsiosi, ma eliombokho nilikwa hasi khubaruchi barano nende siomundu wosi owalimwo. Samusoni yeera abandu abenji mukhufwakhwe okhuyomba abayeera nasili mwoyo.

³¹Abasiani babwe nende abandu bosi abeinyumba yabwe betsa okhwenda omubilikwe. Bamubukula nibamuleera ingo ma nibamuyabila hakari welitookho lia Sora nende Eshitaoli musilindwa sia papa uwe Manoa. Yali omwemeli wa Isiraeli khulwemihika amakhumi kabili.