Read lunyore ABAKHALACHI 17 Bible Online

ABAKHALACHI 17 - lunyore bible

ABAKHALACHI 17

¹Yaliho omundu undi owalangwa mbu Mika, owamenyanga mubikulu bia Efuraimu.

²Yabool'la nyina mbu, “Olwomundu yeba ebitonye biefetsa elefu ndala nende emia ndala okhurula khuibe, wali okhulaama omwibi tsana. Ndali okhuhul'la nomulaamanga. Lola, ndi nende amapesa katsana. Nise owali okhubukula.” Nyinawe namubool'la mbu, “OMWAMI akhulaamile ikhabi, omusiani wanje!”

³Kho Mika yakalusia amapesa khunyina, ma nyina naboola mbu, “Okhwikal'la esilaamo sirakwila omusiani wanje, ise mwene mbananga efetsa yosi khu MWAMI. Nerumikhilwe okhulomba esiniini siomusaala esiahomwakhwo efetsa. Kho luno nangalusie ebitonye biefetsa khuibe.”

⁴Khe olwa yali namal'le okhuhelesia nyina amapesa tsana, nyina yabukula ebitonye biefetsa etsimia tsibili ma nabihaana khumuruli webibia, owamala nalomba esiniini, nasibaatsa okhurula khumusaala ma nahomakhwo efetsa. Siamala nisirebwa munyumba ya Mika.

⁵Omundu uyu owalangwa Mika yali nende habundu hahe ahokhwekayakayila. Yalomba ebiniini nende ingubo yomwesaalisi elangwanga efoti[5] ma niyeela mulala khubasiani baabe mbu abe omwesaalisi uwe.

⁶Omuruchi siyali mu Isiraeli olwene yilwo tawe. Siomundu yakholanga butswa obwa yenyele.

⁷Mumatukhu yako yaliho omubuukha mulala owomulwibulo lwa Balawi owamenyanga mwitaala lia Betselehemu elili musibala sia Yuda.

⁸Yarula Betselehemu narunanga habundu hokhumenya. Olwa yali nali khuluchendo, yoola khunyumba ya Mika mubikulu bia Efuraimu.

⁹Mika namureeba mbu, “Ibe orulanga hena?” Naye namukalusia mbu, “Ise ndi Omulawi okhurula mwitaala lia Betselehemu elili musibala sia Yuda. Runanga habundu hokhumenya.”

¹⁰Mika namubool'la mbu, “Menya n'nase, ma obe omuchetsiyi wanje khandi omwesaalisi wanje, ma nase nakhuhelesinjie ebitonye likhumi ebiefetsa buli muhika, halala netsingubo, nende ebiokhulia bibio.”

¹¹Omubuukha Omulawi uyo yahuchil'la okhumenya nende Mika ma naba singa omusiani uwe.

¹²Mika yamwahula okhuba omwesaalisi uwe, ma namenya hango ha Mika.

¹³Mika naboola mbu, “Luno olwandi nende Omulawi singa omwesaalisi wanje, manyile mbu OMWAMI nayangasie.”