Read lunyore ABAKHALACHI 18 Bible Online

ABAKHALACHI 18 - lunyore bible

ABAKHALACHI 18

¹Omuruchi siyaali nali mu Isiraeli olwene yilwo tawe. Mumatukhu yako abolwibulo lwa Dani bali nibakhaabanga liloba liokhubukula ma bamenyemwo sichila sibaali nibahebwakhwo liloba liabwe abene okhurula mubetsinzibulo tsia Isiraeli tawe.

²Kho abandu ba Dani bahula abandu barano abeikholo okhurula mutsinyumba tsiosi etsiolwibulo lwabwe ma nibabaruma okhurula mumataala ka Sora nende Eshitaoli okhutsia okhuhengelesia nende okhulambuula liloba. Olwa boola mubikulu bia Efuraimu, bakona munyumba mwa Mika.

³Olwa bali nibasiliho bamanyilisia omwoyo kwomusiani omubuukha Omulawi, kho bamala nibatsia khuye ma nibamureeba mbu, “Okholanga sina hano? Niwina owakhuleera hano?”

⁴Yakalusia naboola mbu, “Ndahandiikwa nende Mika, ma yarunganga khulwo khurumikha singa omwesaalisi uwe.”

⁵Nibamubool'la mbu, “Noyanza khureebele Nyasaye nikali oluchendo lwefwe luno lwitsa okhuba ol'lahi.”

⁶Omwesaalisi nakalusia nababool'la mbu, “Sibulaho esimuhendia omwoyo tawe. OMWAMI alamulinda khuluchendo yilu lwosi.”

⁷Kho abandu barano yabo barula nibatsia mwitaala lia Laishi. Balola obwabandu baho bamenyanga m'mulembe singa butswa abandu ba Sidoni. Bali abandu bomulembe abaholelu khandi abarasolanangakhwo nomundu wosi tawe. Khandi bali abahinda sichila esibala siabwe sialimwo ebindu biosi. Bamenyanga ehale okhurula khubandu ba Sidoni khandi sibalikhwo nende esiabahamban'nangakhwo nabandu bandi tawe.

⁸Olwabandu barano yabo bakalukha Sora nende Eshitaoli, abandu besibala siabwe babareeba esiabali nibanyooye.

⁹Nabo bakalusia nibaboola mbu, “Yitse, khuseere Laishi. Khwalola mbu liloba liaho nelilahi okhusila. Muramenya hano nimurakholanga esindu tawe; khole bwangu! Tsieimwo musibukule!

¹⁰Olwa namwoleyo, namunyoole mbu nabandu bomulembe. Isio nesibala esikali ne silimwo ebindu biosi ebiomundu yakhenya, khandi Nyasaye umal'le okhusihaana khwinywe.”

¹¹Kho abandu tsimia tsisasaba okhurula mulwibulo lwa Dani barula Sora nende Eshitaoli niberechekhele okhulwana lihe.

¹²Batsia ma nibakhupa ekambi yabwe emasaba wa Kiriatsi Yearimu mu Yuda. Niko akachilanga habundu yaho hasilangwanga butswa ekambi ya Dani.

¹³Barulaho ma nibatsia niboola khunyumba ya Mika musibala siebikulu bia Efuraimu.

¹⁴Khe abandu barano abali nibatsia okhulambuula esibala ahembi Laishi babool'la abasiabwe mbu, “Mwamanyakhwo mbu ndala khutsinyumba yitsi elimwo esiniini siomusaala esiahomwakhwo efetsa? Khandi belimwo nende ebiniini bindi ma nende ingubo yomwesaalisi elangwanga efoti. Nisina esiamupaalanga khwakhakhola?”

¹⁵Kho batsia munyumba ya Mika, omwo mubuukha Omulawi yali namenyanga nibamureeba obwa yali natsilil'langa.

¹⁶Munyinga yene iyio abasikari tsimia tsisasaba okhurula Dani, abali niberechekhele okhulwana lihe, bali nibasinjiye hasilibwa.

¹⁷Abalambuuli barano yabo batsia silunji munyumba ma nibabukula esiniini siomusaala esiahomwakhwo efetsa, halala nebiniini bindi, nende ingubo yomwesaalisi elangwanga efoti olwa omwesaalisi yali nasili hasilibwa nende abandu etsimia tsisasaba abali nebilasan'nwe.

¹⁸Olwabandu batsia munyumba ya Mika ma nibabukula ebiniini ebiabaatswa nende ingubo yobwesaalisi, omwesaalisi yabareeba mbu, “Mukholanga sina?”

¹⁹Nabo nibamubool'la mbu, “Buna tsi. Oraboola ling'ana liosi tawe. Yitsa khutsie n'nawe ma obe omwesaalisi wefwe khandi omuchetsiyi wefwe. Sibwakhaba obulahi okhuba omwesaalisi woluyia lwa Isiraeli lwosi okhuyomba okhuba omwesaalisi weinyumba yomundu mulala?”

²⁰Yaka kakhola omwesaalisi okhuba nobusangali obukali, kho yabukula ebindu biatsienulwa ma natsia n'nabio.

²¹Basukhana ma nibachaaka okhutsia, ne abaana babwe bemela imbeli halala netsing'ombe tsiabwe, nende emiandu chiabwe.

²²Bali nibakhachenda oluchendo olurambi okhurula khunyumba, olwa Mika yalanga abarende baabe betse okhulwana lihe. Abarende ba Mika balondel'la abandu ba Dani ma nibabanyoola.

²³Olwa babalangisia, abandu ba Dani basukhana ma nibareeba Mika mbu, “Nisina esikwiye? Busina oli nomukanda yiku kwosi?”

²⁴Mika nakalusia naboola, “Mumanyianga sina nimureeba, ‘Nisina esikwiye?’ Inywe mubukuye omwesaalisi wanje nende abanyasaye aba ndalomba, ma mutsiye n'nabo! Nisina esisikaye khu ise?”

²⁵Abandu bolwibulo lwa Dani nibaboola mbu, “Bwakhabeye bulahi ibe okhubuna tsi, fwana noba niwenya abandu yaba basinyikhe ma bakhuseere ibe; ma ibe nende abeinyumbayo yosi mwirwe.”

²⁶Ma nibatsilil'la. Mika yalola mbu nabetsingufu okhumuyomba, kho yasukhana nakalukha ingo.

²⁷Olwabandu ba Dani bali nibamal'le okhubukula omwesaalisi nende ebindu bia Mika yali niyalomba, batsia ma nibaseera Laishi, litaala liomulembe khandi eliabandu balio bali nibaholela. Baseera litaala yilio ma nibeera abandu bamwo. Bamala nibalisamba nomul'lo.

²⁸Siyaliho omundu wosi owakhabasool'le tawe, sichila Laishi liali ehale okhurula Sidoni, khandi abandu balio sibalikhwo nende esiabahamban'nangakhwo nabandu bandi tawe. Litaala yilio liali mwibanda elala nende Betsi Rehobu. Abandu bolwibulo lwa Dani bombokha litaala yilio obuhia ma nibamenyamwo.

²⁹Basukhania eliira lialio Laishi nibalilanga Dani, eliira eliali liakuka wabwe Dani, omusiani wa Yakobo.

³⁰Abandu ba Dani basinjisia esiniini sia Mika khulwokhusiekakaya, ma Yonatsani omusiani wa Gerishoni, omwitsukhulu wa Musa, niye owarumikha singa omwesaalisi khubolwibulo lwa Dani. Khandi abesilibwa sisie barumikha singa abesaalisi babwe okhwola olwabandu bafumilwa nibahilwa mubuhambe.

³¹Esiniini sia Mika siarumikhilwa munyinga tsiosi etsie Liheema lia Nyasaye yekayakayilwangamwo liali Shilo.