Read lunyore ABAKHALACHI 19 Bible Online

ABAKHALACHI 19 - lunyore bible

ABAKHALACHI 19

¹Mumatukhu yako, Isiraeli nesili okhuba nomuruchi, yaliho Omulawi owamenyanga ehale inyuma womubikulu bia Efuraimu. Yabukula omukhaana okhurula mwitaala lia Betselehemu musibala sia Yuda abe omukhasiwe omubiikha.

²Nebutswa omukhaana uyo yamala namusinyikhila, nakalukha munyumba ya samwana mu Betselehemu, ma namenyamwo emiesi chine.

³Ma omusaatsawe, nakhalaka okhutsia okhumwenda ma nateema okhumuhombelesia akalukhe khuye. Yatsia nomutiyi uwe halala netsipunda tsibili. Omukhaana uyo yenjisia Omulawi munyumba yasamwana, ne olwa samwana yamulola, yamwinjisia nobusangali.

⁴Samwana omukhasi uyo yahachia omulawi uyo mbu aratsia tawe, kho yamala nabayo khulwa amatukhu kataru. Babili yabo banyoolaho ebiokhulia biabwe khandi nibakonaho butukhu.

⁵Omukamba kwelitukhu liakhane babuukha khale ma niberechekha okhutsia. Nebutswa samwana omukhaana nabool'la Omulawi mbu, “Nyoole esiokhulia mbelio. Siitsa okhumumeeta tsingufu. Ma olunyuma mulatsia.”

⁶Kho abandu babili yabo bekhala hasi ma nibalia khandi nibanywa halala. Ma samwana omukhaana namubool'la mbu, “Noyanza kona hano ma wehulile obulahi.”

⁷Omulawi yabuukha niyenyanga atsie, nebutswa samwana omukhaana namuhachia abeeho, kho yamala nakonaho khandi obutukhu yibwo.

⁸Mukamba tsuli okwelitukhu liakharano olwa yenya okhurula, samwana omukhaana yamubool'la mbu, “Muliekhwo esindu, nimuyanza. Lindekhwo okhwola m'mubasu.” Kho abandu babili yabo nibalia halala.

⁹Olwomusaatsa uyo, nomukhasiwe omubiikha halala nomutiyiwe, benya okhurula khandi, samwana omukhasi uyo yababool'la mbu, “Lole, omukolooba kuli ahembi; bwakhabeye obulahi mube hano obutukhu bwosi. Isi yitsa okhumwama bwangu; kone hano ma mwesangasie bulahi. Mukamba munyala okhubuukha nikusili khale nimwerechekhelanga oluchendo lwenywe ma mutsie ingo.”

¹⁰Nebutswa omusaatsa siyayenya okhukonaho obutukhu bundi tawe, kho ye nende omukhasiwe omubiikha bachiaka okhutsia halala nomutiyi uwe nende etsipunda tsitsie tsibili nitsichinjile emisiko khumikongo chiachio. Ne boola habundu ahalangwanga mbu Yebusi eliira lia Yerusalemu lindi.

¹¹Ne olwa bali nibool'le Yebusi isi yali nemwamanga kho omutiyi uwe namusaaya namubool'la mbu, “Noyanza chenda khwebere ma khukone hano mwitookho lia Bayebusi yili.”

¹²Nebutswa omwamiwe namubool'la mbu, “Sikhutsia mwitookho liabandu abarali Abaisiraeli tawe. Khulatsilil'la okhwola Gibea.”

¹³Ma nabool'la omutiyi uwe mbu, “Chenda khwesunde hambeli hati ma khukone Gibea nohomba Rama.”

¹⁴Kho batsia nibabira Yebusi ma nibatsitsachil'la noluchendo lwabwe. Eliuba liali nilinjilanga olwa boola Gibea mulusoma lwolwibulo lwa Benjameni.

¹⁵Barula khumuhanda nibenyanga okhutsia okhukona Gibea. Batsia mwitookho ma nibekhala hasi ahabandu belitookho babukan'nanga, nebutswa siyaliho owali okhwehaana okhubahila ingo uwe okhubanyool'la ahokhukona obutukhu yibwo tawe.

¹⁶Olwa bali nibali habundu hokhubukan'na, omundu omusakhulu yabir'raho niyakhamala obutiyi bubwe bwelitukhu m'mukunda. Yali omundu owarula mubikulu bia Efuraimu, nebutswa luno yali namenyanga mu Gibea (Abandu bandi bomwitookho yilio bali abolwibulo lwa Benjameni.)

¹⁷Omundu omusakhulu uyo olwa yahenga omundu oli khuluchendo nali habandu babukan'nanga mwitookho, yamala namureeba mbu, “Orul'le hena ne otsitsanga hena?”

¹⁸Omulawi namukalusia namubool'la mbu, “Khwabeyenje mwitaala lia Betselehemu elili musibala sia Yuda, ne luno khutsitsanga ingo hakari musibala siomubikulu bia Efuraimu. Abulaho owokhukhuhelesia ahokhukona butukhu,

¹⁹kata nikali khuli nende ebiokhulia bietsipunda, obunyasi obwomu nende olusi khandi ndi nende omukaati nende ewaini khulwo omukhasi wanje omubiikha, nende ise mwene halala nomutiyi wanje. Khuli nende ebindu biosi, ne sibulaho esiakhutakhanga.”

²⁰Omusakhulu uyo naboola mbu, “Mwinjisibubwe hango wanje! Nzia okhumutenda; simukhoyele okhukona mumukitsi esioba tawe.”

²¹Kho yabahila ingo uwe ma nalisia etsipunda tsiabwe. Abacheni baabe besaaba ebilenje biabwe ma nibalia ebiokhulia.

²²Bali nibali mukhwesangasia ne nonoho abandu babi okhurula mwitaala nibetsa nibafumbila inyumba yabalimwo nibachaaka okhukhong'onda khumuliango. Nibabool'la omusakhulu uyo mbu, “Hinia esioba omusaatsa wamwitsile n'naye hango hano! Khwenyanga khukhole obuheyi n'naye!”

²³Nebutswa omusakhulu yarula esioba ma nababool'la mbu, “Tawe abalina banje; nimuyanza murakholakhwo esindu siesifwabwi singa yisi tawe! Omusaatsa uyu nomucheni wanje.

²⁴Lola! Omukhasi uwe omubiikha ngwoyu halala nomukhaana wanje mwene, osili nolukhaana. Nzia okhubaleera esioba luno, ma munyala okhubabukula. Mukhole n'nabo kosi akamwenya. Nebutswa murakholakhwo amang'ana amabi yako khumusaatsa uyu tawe!”

²⁵Nebutswa abasaatsa bene yabo basuula okhuhul'la amang'anake. Kho Omulawi yabukula omukhasiwe omubiikha ma namura esioba ahabali. Bamufumila nibamwononia ma nibamukhol'la akes'sinyo obutukhu bwosi ne sibamulekhakhwo tawe okhwola olwa bwasia.

²⁶Nibusietsanga omukhasi yetsa nakwa hamuliango kweinyumba yomusakhulu, omwomusaatsa uwe yali nali. Yali nasiliho olwa eliuba liarula.

²⁷Omusaatsawe yali okhubuukha omukamba yikwo, ma olwa yekula omuliango atsie, yanyoola omukhasiwe omubiikha nakon'ne hambeli weinyumba ne amakhono kaake nikahabasianga okhwola khumuliango.

²⁸Namubool'la mbu, “Sinjila. Chenda khutsie.” Nebutswa likalusio silialiho tawe. Kho nara omubili kukwe khupunda yiye ma nachaaka okhutsia ingo.

²⁹Olwa yoola, yatsia munyumba ma nabukule om'bano. Nabukula om'bili kwomukhasiwe omubiikha, nakukhalania mubitonye likhumi nab'bili nahila esitonye silala khubuli olwibulo khutsinzibulo likhumi natsibili tsia Isiraeli.

³⁰Siomundu wosi owakalola yaboola mbu, “Khusili okhuhulilakhwo akafwana yaka! Akafwana yaka kasili okhwekholekhakhwo okhurula Abaisiraeli nibarula Emisiri! Okhwola khukholekhwo esindu khumang'ana yaka! Siakhaba sina?”