Read lunyore ABAKHALACHI 2 Bible Online

ABAKHALACHI 2 - lunyore bible

ABAKHALACHI 2

¹Om'malaika wo MWAMI yatsia okhurula mwitookho lia Kilikali natsia mwitookho lia Bokimu ma nabool'la Abaisiraeli mbu, “Ndamuhinia Emisiri ma nimuleera musibala esiandasubisia ohuhelesia abakuka benywe. Ndaboola mbu, ‘Sindakhabule okhuhesia indakano yanje n'nenywe tawe.

²Murakhalombakhwo indakano yosi nabandu abamenyanga musibala yisi tawe. Okhwola musambul'le tsisambwa tsiabwe.’ Nebutswa musili okhukhola singa ndali okhumubool'la. Mwakhola butswa akandi akabukhan'ne!

³Kho mubool'langa tooto mbu sinakhunge abandu yaba okhurula musibala yimu olwa nenywe namube nimwinjilanga mwo tawe. Nababe abasuku benywe ne mwakhakaatwe nobwekayakayi bwabanyasaye babwe.”

⁴Olwom'malaika yali namal'le okhuboola yaka, abandu ba Isiraeli bosi bachiaka okhulakaya,

⁵ma nisio esifune esiachila habundu yaho nihalangwa mbu Bokimu. Habwene yaho nibahaana emisango khu MWAMI.

⁶Olwa Yoshwa yaseebula abandu ba Isiraeli, buli mundu yatsia okhwebukul'la omukabwa kukwe okweliloba.

⁷Oluhono lwa Yoshwa yali nali mwoyo, abandu ba Isiraeli barumikhila OMWAMI, khandi olwa yafwa batsilil'la okhukhola mbwo oluhono lwabemeli yabo abali nibelol'la abene amang'ana kosi amakali ako OMWAMI yali niyakhol'la Abaisiraeli bali nibasili mwoyo.

⁸Omurumikhili wo MWAMI Yoshwa omusiani wa Nuni yafwa nali nemihika emia ndala nende likhumi.

⁹Yali okhuyabilwa musitonye esieliloba lilie elili mwitookho lia Timunatsi Sera mubikulu bia Efuraimu ebili esinyolu wesikulu sia Kaashi.

¹⁰Abandu belisuba yilio bosi bafwa, ne abelisuba elialondakhwo bebil'la OMWAMI nende akayali niyakhol'la Abaisiraeli.

¹¹Ma Abaisiraeli bakhola tsimbi imbeli wo MWAMI ma nibachaaka okhurumikhila abanyasaye abalangwanga Ababaali.

¹²Balekha okhwekayakaya OMWAMI, Nyasaye wabakuka babwe, Nyasaye owabahinia Emisiri, ma nibachaaka okhwekayakaya abanyasaye bandi, abanyasaye babandu abamenyanga ahembi n'nabo. Bali okhubenamila ma nibachema OMWAMI lirima.

¹³Balekha okhwekayakaya OMWAMI ma nibarumikhila abanyasaye abalangwanga mbu Ababaali nende Abasitarete.

¹⁴Khulwako OMWAMI yahambila Abaisiraeli lirima likali ma nalekha abanuuli okhubaseera nende okhuyaaka emiandu chiabwe. Yalekha abasuku abababotokhana bosi okhubayombel'la mutsingufu, ne Abaisiraeli sibaali abanyala okhwesoola khandi tawe.

¹⁵Buli lwosi olwa batsitsanga mwihe, OMWAMI yali okhubasuula, singa butswa yali nabooye nakhole. Bali mubutinyu obukali.

¹⁶OMWAMI yahelesia Abaisiraeli abemeli ababahonianga okhurula khubasuku.

¹⁷Nebutswa Abaisiraeli sibalonda obwibaali bwabemeli babwe tawe. Abaisiraeli sibaali abasubilwa khu MWAMI tawe ma nibekayakaya abanyasaye bandi. Abasamwana balondanga amalako ko MWAMI, nebutswa abelisuba liyia yili sibakalonda khandi tawe.

¹⁸Buli olwo MWAMI yahelesianga Isiraeli omwemeli, OMWAMI yamukhonyanga ma ahonia abandu okhurula khubasuku babwe oluhono lwomwemeli tsana yalinji nasili mwoyo. OMWAMI yali netsimbabasi khubo sichila balinji okhubinda mukhutsunwa khwabwe nende mukhuminikha khwabwe.

¹⁹Nebutswa olwa mwemeli yafwitsanga, abandu bali nibanala okhukalukha mukhumenya mutsifwo tsiabwe tsiakhale nende okhukhola amabi okhuyomba abandu belisuba liabira. Barumikhila nende okhwekayakaya abanyasaye bandi, nende okhusuula okhulekha tsinjila tsiabwe tsimbi.

²⁰Ma kachila OMWAMI aba nelirima likali khu Baisiraeli nende okhuboola mbu, “Abelihanga yili basuuye indakano yanje eyandalaka abakuka babwe okhulonda. Ne sichila sibalondanga amalako kanje tawe,

²¹sindakhakhungekhwo lihanga liosi khumahanga akali nikasili musibala olwa Yoshwa yafwa tawe.

²²Ndakharumikhile amahanga yaka okhulola nikali Abaisiraeli yaba bakhalonda amang'ana kanje singa abakuka babwe bakhola nohomba tawe.”

²³Kho OMWAMI yahuchil'la amahanga yako okhumenya musibala yisio. Siyahelesia Yoshwa obulechi khuko tawe, kata siyakakhunga okhurula musibala yisio olwa Yoshwa yali namal'le okhufwa tawe.