Read lunyore ABAKHALACHI 20 Bible Online

ABAKHALACHI 20 - lunyore bible

ABAKHALACHI 20

¹Abaisiraeli bosi okhurula khu Dani elubeka lwesinyolu okhwola Berisheba khulubeka lwenandete, halala nende abali musibala sia Gileadi esili khulubeka lwebukwe bahuchil'la omulango kwokhutsia mwihe. Bebunjikha imbeli wo MWAMI singa omukanda mulala mwitaala lia Misipa.

²Abemeli bosi betsinzibulo tsia Isiraeli bali mumukhung'ano kwabandu ba Nyasaye yiku ne baliho abasikari etsielefu etsimia tsine abachendanga khubilenje.

³Munyinga yene iyio abandu bolwibulo lwa Benjameni bahul'la mbu Abaisiraeli bandi bosi bali nibebunjikhile ha Misipa. Abaisiraeli nibabareeba mbu, “Khubool'lekhwo amang'ana amabi yaka kekholekha mbwena?”

⁴Omulawi owomukhasiwe omubiikha yali niyeer'rwe nakalusia naboola mbu, “Omukhasi wanje omubiikha halala n'nase khwatsia Gibea mulusoma lwa Benjameni okhukonaho butukhu.

⁵Abandu ba Gibea betsa nibakhuseera ma nibafumbila inyumba yakhwalimwo obutukhu yibwo. Bachooma banzire; nebutswa bamala nibafumila omukhasi wanje omubiikha ma nibamwononia nibamukhol'la akes'sinyo obutukhu bwosi kho yamala nafwa.

⁶Ndabukula omubilikwe, ningukhalania mubitonye ma niruma esitonye silala khu siolwibulo khutsinzibulo likhumi natsibili tsia Abaisiraeli. Abandu yaba bakhola amang'ana amabi khandi akesifwabwi mwifwe.

⁷Inywe mwesi abali hano muli Abaisiraeli. Nisina esia khwakhakhola khumang'ana yaka?”

⁸Abandu bosi bali okhuhambana halala ma nibaboola mbu, “Abulakhwoho omundu mulala khu ifwe owanotsie ingo kata abe namenyanga munyumba nohomba mwiheema tawe.

⁹Yaka niko akanakhukhole; khwitsa okhukhupa imbulu eyitsa okhwela abokhuseera Gibea.

¹⁰Abandu abahela esitonye silala khwikhumi mu Isiraeli nabahaane ebiokhulia khubasikari, ne abandi nabatsie okhuhaana esinyasio khu Gibea khulwe esikhole esibi esiesifwabwi esia bakhol'le mu Isiraeli.”

¹¹Kho abandu bosi mu Isiraeli bebunjikha nibali nelichoomo elala eliokhuseera litaala yilio.

¹²Abetsinzibulo tsia Isiraeli baruma abarumwa mumbeka tsiosi mulusoma lwolwibulo lwa Benjameni okhuboola mbu, “Nimang'ana sina amabi yaka akamukhol'le?

¹³Luno haane abasaatsa babi yabo abali mu Gibea khube abanyala okhubeera ma khuhinie obubi yibu mu Isiraeli.” Nebutswa Ababenjameni sibahulila khuka Baisiraeli basiabwe baboolanga tawe.

¹⁴Okhurula mumatookho kosi ka Benjameni, abandu beetsa Gibea khulwo okhulwana nende abandu bandi ba Isiraeli.

¹⁵Ababenjameni balanga abasikari etsielefu amakhumi kabili natsisasaba okhurula mumatookho kabwe litukhu yilio okhumeeta khubasikari tsimia tsine natsitaru okhurula khu yabo abamenyanga Gibea.

¹⁶Khubasikari yabo bosi, khwalimwo nabasikari abaseletse tsimia tsine natsitaru abarumikhilanga emikhono emimosi. Buli mulala khubo yali nesaba okhulasa lichina liomukoye nachoomisie khuluchiikha l'lala olwe liswi sila okhubira tawe.

¹⁷Abetsinzibulo tsia Abaisiraeli bandi bosi babunjikha abandu abahela etsielefu tsimia tsine abamanya obulwani.

¹⁸Abaisiraeli batsia habundu hokhwekayakayila mu Betseli, ne habwene yaho bareeba Nyasaye mbu, “Nilwibulo sina olwitsa okhuranga okhuseera abandu ba Benjameni?” OMWAMI nakalusia mbu, “Abolwibulo lwa Yuda.”

¹⁹Kho Abaisiraeli nibachaaka okhutsia omukamba kwalondakhwo ma nibakhupa ekambi yabwe ahembi nelitookho lia Gibea.

²⁰Batsia nibaseera abasikari ba Benjameni, ma nibarechekha abasikari mubukono khulwo okhuseera litookho.

²¹Abasikari ba Benjameni beetsa nibarula mwitookho, ne litukhu nilisili okhuhwa bali nibamal'le okhwira abasikari ba Isiraeli etsielefu amakhumi kabili natsibili.

²²Nebutswa Abaisiraeli booma ikholo ma nibara abasikari babwe mubukono bwabwe obwa bali nibareywenjemwo litukhu liokhuranga.

²³Kho batsia habundu hokhwekayakayila ma nibalakayila OMWAMI okhwola mukolooba, ma nibareeba OMWAMI mbu, “Khutsie okhuseera Ababenjameni khandi noho?” OMWAMI nakalusia naboola mbu, “Yee, tsie mubaseere.”

²⁴Besunda okhulwana abasikari ba Benjameni olwakhabili.

²⁵Khandi abasikari ba Babenjameni barula esioba wa Gibea olwakhabili, ne olwene yilu bali okhwira abasikari ba Isiraeli etsielefu likhumi namunane abechibwa obulwani.

²⁶Khe Abaisiraeli bosi batsia okhwola Betseli ma nibekhuula. Bekhalayo imbeli wo MWAMI ne sibaliakhwo esindu tawe okhwola hamukolooba. Bahaana omusango kwobuhambani khandi nibahaana emisango echisambilwe emichima khu MWAMI.

²⁷Lisanduku lie Indakano liali Betseli mumatukhu kene yako, ne Fenihasi omusiani wa Eliasa omwitsukhulu wa Haruni niye owalilindanga amatukhu yako. Abandu nibareeba OMWAMI mbu, “Khurule khutsie okhulwana abaana befwe abolwibulo lwa Benjameni khandi, nohomba khulekhe?” OMWAMI nakalusia naboola mbu, “Tsie mulwane, mukamba namuhelesie tsingufu tsiokhubaleka.”

²⁸

²⁹Kho Abaisiraeli nibara abasikari balala okhwekonekha Gibea tsimbeka tsiosi.

³⁰Khe khwitukhu liakhataru bahila abasikari babwe okhulwana abasikari bomukanda kwa Benjameni. Bara abasikari babwe mubukono bwokhuseera Gibea, singa obwabali nibakhol'le olwokhuranga.

³¹Abasikari ba Benjameni barula esioba welitookho okhulwana. Abaisiraeli besunda inyuma okhubakhwesa besunde ehale okhurula mwitookho. Singa olwokhuranga, bachiaka okhwir'rakhwo Abaisiraeli musikuuri khumuhanda okutsitsanga Betseli nende okhutsitsanga Gibea. Bali okhwira Abaisiraeli abahela ahembi amakhumi kataru.

³²Abasikari bolwibulo lwa Benjameni nibaboola mbu, “Khubalekele butswa singa khwabaleka olwokhuranga.” Nebutswa Abaisiraeli bali nibaloosisie okhukalukha inyuma kho kachile Ababenjameni babalonde okhurula khwitookho okhutsia ehale khumihanda.

³³Olwa obwinji bwa basikari ba Isiraeli bakalukha inyuma ma nibebunjikha aha Baali Tamari, abandu bali nibekonekhele okhufumbila Gibea bachomokha okhurula mubukono bwabwe bwokhwebisa musibala siamachina ahembi nelitookho okhulwana Gibea.

³⁴Abandu abaseletse etsielefu likhumi, abachoomekhe okhurula mu Baisiraeli, baseera Gibea, ma obulwani nibuba obutinyu. Ababenjameni bali nibasili okhumanyilisia mbu bali ahembi okhumumwa.

³⁵OMWAMI yahelesia Isiraeli tsingufu tsiokhuleka Ababenjameni. Abaisiraeli beera abasuku etsielefu amakhumi kabili natsirano nende emia ndala litukhu yilio,

³⁶ma Ababenjameni nibamanya mbu balekelwe. Omukanda omukali kwabasikari ba Baisiraeli kwali nikukalukhile inyuma okhurula khu Babenjameni sichila Abaisiraeli bali nibareye obusubili khubandu ababali nibabareye okhwekonekha Gibea.

³⁷Abandu yaba belukha bwangu nibahengele Gibea; nibasalaana mwitookho mwosi ma nibeer'ramwo abandu bosi.

³⁸Omukanda omukali kwabasikari ba Baisiraeli nende abandu abali nibekonekhele bali nibahuchilisanisie khusimanyilo siokhuchiakia lihe. Olwa balola lilumbesi likali eliomwosi nilituumanga ikulu okhurula mwitookho,

³⁹nilwo olwa Abaisiraeli abali musikuuri siokhulwana bachiaka okhulwana. Munyinga iyi abasikari ba Benjameni bali nibamal'le okhwira Abaisiraeli amakhumi kataru. Baboola abene khubene mbu, “Yee, khumal'le okhubaleka butswa singa obwa khwabalekele olundi.”

⁴⁰Khe esimanyilo siokhuchiaka lihe nisilolekha; lilumbesi liomwosi nilichiaka okhutuuma ikulu okhurula mwitookho. Ababenjameni nibahenga inyuma wabarulanga ma nibalola litookho liosi liali ndihambile omul'lo.

⁴¹Abaisiraeli nibasukhana khubo, ma Ababenjameni nibaba nokhutechela okhukali sichila bamanya mbu bali butswa ahembi okhumumwa.

⁴²Bakalukha inyuma okhurula khu Baisiraeli ma nibelukha okhutsia musikuuri, nebutswa sibaali abanyala okhuhonokokha tawe. Bali okhutil'lwa hakari homukanda omukali kwabasikari abenji nende abasikari ba Baisiraeli abali nibetsanga okhurula mwitookho, ma nibakhuywa.

⁴³Abaisiraeli banyoola bahambile abasuku, ne sila okhubalekha babalondel'la okhwola ahembi khulubeka lwebukwe wa Gibea nibabeera olwa belukhanga.

⁴⁴Abasikari abalulu okhusila aba Benjameni abahela etsielefu likhumi nende munane beerwa.

⁴⁵Abandi basukhana ma nibelukha nibahenjele musikuuri khulwanda lwa Rimoni. Abandu etsielefu tsirano ber'rwa khumuhanda. Abaisiraeli batsilil'la butswa okhulondel'la abasikari okhwola Kitomu, nibeera etsielefu tsibili.

⁴⁶Abasikari ba Babenjameni etsielefu amakhumi kabili nende tsirano beerwa litukhu yilio bosi bali abasikari abalulu.

⁴⁷Nebutswa abandu etsimia tsisasaba bali okhwilukha okhutsia musikuuri khulwanda lwa Rimoni, ma nibamenyayo emiesi chine.

⁴⁸Abaisiraeli bakalukha khandi okhuseera Ababenjameni abali nibasikaye, ma nibabeera bosi, abasaatsa, abakhasi, abaana, halala nende emiruko. Basamba buli litaala musibala yimwo.