Read lunyore ABAKHALACHI 21 Bible Online

ABAKHALACHI 21 - lunyore bible

ABAKHALACHI 21

¹Olwa Abaisiraeli bali nibebunjikhele aha Misipa, bali okhwesuhila OMWAMI mbu, “Abulaho omundu khu ifwe owakhahuchil'le omusaatsa wosi okhurula mulwibulo lwa Benjameni okhuteesia omukhaana mwifwe.”

²Olwene yilwo abandu ba Isiraeli batsia Betseli ma nibekhalayo imbeli wa Nyasaye okhwola mukolooba. Nibekhuula obutinyu khandi obululu nibaboola mbu,

³“OMWAMI Nyasaye wa Isiraeli, busina yaka kekholekhele? Busina olwibulo lwa Benjameni luli ahembi okhukora okhurula mu Baisiraeli?”

⁴Mukamba tsuli okwelitukhu elialondakhwo abandu bombokhayo olusambwa, nibahaana omusango kwobuhambani khandi nibahaana emisango echisambilwe emichima.

⁵Nibareeba mbu, “Kulikhwoho omukanda kwosi okhurula mutsinzibulo tsiosi etsia Isiraeli okuratsiakhwo mukhwebunjikha imbeli wo MWAMI ha Misipa?” (Bali nibamal'le okhwesuha mbu omundu wosi oratsiakhwo Misipa yeerwe.)

⁶Abandu ba Isiraeli behul'la nibali nokhubeleela khulwa abaana babwe Ababenjameni ma nibaboola mbu, “Olwaleelo Isiraeli bamal'le okhukosia mulala khubetsinzibulo tsiabwe.

⁷Nakhukhole mbwena khulwa okhunyool'la abandu ba Benjameni abasikala abakhasi? Khwali okhwesuhila OMWAMI mbu sikhwakhabahelesiekhwo kata mulala khubakhaana befwe tawe.”

⁸Olwa bareeba nikaba kulikhwoho omukanda kundi okhurula mutsinzibulo tsia Isiraeli okuraatsia mwibukaana eliali Misipa, bamala nibanyoola mbu abulakhwoho omundu wosi owarula Yabeshi mu Gileadi.

⁹Olwa amera komukanda kwa basikari kalangwa kanyoolekha mbu omundu wosi okhurula Yabeshi siyakalusiakhwo tawe.

¹⁰Kho abomukhung'ano nibarumayo abandu babwe abalwenyukhu etsielefu likhumi natsibili nende amalako mbu, “Tsie mwire abandu bosi abali mu Yabeshi abakhasi, nende abaana nibalimwo.

¹¹Mwire abasaatsa bosi, halala nabuli mukhasi wosi orali nolukhaana.”

¹²Mubandu ba Yabeshi banyoolamwo ababuukha bakhaana abali nolukhaana etsimia tsine, kho babaleera mukambi eli Shilo, musibala sia Kanaani.

¹³Abomukanda kwosi baruma ling'ana khu Babenjameni abali nibali khulwanda lwa Rimoni mbu bahuchil'langa omulembe kubeho.

¹⁴Abandu bolwibulo lwa Benjameni bakalukha, ne Abaisiraeli nibabahelesia abakhaana okhurula Yabeshi aba baraali nibeera tawe. Nebutswa abakhaana yabo sibaliho abahela abasaatsa bosi tawe.

¹⁵Abandu behulila, nibabeeleye khulwa abandu bolwibulo lwa Benjameni sichila OMWAMI yali naleer're obwabukhani hakari hetsinzibulo tsia Isiraeli.

¹⁶Kho abemeli bomukhung'ano nibaboola mbu, “Sikhusili nabakhasi bandi mulwibulo lwa Benjameni tawe. Nakhukhole mbwena okhunyool'la abasaatsa basikaye abakhasi?

¹⁷Abaisiraeli sibakwan'ne okhukosiakhwo l'lala khubetsinzibulo tsiabwe likhumi natsibili tawe. Okhwola khurune injila yabolwibulo lwa Benjameni bahonokokhelamwo,

¹⁸nebutswa sikhunyala okhubahuchil'la bateesie abakhaana befwe tawe, sichila khwamala okhura esilaamo khumundu wosi khu ifwe owakhahuchil'la abolwibulo lwa Benjameni okhuteesia mulala khubakhaana befwe.”

¹⁹Khe bapaala mbu, “Lisabo lio MWAMI eliomuhika aha Silo liitsanga bwangu.” (Shilo lili esinyolu wa Betseli, enandete welitookho lia Lebona, khandi ebukwe womuhanda okuli hakari wa Betseli nende Shekemu).

²⁰Nibabool'la abolwibulo lwa Benjameni mbu, “Tsie ma mwebise mumikunda chiemisabibu

²¹ma mukoole. Olwa abakhaana ba Silo barula esioba okhwitsa okhusina olwe lisabo litsilil'langa, inywe murule mumikunda chiemisabibu. Buli mulala khwinywe abukule omukhasi netsingufu okhurula mubakhaana ma mukalukhe n'naye mulusoma lwa Benjameni.

²²Abasamwana nohomba abasiani babwe nibaba nibakhetsa khwinywe nibakayanga, munyala okhubabool'la mbu, ‘Nimuyanza lekhe khube n'nabo, sichila sikhwababukul'la mwihe okhurula khwinywe babe abakhasi befwe tawe. Ma olwa murabahaana khu ifwe, simulikhwo nesikha siokhufunaka esiesuho sienywe tawe?’ ”

²³Abolwibulo lwa Benjameni bakhola yaka; buli mulala khubo yeela omukhasi okhurula mubakhaana abali nibasinanga aha Shilo ma namukhwesa okhutsia n'naye. Khe bakalukha nibatsia mulusoma lwabwe, nibombokha amataala kabwe obuhia, ma nibamenyayo.

²⁴Munyinga yene iyo Abaisiraeli abasikala, batsia, ma siomundu nakalukhanga mulwibulo lulwe nende inyumbaye nende khubindubie biene.

²⁵Omuruchi siyaali mu Isiraeli olwene yilwo tawe. Siomundu yakholanga butswa obwayenyele.