Read lunyore ABAKHALACHI 4 Bible Online

ABAKHALACHI 4 - lunyore bible

ABAKHALACHI 4

¹Inyuma wokhufwa khwa Ehudi, abandu ba Isiraeli bali okhukhola tsimbi imbeli wo MWAMI.

²Kho OMWAMI yalekha nibalekwa nende Yabini, omuruchi wa Kanaani owaruchilanga mwitookho lia Hasori. Omwemeli wabasikari baabe yali Sisera, owamenyanga mwitookho lia Haroshetsi lia Betsinzibulo tsindi.

³Yabini yali namakaari kesibia akahela etsimia tsirano natsine, ma naruka Abaisiraeli mubululu nende okhubanyasia khulwemihika amakhumi kabili; kho Abaisiraeli balakayila MWAMI mbu abakhonye.

⁴Luno Debora, omukhasi wa Lapitotsi yalinji omuroobi ne khandi yakhalachilanga Abaisiraeli emise chiabwe mumatukhu kene yako.

⁵Yali niyanala okhwikhala hasi womusaala kundi okwamasindu hakari wa Rama nende Betseli musibala siomubikulu bia Efuraimu. Abaisiraeli batsitsanga habwene yaho khulwo okhuhul'la obukhalachibwe.

⁶Litukhu elala yarumania amang'ana khu Baraki omusiani wa Abinoamu okhurula mwitookho lia Kedeshi mulusoma lwa Nafutali ma namubool'la mbu, “OMWAMI Nyasaye wa Isiraeli ukhuhelesisie lilako yili: ‘Bukula abandu etsielefu likhumi okhurula mulwibulo lwa Nafutali nende Sabuloni ma obemel'le okhutsia khusikulu sia Tabori.

⁷Nandeere Sisera, omwemeli wabasikari ba Yabini okhulwana n'nawe hamuchela kwa Kishoni. Nabe nende amakaari nende abasikari, nebutswa ise nakhuhelesie tsingufu tsiokhumuleka.’ ”

⁸Ma Baraki nakalusia naboola mbu, “Nanzie nikakhaba mbu notsie n'nase, nebutswa nikaba sinotsie n'nase tawe, sindakhatsia tawe.”

⁹Debora nakalusia naboola mbu, “Kosi namalahi, nanzie n'nenywe, nebutswa sinonyoole oluyali lwosi olwobulechi tawe, sichila OMWAMI nahaane Sisera khumukhasi.” Kho Debora nasimukha okhutsia Kedeshi nende Baraki.

¹⁰Baraki nalanga abetsinzibulo tsia Sabuloni nende Nafutali okhutsia Kedeshi, ne abandu etsielefu likhumi nibamulonda. Khandi Debora yatsia n'naye.

¹¹Olwene yilwo Omukeni olangwanga Heberi yali nalekhele Abakeni bandi abolwibulo lwa Hobabu, omukhwe wa Musa, ma niyombokhele liheema lilie mumusaala omukhongo kwomuriba okuli Sananimu ahembi Kedeshi.

¹²Olwa Sisera yamanya mbu Baraki yali natsiye khusikulu sia Tabori,

¹³yalanjisia amakaari kaake kesibia akahela tsimia tsirano natsine nende abasikari baabe bosi, ma nabaruma okhurula mwitookho lia Haroshetsi lia Betsinzibulo tsindi okhutsia khumuchela kwa Kishoni.

¹⁴Ma Debora nabool'la Baraki mbu, “Tsia! OMWAMI akhwemel'langa! Olwaleelo umal'le okhukhuhelesia tsingufu okhuleka Sisera.” Kho Baraki naselenjera okhurula khusikulu sia Tabori nende abandu baabe etsielefu likhumi.

¹⁵Olwa Baraki yabaseera nende abasikari baabe, OMWAMI yaleera ingoyani hakari wa Sisera nende Abasikaribe bosi nibali namakaari kabwe. Sisera yeekha okhurula khwikaari lilie ma niyelukha nebilenje.

¹⁶Baraki yalondel'la amakaari yako nende abasikari baabe okhwola Haroshetsi lia Betsinzibulo tsindi, ma abasikari ba Sisera bosi nibeerwa. Abulaho kata omundu mulala owasikala.

¹⁷Sisera yelukha okhutsia mwiheema lia Yaeli, omukhasi Womukeni olangwanga Heberi, sichila omuruchi Yabini wa Hasori yali omulina wabeinyumba ya Heberi.

¹⁸Yaeli yarula natsia okhwakan'na Sisera ma namubool'la mbu, “Yinjila omwami; yinjila mwiheema lianje. Oraria tawe.” Kho yamala niyenjila, ma namubisa inyuma wepasia.

¹⁹Sisera namubool'la mbu, “Noyanza mbekhwo amaatsi kokhunywa; ndi nobuluho.” Yamala niyekula esimuka esilimwo amabeele, ma namuha anywe, ma khandi namubisa.

²⁰Khandi namubool'la mbu, “Sinjila hamuliangokwe Liheema, ne omundu niyakhetsa okhukhureeba nikali omundu undi wosi alikhwo hano, omubool'le abulaho.”

²¹Sisera yali nachonyele okhusila kho tsindoolo tsiamala nitsimuhila. Ma Yaeli nabukula inyundo nende esibambo sieliheema, natsia khuye kalaha, ma namwira. Yakhupa esibambo okhubir'ra muluseya lwomurwekwe okhwola m'maloba.

²²Olwa Baraki yetsa nakhaabanga Sisera, Yaeli yarula natsia okhumwakan'na ma namubool'la mbu, “Yitsa hano! Nzia okhukhumanyia omundu wokhaabanga.” Ma niyenjila n'naye, ne yaho Sisera yaliho hasi nafwiye, ne esibambo sieliheema nisibiriye m'murwekwe.

²³Litukhu yilio Nyasaye yahelesia Abaisiraeli tsingufu tsiokhuleka Yabini omuruchi wa Kanaani.

²⁴Bamulwana netsingufu okhwola olwa bamuleka.