Read lunyore ABAKHALACHI 5 Bible Online

ABAKHALACHI 5 - lunyore bible

ABAKHALACHI 5

¹Litukhu yilio Debora nende Baraki omusiani wa Abinoamu bemba olwembo yilu:

²OMWAMI yetsoomibwe! Abaisiraeli bali nesinani siokhulwana; abandu bali okhwehaana abene nobusangali.

³Hulile kano, inywe abaruchi! Reke amarwi, inywe abaami! Nanyembele OMWAMI, namwembele. Nanyembele OMWAMI, Nyasaye wa Isiraeli amayoosi amalahi.

⁴OMWAMI, olwa warula khusikulu sia Seiri, olwa warula musibala sia Edomu, esibala siarenga, ma ifula nekwa okhurula khwikulu. Yee, amaatsi kakwa hasi okhurula mumalumbesi.

⁵Ebikulu biatechela imbeli wo MWAMI wa Sinai, biatechela imbeli wo MWAMI, Nyasaye wa Isiraeli.

⁶Mumatukhu ka Shamakaari omusiani wa Anatsi, nende mumatukhu ka Yaeli, abandu sibatsitsanga tsinjendo, mumikanda tawe, ne siomundu owatsitanga oluchendo yalondanga tsinjila tsiomubulimo.

⁷Debora, amatookho mu Isiraeli kalekhwa likunda, kali butswa ameele okhwola olwe ibe wetsa, wetsa singa mama wa Isiraeli.

⁸Ma lihe nilibaho musibala, olwa Abaisiraeli bali okhwela abanyasaye abacheni. Khubandu etsielefu amakhumi kane abali mu Isiraeli, siyalikhwoho omundu wosi owali nesikhumba nohomba lifumo tawe?

⁹Omwoyo kwanje kuli halala nabemeli babasikari ba Baisiraeli, kuli neyabo abali okhwehaana abene nobusangali. OMWAMI yetsoomibwe!

¹⁰Mukaboole inywe abachendelanga khutsipunda tsindafu, nende inywe abekhalanga khutsipunda, khandi inywe abachendanga khumihanda.

¹¹Hulilisie! Emikanda chiyokanga habitaho, ne chiboolanga akobulechi bwo MWAMI, nende akobulechi bwabandu ba Isiraeli! Ma abandu bo MWAMI bachenda nibaselenjera okhurula mumatookho kabwe.

¹²Tsilil'la okhwemel'la abandu, Debora, tsilil'la okhwemel'la abandu! Tsilil'la okhubemel'la! Wembe olwembo! Otsilil'le okhubemel'la! Tsia imbeli, Baraki omusiani wa Abinoamu, ohile ababohe baabo mubuhambe!

¹³Ma abasubilwa nibetsa khubemeli babwe; abandu bo MWAMI betsa khuye niberechekhele okhulwana lihe.

¹⁴Barula Efuraimu nibatsia mwibanda, nibalondanga olwibulo lwa Benjameni nende abandu balwo. Abemeli babasikari beetsa okhurula Makiri, ne abasikari barula Sabuloni.

¹⁵Abemeli ba Isakari beetsa halala nende Debora; yee, Isakari yetsa khandi Baraki niyetsa, ma nibamulonda okhutsia mwibanda. Nebutswa abolwibulo lwa Rubeni bali okhwabukhana mumapaalo, sibali abanyala okhwahula nikali bakhetsa, nohomba bakhabula okhwitsa tawe.

¹⁶Busina nibasikala inyuma nende amakondi? Mbu bahul'le abaayi nibalanganga ebiayo? Yee, abolwibulo lwa Rubeni bali okhwabukhana mumapaalo; sibaali abanyala okhwahula nikali bakhetsa, nohomba bakhabula okhwitsa tawe.

¹⁷Abolwibulo lwa Kadi basikala ebukwe womuchela kwa Yorodani, ne abolwibulo lwa Dani bali hatsimeeli. Abolwibulo lwa Asheri basikala haluchinga lwe inyanza; sibarulaho tawe.

¹⁸Nebutswa abandu ba Sabuloni nende Nafutali bara obulamu bwabwe musibi musikuuri sielihe.

¹⁹Hetookho lia Taanaki, ahembi nende omuchela kwa Mekito, abaruchi betsa ma nibalwana. Abaruchi ba Kanaani balwana, nebutswa sibabukula efetsa tawe.

²⁰Tsinyininyini tsialwan'nanga khwikulu; olwa tsiali nitsikhalanianga likulu, tsialwananga Sisera.

²¹Ma Omukhula okwamaatsi ka Kishoni kwabakhwesa nikubahila; omuchela kwa Kishoni okwali nikwitsuye. Nanjende, ninzia netsingufu!

²²Ma etsisululi tsietsa nitsiilukhanga, nitsituya tsimbakayu tsiatsio hasi.

²³Ma Om'malaika wo MWAMI naboola mbu, “Lake Merosi esilaamo siobubi, lake esilaamo khuyabo abamenyangayo. Sibayitsa okhukhonya OMWAMI tawe, sibayitsa singa abasikari okhulwan'na OMWAMI tawe!”

²⁴Omukhasi omunakhabi okhusila khubakhasi bosi ni Yaeli, omukhasi wa Heberi Omukeni, niye omukhasi omunakhabi okhusila khubakhasi abamenyanga mumaheema.

²⁵Sisera yasaba amaatsi, nebutswa yamuhelesia amabeele; yamuler'ra amabeele khulutaabo ol'lahi.

²⁶Yabukula esibambo sieliheema mumukhono mulala. Inyundo yomukholi m'mukhono kundi; yakhupa Sisera ma natubula esihanga sisie. Yafumira Sisera m'murwe putu.

²⁷Sisera yenama m'makuluke omwene, nakwa hasi ma nakona masilisi habilenje bia Yaeli. Habilenje bia Yaeli, Sisera yenama ma nakwa; yakwa hasi ma nafwa.

²⁸Nyina Sisera yahenjel'la mwitilisa; nakool'la musianzwi nalanjisia nareeba mbu, “Busina likarilie lietsisululi lichelebele okhwitsa? Busina etsisululi tsitsie tsiali okhuchenda kalaha mukhwitsa?”

²⁹Abakhaye baabe abachesi okhusila nibamukalusia, naye niyebool'la hali akhenji mbu,

³⁰“Bakhabilisianga butswa ebindu biokhuyaaka ma bakabulane, omukhaana mulala nohomba babili khubuli musikari, tsingubo tsiobukusi khulwa Sisera, ebitonye biebitambaya ebianabilwakhwo amahuwa, khulwo khubikhwa mwikosi liomukhaye womuruchi.”

³¹Lekha abasuku baabo bosi bafwile munjila y'yo, E OMWAMI! Nebutswa abalina baabo baakhe singa eliuba liakhanga mumabwebwe! Ma esibala nisiba nomulembe khulwemihika amakhumi kane.