Read lunyore ABAKHALACHI 6 Bible Online

ABAKHALACHI 6 - lunyore bible

ABAKHALACHI 6

¹Khandi Abaisiraeli bali okhukhola tsimbi imbeli wo MWAMI. Kho OMWAMI yalekha Abaamidiani nibabaruka khulwemihika chine nachitaru.

²Abaamidiani bali abakufu okhuyomba Abaisiraeli, kho Abaisiraeli bebisa mutsinyanga nende habundu handi hokhwebisa mubikulu.

³Buli lwosi olwa Baisiraeli barakanga imwo, Abaamidiani betsanga nende Abaamaleki nende abandu okhurula ebukwe okhuseera esibala siabwe.

⁴Bombokhanga amaheema mumikunda chiabwe nende okhwononia ebiraakwa biabwe okhwola khwitookho lia Gasa elili enandete. Babukulanga amakondi kosi, netsing'ombe, nende etsipunda nibaralekhakhwo esindu siosi esia Baisiraeli banyala okhurumikhila tawe.

⁵Beetsanga nende tsing'ombe tsiabwe nende amaheema, ne bali abenji singa tsisiche. Bo nende tsingamia tsiabwe bali abenji abaranyala okhubalwa tawe. Beetsa okhwononia biosi ebili musibala,

⁶ne Abaisiraeli sibaali abanyala okhwesoola okhurula khubo tawe.

⁷Abaisiraeli nibalakayila OMWAMI nibenyanga mbu abakhonye okhurula khu Bamidiani.

⁸Kho OMWAMI yaruma omuroobi okhubabool'la amang'ana yaka mbu: “Ndali okhumuhinia mubusumba Emisiri.

⁹Ndali okhumusoola okhurula khu Bamisiri nende okhurula khubandu abali okhumulwana hano musibala yisi. Ndabakhunga musibala olwa nenywe mwali nimwinjilangamwo; ma nimuhelesia esibala siabwe.

¹⁰Ndali okhumubool'la mbu ndi OMWAMI Nyasaye wenywe khandi mbu murekayakayakhwo abanyasaye Babaamori abamumenyele musibala siabwe tawe. Nebutswa inywe simwaimbulila tawe.”

¹¹Om'malaika wo MWAMI yeetsa mwitaala lia Ofira ma niyekhala hasi mus'sina siomusaala kwomuruba okwomundu olangwanga Yoashi, omundu wesilibwa sia Abieseri. Omusianiwe Gideoni yali nakhuyilanga ingano musinu, mubwebisu mbu Abaamidiani baramulola tawe.

¹²Om'malaika wo MWAMI yalolekha khuye namubool'la mbu, “OMWAMI ali n'nawe, ibe omundu weikholo khandi omukufu!”

¹³Gideoni nabool'la om'malaika mbu, “Omwami, khureebe, busina yaka kosi kakhekholekha khu ifwe nikali OMWAMI ali n'nefwe? Ne ebindu ebiokhuchenyia biosi ebia abapapa befwe bakhubool'la OMWAMI yakholanga, bili hena singa obwa yabahinia Emisiri? OMWAMI wakhwebala ma wakhulekhela Abaamidiani okhukhukhol'la akabenyele.”

¹⁴Ma OMWAMI namulaka naboola mbu, “Tsia orumikhile tsingufu tsitsio tsiosi ma osoole Isiraeli okhurula khu Bamidiani. Ise omwene nise okhurumanga.”

¹⁵Gideoni nakalusia naboola mbu, “Nebutswa ndakhasoola mbwena Isiraeli? Esilibwa sianje nisio esitekhele okhusila mulwibulo lwa Manase, ne ise ndi omundu omuti okhusila mubeinyumba yefwe.”

¹⁶OMWAMI namukalusia naboola mbu, “Onyala okhukakhola sichila nakhukhonye. Ibe nomulule Abaamidiani bosi butoro butswa singa wakhamuluye omundu mulala.”

¹⁷Gideoni nakalusia naboola mbu, “Nimba nikhusangasisie mutsimoni tsitsio, mbelesia esindu siokhumanyia mbu, niwe OMWAMI tooto.

¹⁸Noyanza oratsia tawe okhwola olwa khuleer'ra omusango kwesiokhulia.” OMWAMI naboola mbu, “Nzia okhuba hano okhwola olwa witsa okhukalukha.”

¹⁹Ma Gideoni natsia munyumbaye nateekha esimeme sieimbusi ma narumikhila etsikilo likhumi etsiobusie okhulomba omukaati okubulamwo amamela. Nara inyama musimwelo nende omunyu khulutaabo, nabileera khum'malaika wo MWAMI mus'sina siomusaala ma nabihaana khuye.

²⁰Om'malaika namulaka, namubool'la mbu, “Ra inyama nende omukaati khwichina yili, ma otsukhekhwo omunyu.” Gideoni nakhola mbwo.

²¹Ma om'malaika wo MWAMI natisia esitakho sieindabusi eyayali nali n'nayo khunyama nende omukaati. Omul'lo kwarula mwichina ma nikusamba inyama nende omukaati. Ma om'malaika nakhama okhurula habwene yaho.

²²Nilwo olwa Gideoni yamanyilisia mbu yaali om'malaika wo MWAMI owalol'le, ma naboola mukhuchenya mbu, “OMWAMI Nyasaye! Ndol'le om'malaikawo moni namoni!”

²³OMWAMI namubool'la mbu, “Lema omwoyo. Oraria tawe sichila sinofwe tawe.”

²⁴Gideoni niyombokhela OMWAMI olusambwa nalukulikha eliira mbu “OMWAMI Nomulembe.” (Lusilinji butswa mwitaala lia Ofira okhwola leelo, elibetsanga, liabesilibwa sia Abieseri)

²⁵Obutukhu yibwo OMWAMI yabool'la Gideoni mbu, “Bukula echulukhi ya papa uwo, nende echulukhi yindi yakhabili eyemihika chine nachitaru ma, osambule olusambwa lwa papa uwo yalombela Baali, khandi okhalake emisaala chiesifwanani siomunyasaye Ashera etsili ahembi nolusambwa tsana.

²⁶Wombokhele OMWAMI Nyasaye uwo olusambwa olwalombwa bulahi ikulu wahabundu ahechingu yaho. Ma obukule echulukhi tsana, ochisambe nechiman'ne singa omusango kwokhusambwa, norumikhilanga tsikhwi tsiesifwanani sia Ashera esioremachile nisikwa hasi.”

²⁷Ma Gideoni nabukula abarumikhili baabe likhumi ma nakhola singa OMWAMI yali namubooleye. Yali okhuria abeinyumba yabwe nende abandu bomwitaala; kho siyaali onyala okhukhola akene yako m'basu tawe kho yakakhola butukhu.

²⁸Olwabandu bomwitaala babuukha mumabwebwe litukhu lialondakhwo, banyoola mbu olusambwa lwa Baali nende esifwanani sia Ashera biali nibiremachilwe nibikwiye, ma khandi echulukhi yakhabili yali nehan'nwe singa omusango khulusambwa oluhia olwali nilwombokhelwe.

²⁹Nibareebana abene khubene mbu, “Niwina okhol'le yaka?” Bamala nibareebelesia ma nibanyoola mbu Gideoni omusiani wa Yoashi niye owali nakhol'le mbwo.

³⁰Ma nibabool'la Yoashi mbu, “Leera Omusiani uwo esioba yino, khe khube abanyala okhumwira! Usambuuye olusambwa lwa Baali ma khandi uremachile esifwanani sia Ashera esibetsanga ahembi n'nalwo.”

³¹Nebutswa Yoashi yareeba bosi abali okhumwinjil'la mbu, “Inywe mukobokhelanga Baali? Mumusoolanga noho? Omundu wosi oumukobokhelanga yetsa okhwirwa nibusili okhusia. Nikali Baali ninyasaye, lekhe omwene yesoole, sichila olusambwa lulwe nilwo olwali okhusambul'lwa.”

³²Okhurula olwene yilwo Gideoni yakulikhwa mbu Yerubaali, sichila Yoashi yaboola mbu, “Lekhe Baali yesoole omwene, sichila olusambwa lulwe nilwo olusambuywe.”

³³Ma Abaamidiani bosi, Abaamaleki, nende abetsinzibulo tsiebukwe tsiosi bebunjikha injelekha womuchela kwa Yorodani, ma nibakhupa ekambi yamaheema kabwe mwibanda lia Yesereli.

³⁴Omwoyo wo MWAMI yemel'la Gideoni, ma nakhupa olwika okhulanga abandu besilibwa sia Abieseri bamulonde.

³⁵Yaruma abarumwa mutsisoma tsiosi etsiebitonye bia Manase okhubalanga bamulonde. Khandi yaruma abarumwa khubetsinzibulo tsia Asheri, Sabuloni nende Nafutali ma abetsinzibulo yitsio nibeetsa okhumwakanila.

³⁶Ma Gideoni nabool'la Nyasaye mbu, “Oboolanga mbu unzel'le khulwo okhusoola Isiraeli.

³⁷Nobulahi, retsanga obwoya hasi ahakhukhuyilanga ingano. Nikakhaba mukamba lime nalibe niliamile khubwoya bwonyene ne sinalibe niliamile hasi tawe, khe namanye mbu witsa okhuurumikhila okhusoola Isiraeli.”

³⁸Yako niko akali butswa okhwekhola. Olwa Gideoni yabuukha mukamba khale, nakhama obwoya ne nanyoolamwo lime elinyala okhwitsusia olusalilo namaatsi.

³⁹Ma Gideoni nabool'la Nyasaye mbu, “Oraasinyikhila tawe; lekha khureebekhwo lireebo elala lionyene. Noyanza lekha ndeeme esikhole sindi silala nirumikhilanga obwoya. Luno lekha obwoya bwome, ne hasi hatsinzibe.”

⁴⁰Obutukhu bwene yibwo Nyasaye yakhola akene yako. Omukamba kwalondakhwo obwoya bwali obwomu ne hasi nihatsinziba khulwe lime.