Read lunyore ABAKHALACHI 7 Bible Online

ABAKHALACHI 7 - lunyore bible

ABAKHALACHI 7

¹Litukhu elala Gideoni nende abandu baabe babuukha nikusili khale ma nibakhupa ekambi yabwe khuluchinga lwomuchela kwa Harodi. Ekambi ya Bamidiani yali khulubeka lwesinyolu wekambi yabwe, mwibanda elili ahembi nesikulu sia More.

²OMWAMI nabool'la Gideoni mbu, “Abandu boli n'nabo nabenji okhusila abe ise ranyala okhuhelesia tsingufu tsiokhuleka Abaamidiani. Betsa okhupaala mbu banyooye obulechi khubwabwe, ma kachile babule okhumbelesia oluyali.

³Bool'la abandu mbu, ‘Omundu wosi oli noburi akalukhe ingo, ne ifwe khusikale hano hasikulu sia Gileadi.’ ” Kho abandu etsielefu amakhumi kabili natsibili bakalukha ingo, nebutswa etsielefu likhumi bali okhusikala.

⁴Ma OMWAMI nabool'la Gideoni mbu, “Osili butswa nabandu abenji okhusila. Babukule obahile m'mwalo khumaatsi, ne nzia okhukhwahul'layo abandu. Nimba nikhubool'la omundu uyu akhoya okhutsia n'nawe, alatsia. Nimba nikhubool'la omundu uyu aratsia n'nawe, sinatsie tawe.”

⁵Gideoni nabukula abandu nabahila m'mwalo khumaatsi, ma OMWAMI namubool'la mbu, “Wabukhanie siomundu oukamul'langa amaatsi nol'limi lulwe singa imbwa, okhurula khusiomundu ousikamanga hasi namasikamo kaake nanywa amaatsi.”

⁶Baliho abandu etsimia tsitaru ababukul'la amaatsi khumakhono kabwe nibakamul'la okhukanywa. Abandi bosi basikama hasi namasikamo kabwe okhukanywa.

⁷OMWAMI yabool'la Gideoni mbu, “Nakhusoole khandi nakhuhelesie tsingufu tsiokhuleka Abaamidiani khulwabandu tsimia tsitaru abakamuliye amaatsi. Bool'la abandi bosi batsie ingo.”

⁸Kho Gideoni naruma Abaisiraeli bosi ingo, nibarali abandu etsimia tsitaru, abali nibabiikha ebiakhulia nende tsinzika. Ekambi ya Bamidiani yali emwalo mwibanda.

⁹Obutukhu yibwo OMWAMI yalaka Gideoni namubool'la mbu, “Buukha oseere ekambi yabasuku; nzia okhukhuhelesia tsingufu okhuchileka.

¹⁰Nebutswa noba noriye okhuseera, tsia khukambi yabasuku nende omurumikhili uwo olangwanga Pura.

¹¹Witsa okhuhulila akababoolanga ma nilwo olwa witsa okhuba neikholo okhubaseera.” Khe Gideoni nende omurumikhili uwe batsia khundulo khwekambi yabasuku.

¹²Abaamidiani, Abaamaleki, nende abandu betsinzibulo tsiebukwe bali nibasalan'ne mulubanda singa omusinga kwetsisiche, ne bali nende tsingamia tsinyinji singa omuyekhe okuli khundulo khweinyanza.

¹³Olwa Gideoni yoola aha bali, yahulila omundu nabool'langa omulina aka yali naloor're. Yali naboolanga mbu, “Ndali okhuloora mbu omukaati kweshayiri kukongomele nikwitsa mukambi yefwe ma nikutuya liheema. Liheema limal'le nilikwa ma nilipaama hasi.”

¹⁴Omulina womundu tsana yakalusia naboola mbu, “Yilwo nolukanga lwo Muisiraeli, olangwa Gideoni omusiani wa Yoashi! Sikamanyiakhwo esindu sindi siosi tawe! Nyasaye umal'le okhumuhelesia tsingufu tsiokhuleka Abaamidiani nende abasikari befwe bosi.”

¹⁵Olwa Gideoni yahulila akelilooro liomundu uyo nende esia liboolanga, yakhupa amasikamo kaake hasi niyekayakaya Nyasaye. Ma yamala nakalukha mukambi ya Isiraeli nababool'la mbu, “Buukhe! OMWAMI umuheye tsingufu tsiokhuleka abasikari ba Midiani!”

¹⁶Yakabula abandu baabe etsimia tsitaru mumikanda chitaru ma nahelesia siomundu olwika nende isongo elimwo etochi.

¹⁷Nababool'la mbu, “Olwa nanzole khundulo khwekambi, namumenge, ma namukhole akanakhole.

¹⁸Olwomukanda kwanje halala n'nase nakhukhupe tsinzika, kho nenywe abafumbiye ekambi namukhupe tsinzika tsienywe mwesi nende okhuhanzukha nimuboola mbu, ‘Khulwa OMWAMI khandi khulwa Gideoni!’ ”

¹⁹Gideoni nende abandu baabe emia ndala boola khundulo wekambi obutukhu nibuli ahembi okhwola hakari, olwa abalindi babutukhu bali nibakhongulana. Ma nibakhupa tsinzika, ne nibaraka tsisongo etsia bali nibatiil'le.

²⁰Khandi emikanda chindi chibili nichikhola mbwo. Bosi nibachinga etsitochi nemikhono chiabwe em'mosi, ne tsinzika nemikhono chiabwe emilunji, ma nibalanjisia nibaboola mbu, “Olukanga lwo MWAMI nende olwa Gideoni!”

²¹Siomundu yasinjila mubukono bubwe okhufumbila ekambi, ma abasikari babasuku bosi nibelukha nibakhupanga olukhu.

²²Olwabandu ba Gideoni bali nibasikhupanga tsinzika tsiabwe, OMWAMI yalekha abasikari babasuku okhulwana abene khubene netsinganga tsiabwe. Belukha nibahengele Saretsani nibatsia okhwola Betsi Shita, khandi okhwola mwitaala lia Abeli Mehola ahembi nende Tabatsi.

²³Ma abandu okhurula mutsinzibulo tsianga Nafutali, Asheri, nende abolwibulo lwa Manase bosi bali okhulangwa, ma nibalondel'la Abaamidiani.

²⁴Gideoni yaruma abarumwa okhubir'ra mubikulu bia Efuraimu okhuboola mbu, “Yitse mulwane Abaamidiani. Mulinde omuchela kwa Yorodani nende oruchela rwosi okhutsia okhwola Betsibara, mwikal'le Abaamidiani barachikhalania tawe.” Abandu ba Efuraimu balangwa bebunjikha halala, ma nabo nibalinda omuchela kwa Yorodani nende oruchela rutsitsanga okhwola Betsibara.

²⁵Bafumila abaami babili aba Bamidiani mbu, Orebu nende Seebu. Beer'ra Orebu habundu halangwa Olwanda lwa Orebu, ne Seebu habundu ahokhukhamilwa ewaini ya Seebu. Batsilil'la okhulondel'la Abaamidiani ma nibaleera omurwe kwa Orebu nende okwa Seebu khu Gideoni, owali nali ebukwe womuchela kwa Yorodani.