Read lunyore ABAKHALACHI 8 Bible Online

ABAKHALACHI 8 - lunyore bible

ABAKHALACHI 8

¹Abaefuraimu bareeba Gideoni nibaboola mbu, “Busina orakhulanjile olwotsiye okhulwana Abaamidiani? Busina okhukholeye yaka?” Bali nende okhwekaana okhululu khulwa akene yako.

²Nebutswa Gideoni nababool'la mbu, “Akandali okhunyal'lwa okhukhola sikahela nende akamukhol'le tawe. Kata amatititi akeinywe Abaefuraimu mukhol'le kayombele akesilibwa sianje siosi sikhol'le.

³Ne kata mbwo, khulwobunyali bwa Nyasaye mwir're abaami ba Midiani babili Orebu nende Seebu. Nisina esie ise khol'le esiakhahelana nende akene yaka?” Olwa yaboola yaka, sibamala batsilil'le okhuba nelirima tawe.

⁴Olwene yilwo Gideoni nende abandu baabe tsimia tsitaru bali nibetsele khumuchela kwa Yorodani ma bali nibamal'le okhwambukha. Bali nibachonyele, nebutswa bali nibasitaabia abasuku.

⁵Olwaboola Sukotsi, Gideoni yamala nabool'la abandu bomwitaala yimwo mbu, “Nimuyanza helesie abandu banje emikaati. Bachonyele, ne nase ndabianga Seba nende Salimuna abaruchi ba Midiani.”

⁶Nebutswa abemeli ba Sukotsi nibaboola mbu, “Busina khuhelesie abasikari baabo esiokhulia? Osili okhufumila Seba nende Salimuna tawe.”

⁷Kho Gideoni naboola mbu, “Nobulahi! Olwo MWAMI nabe nareye Seba nende Salimuna mumakhono kanje, namukhupe nebisisia nende amarakalu okhurula musitsiimi!”

⁸Gideoni yatsilil'la noluchendo ma niyoola Penueli khandi nasaba abandu baho emikaati, nebutswa abandu ba Penueli bamukalusia singa obwabandu ba Sukotsi bali nibamukalusisie.

⁹Kho yababool'la mbu, “Nangalukhe nindi omulamu khandi omwitsulu, ne olwa nangalukhe nandikul'le omunaara kwenywe!”

¹⁰Seba nende Salimuna bali mwitookho lia Karikori nende abasikari babwe. Khubasikari bosi bokhulwana abarula ebukwe, abasikari etsielefu likhumi natsirano bonyene nibo abali okhusikala; abasikari etsielefu emia ndala nende amakhumi kabili bali nibamal'le okhwirwa.

¹¹Gideoni yalonda khumuhanda okwabir'ranga khundulo khwesitsiimi, ebukwe wa Noba nende Yokibeha, ma naseera abasuku bungoyingoyi.

¹²Abaruchi babili ba Midiani, Seba nende Salimuna, nibelukha, nebutswa yabalondel'la ma nabafumila, ma naleera ingoyani mubasikari babwe bosi.

¹³Olwa Gideoni yali nachelelanga okhurula mubulwani nalondanga khunjila ya Heresi,

¹⁴yafumila omusiani omubuukha okhurula Sukotsi namureebelesia amang'ana. Omusiani omubuukha uyo yamuhandichila amera kabemeli ba Sukotsi abahela amakhumi kane nakataru.

¹⁵Kho Gideoni natsia khubandu ba Sukotsi naboola mbu, “Mwitsul'langa olwa mwasuula okhuukhonya? Mwaboola mbu, simwali abanyala okhuhaanakhwo esiokhulia siosi khubasikari banje abali nibachonyele tawe sichila ndali nisili okhufumila Seba nende Salimuna. Khe! Mbabano!”

¹⁶Yamala nabukula ebisisia nende amarakalu okhurula musitsiimi natiabila abemeli ba Sukotsi.

¹⁷Khandi nalikul'la omunaara kwa Penueli ma niyeera abandu bomwitookho yilio.

¹⁸Ma Gideoni nareeba Seba nende Salimuna mbu, “Abandu bamwera Tabori bali bambila sina?” Nibakalusia nibaboola mbu, “Bafwanana butswa n'nawe; buli mulala khubo yafwananga omwana womuruchi.”

¹⁹Gideoni nababool'la mbu, “Bo nabaana befwe, abaana ba mama wanje mwene. Ndesuhanga mbu mulaba muraber're, khane sindakhamwira tawe.”

²⁰Ma nabool'la omusiani uwe omukhulundu olangwanga Yetseri mbu, “Tsia obeere!” Nebutswa omusianiwe siyahinia olukangalwe tawe. Yali okhuria, sichila yali nasili butswa omwana omuti.

²¹Ma Seba nende Salimuna nibamubool'la mbu, “Yitsa, okhwire omwene. Omundu musaatsa niye okholanga omulimo kwes'saatsa.” Kho Gideoni yabeera ma nabukula ebimili biabwe ebiali nibili mumakosi ketsingamia tsiabwe.

²²Olunyuma weyaka Abaisiraeli babool'la Gideoni mbu, “Obe omuruchi wefwe, ibe, omusiani uwo, nende omwitsukhulu uwo sichila ukhusool'le okhurula khu Bamidiani.”

²³Gideoni nakalusia nababool'la mbu, “Sindakhaba omuruchi wenywe tawe, kata omwana wanje siyakhaba omuruchi wenywe tawe. OMWAMI nabe omuruchi wenywe.”

²⁴Nebutswa yatsilil'la okhuboola mbu, “Lekhe mureebekhwo esindu silala. Buli mundu khwinywe yambe tsingaka tsiomubirwi etsia yabukula.” (Abaamidiani, singa abandu bandi abomusitsiimi, bebiikhanga tsingaka tsiefetsa mubirwi biabwe.)

²⁵Abandu nibakalusia nibaboola mbu, “Khuyanzile okhukhuhelesia.” Bamala nibabambula ingubo, ma siomundu naretsangakhwo tsingaka tsiomubirwi etsia yali niyabukula.

²⁶Tsingaka tsiomubirwi etsietsahabu etsia Gideoni yanyoola tsiali nobusiro obuhela ahembi etsikilo amakhumi kabili, norareyekhwo ebimili, eminyol'lo tsiomwikosi, nende tsingubo tsisembe tsiabaruchi ba Midiani bebiikhanga, kata nende tsikhoba etsialinji mumakosi ketsingamia tsiabwe.

²⁷Gideoni yalomba esiniini okhurula khutsahabu ma nasira hango hahe mwitaala lia Ofira. Abaisiraeli bosi balekha Nyasaye ma nibatsiayo okhwekayakaya esiniini yisio. Kwali omubero khu Gideoni nende abeinyumbaye.

²⁸Kho abandu ba Midiani balekwa nende Abaisiraeli ne sibatsilil'la okhuriisia Isiraeli tawe. Esibala siali nomulembe khulwemihika amakhumi kane, okhwola olwa Gideoni yafwa.

²⁹Gideoni yakalukha hango hahe omwene ma namenyaho.

³⁰Yali nabasiani amakhumi kane nakataru, sichila yali nabakhasi abenji.

³¹Khandi yali nende omukhasi omubiikha okhurula Shekemu; yamwibul'la omwana omusiani namukulikha Abimeleki.

³²Gideoni omusiani wa Yoashi yafwa nali mumihika chiobusakhulubwe ne yayabilwa musilindwa sia samwanawe Yoashi mu Ofira, litaala liesilibwa sia Abieseri.

³³Inyuma wokhufwa khwa Gideoni, abandu ba Isiraeli khandi bamala nibabula okhuba abasubilwa khu Nyasaye ma nibekayakayanga ebiniini bia Baali. Balomba Baali Beritsi[1] okhuba nyasaye wabwe,

³⁴ma sibatsilil'la okhurumikhila OMWAMI Nyasaye wabwe owali okhubasoola okhurula khubasuku babwe bosi abababotokhana tawe.

³⁵Sibalikhwo noluyali khubeinyumba ya Gideoni khubulahi bwosi obwa yakhol'la Isiraeli tawe.