Read lunyore ABAKHALACHI 9 Bible Online

ABAKHALACHI 9 - lunyore bible

ABAKHALACHI 9

¹Abimeleki omusiani wa Gideoni yatsia mwitaala lia Shekemu, owabekho banyina bosi bamenyanga, ma nababool'la

²bareeba abandu ba Shekemu mbu, “Mwakhayanzakhwo elili hena? Okhurukwa nabasiani ba Gideoni bosi amakhumi kane nakataru nohomba nomundu mulala butswa? Mwitsul'le mbu Abimeleki nomundu welikumba lienywe khandi owamatsahi kenywe.”

³Abekho banyina Abimeleki babool'la abandu ba Shekemu amang'ana kene yako, ma abandu ba Shekemu nibahula okhulonda Abimeleki sichila yali omwikho wabwe.

⁴Bamuhelesia ebitonye amakhumi kane nakataru bietsahabu okhurula muhekalu ya Baali Beritsi, ne yarumikhila amapesa yako okhukombola omukanda kwabandu babi khulwokhutsia n'nakwo.

⁵Yamala natsia hango wa samwana nyene mwitaala lia Ofira, ne habwene yaho yeer'ra abasiani babwe amakhumi kane nakataru ikulu welichina elala lionyene, abali abasiani ba Gideoni. Nebutswa Yosamu omusiani wa Gideoni omukhokosi, yali okhwebisa ma siyayirwa tawe.

⁶Ma abandu ba Shekemu bosi nende Betsimilo bebunjikha halala ma nibatsia khumusaala kwomuruba omutsienukhu okwali Shekemu ma ebwene iyo nibamwemekha Abimeleki okhuba omuruchi.

⁷Olwa Yosamu yahulila yaka, yamala natsia ma nasinjila khubutenje bwesikulu sia Kerisimu ma nabool'la abandu ba Shekemu amang'ana kano, “Mumbulile inywe abandu ba Shekemu, kho Nyasaye abe onyala khumuhulila!

⁸Litukhu lindi emisaala chiebunjikha halala khulwa khwahula omuruchi wachio. Chiamala nichibool'la omuseituni mbu, ‘Ibe obe omuruchi wefwe.’

⁹Omuseituni nikukalusia nikuboola mbu, ‘Nikali ise ndakhamuruka inywe, okhwola ndekhe okhuhaana amafura kanje, akarumikhilwanga okhuhaana oluyali khubanyasaye nende khubandu.’

¹⁰Khe emisaala nichibool'la omukhuyu mbu, ‘Yitsa obe omuruchi wefwe.’

¹¹Nebutswa omukhuyu nikukalusia nikuboola mbu, ‘Nikali ise ndakhaba omuruchi wenywe, okhwola ndekhe okhwama amatunde kanje amelungu.’

¹²Khe emisaala nichibool'la omusaala kwomusabibu mbu, ‘Yitsa obe omuruchi wefwe.’

¹³Nebutswa omusaala yikwo nikuboola mbu, ‘Nikali ise ndakhaba omuruchi wenywe, okhwola ndekhe okhuhaana ewaini echilanga abanyasaye nende abandu nibasangala.’

¹⁴Ma kho emisaala chiosi nichibool'la omutsuru kwamahwa mbu, ‘Yitsa obe omuruchi wefwe.’

¹⁵Omutsuru kwamahwa nikukalusia nikuboola mbu, ‘Tooto nimuba nimwenyanga okhunzahula mbe omuruchi wenywe, mwitse mwikame musiinikha sianje. Nimuba nimurakhola mbwo tawe, omul'lo nakurul'le m'mahwa ketsisaka tsianje ma nakusambe emisiita chia Lebanoni.’ ”

¹⁶Yosamu natsilil'la okhuboola mbu, “Kho luno, mbula mwabeye nende obwatooto nende obusubilwa olwa mwayel'le Abimeleki okhuba omuruchi? Mbula mwabeye okhuhaana oluyali khu kamwitsulilanga khu Gideoni nende okhukhol'la abeinyumba yiye obulahi singa obiebikholwa bibie ebilahi bikhoyele noho?

¹⁷Mwitsul'le mbu papa wanje yali okhumulwan'na lihe. Yabiikha obulamu bubwe mubutinyu khulwo okhumusoola okhurula khu Bamidiani.

¹⁸Nebutswa olwaleelo mwali okhukalukhana abeinyumba ya papa wanje. Mwiriye abasiani baabe amakhumi kane nakataru khwilichina elala sichila omusiani uwe Abimeleki, owayebula m'mukhaana omutiyi, nomwikho wenywe, ma mumwel'le okhuba omuruchi wa Shekemu.

¹⁹Kho luno nikaba akamukhol'le olwaleelo khu Gideoni nende khubeinyumba yiye nakahabwene khandi namalunji, khe musangal'le Abimeleki ne naye amusangal'le inywe.

²⁰Nebutswa nikarali mbwo, lekha olumemo lwomul'lo lurule mu Abimeleki ma lusambe abandu ba Shekemu nende aba Betsimilo. Lekha olumemo lwomul'lo lurule mubandu ba Shekemu nende aba Betsimilo ma lusambe Abimeleki.”

²¹Khe sichila yaria omusiani wabwe Abimeleki, Yosamu yelukha natsia okhumenya Beeri.

²²Abimeleki yaruka Isiraeli khulwemihika chitaru.

²³Ne Nyasaye nakhola Abimeleki nende abandu ba Shekemu okhuba abasuku abene khubene, ma nibakhol'la Abimeleki induli.

²⁴Yaka kali okhwekhola kho Abimeleki nende abandu ba Shekemu, abali okhutsuuba Abimeleki okhwira abasiani ba Gideoni amakhumi kane nakataru banyoole esinyasio khulwo obubi bwabwe.

²⁵Abandu ba Shekemu bara abandu khubutenje bwesikulu okhwekonekha Abimeleki ne nibanuula siomundu wosi owabir'ranga ahabali ebindu.

²⁶Khe Kaali omusiani wa Ebedi niyetsa Shekemu nende abasiani babwe, ma abandu ba Shekemu nibara obusubili bwabwe muye.

²⁷Bosi barula nibatsia mumikunda chiabwe echiemisabibu nibanoka amatunde nibalombakhwo ewaini, ma nibalomba lisabo. Nibatsia muhekalu ya nyasaye wabwe, omwabamala nibalia nende okhunywa khandi nibanyeka Abimeleki.

²⁸Kaali naboola mbu, “Khuli abandu bambila sina mu Shekemu? Busina khuhuchil'langa okhurukwa nende Abimeleki? Kata mbwo, ye niye wina? Omusiani wa Gideoni! Ne Sebuli anyoolanga amalako okhurula khuye, busina khuhuchil'le akhuruke? Mube abasubilwa khukuka wenywe Hamori owachaakia esilibwa sienywe?

²⁹Makano ndaba nindi omwemeli wabandu bano! Ndakhahinisieho Abimeleki! Ndakhamubooleye mbu ‘Tsia omeete abasikari baabo, ma orule otsie okhulwana!’ ”

³⁰Sebuli, omuruchi welitookho yahambwa nelirima olwa yahulila aka Kaali yali nabooye.

³¹Yaruma abarumwa khu Abimeleki ahayali mwitookho lia Aruma okhuboola mbu, “Kaali omusiani wa Ebedi nende abasiani babwe betsele Shekemu, ne batsuubanga abandu mwitookho okhukhusuula.

³²Khe luno ibe nende abandu baabo mukhoya okhurula nobutukhu ma mwekonekhe mubulimo.

³³Namubuukhe mukamba eliuba nilirulanga ma museere litookho bungoyingoyi. Khe olwa Kaali nende abandu baabe betsa okhumulwana, mubasalisie obutinyu.”

³⁴Kho Abimeleki nende abandu baabe bosi balomba oluchendo lwabwe butukhu ma nibebisa ahembi mwitookho lia Shekemu mumikanda chine.

³⁵Olwa Abimeleki nende abandube balola Kaali narula esioba nasinjila hasilibwa sielitookho, babuukha okhurula mubukono bwabebisamwo.

³⁶Kaali yabalola ma nabool'la Sebuli, “Lola! Abandu mbabala bekhanga okhurula khubutenje bwesikulu!” Sebuli nakalusia mbu, “Bala sibali abandu tawe yibio nebiniini butswa ebili khusikulu.”

³⁷Kaali khandi namubool'la mbu, “Lola! Abandu mbabo baselenjeranga okhurula khusikulu ne omukanda mulala kwitsilanga khumuhanda okurulanga khumusaala kwomuruba kwabafumu!”

³⁸Khe Sebuli namureeba mbu, “Obul'lomi bubwo bwokhwelola buli hena luno? Niwe mulala owabooye mbu busina khuhuchil'langa okhurukwa nomundu uyu Abimeleki. Yaba nibo abandu bawanyekelenje. Rula otsie obalwane luno!”

³⁹Kaali yemel'la abandu ba Shekemu okhutsia khulwana Abimeleki.

⁴⁰Kaali yelukha, ma Abimeleki namulondel'la. Abenji basalisibwa, kata nende abali hasilibwa sielitookho.

⁴¹Abimeleki yamenya mwitookho lia Aruma ma Sebuli nakhunga Kaali nende abasiani babwe okhurula mwitookho lia Shekemu kho balekhe okhutsilil'la okhumenyamwo.

⁴²Litukhu elialondakhwo Abimeleki yabool'lwa mbu abandu ba Shekemu baloosianga batsie esioba mumikunda,

⁴³khe yabukula abandu baabe, ma nabakabula mumikanda chitaru, ma niyebisa mubulimo, nalindil'langa. Olwa yalola abandu nibarulanga mwitookho, yarula ahayali niyebisile mbu abeere.

⁴⁴Olwa Abimeleki nende omukandakwe batetekhana okhutsia okhulinda esilibwa, emikanda chichie chibili nichiseera abandu abali nibali mumikunda ma nibabeera bosi.

⁴⁵Obulwani bwatsilil'la litukhu liosi. Abimeleki nafumila litookho, niyeera abandu balio nalisambul'la, ma nasalania echumbi khwiloba.

⁴⁶Olwa bakhongo abali muluhinga lwa Shekemu bahulila okhuyaaka, bakhaaba ahokhwebisa ahombokhwa butinyu muhekalu ya Baali Beritsi.

⁴⁷Abimeleki yabool'lwa mbu bamal'le okhwebunjikha habwene yaho,

⁴⁸kho ye halala nabandube banichila okhutsia Salimoni nende abandube. Yaho yabukula imbatso, naremaka olusaka lwomusaala, ma nalura khwibeka. Nabool'la abandube bakhole akabali nibaalutsi nakholanga yako.

⁴⁹Kho siomundu yaremaka olusaka lwomusaala ma nibalonda Abimeleki ne nibabunjikha tsikhwi habundu hombokhwa obutinyu mu Hekalu. Nibatsihambiamwo omul'lo ne abandu nibali mukari, ma abandu bosi abali habundu hombokhwa butinyu yaho bafwa. Bosi halala bali abandu ahembi elefu ndala abasaatsa nende abakhasi.

⁵⁰Kho Abimeleki yatsia Tsebesi nafumbila litookho yilio, ma nalifumila.

⁵¹Ne kwalimwo omunaara okwombokhwa butinyu, ma siomundu omusaatsa nende omukhasi mwitookho yimwo, halala nabemeli balio belukha okhutsia mumunaara yikwo. Nibeyikal'lamwo ma nibatsia ikulu khusilama siakwo.

⁵²Olwa Abimeleki yeetsa okhuseera omunaara, yatsia khumuliango okhusamba omunaara.

⁵³Omukhasi yafuuba oluchina lwa rekoreko khumurwekwe ma ndwaraka esihanga siomurwe kukwe.

⁵⁴Nonoho nalanga omubuukha owali nachinganga ebilasan'nobie ma namulaka naboola mbu, “Hinia olukangalwo unzire. Sinyenya nakaboolwe mbu omukhasi niye ounzir're tawe.” Kho omubuukha namukhalaka nolukanga ma nafwa.

⁵⁵Olwa Baisiraeli balola mbu Abimeleki ufwiye, bosi bakalukha ingo.

⁵⁶Nyasaye yarunjila Abimeleki munjila iyi khulwe tsimbi etsia yakhol'la papa uwe khulwo okhwira abasiani babwe amakhumi kane nakataru.

⁵⁷Nyasaye khandi yakhola abandu ba Shekemu okhusaalila khulwo obubi bwabwe, singa obwa Yosamu, omusiani wa Gideoni, yaboola bakhasaalile olwa yali okhubalaama.