Read lunyore 2 YOHANA 1 Bible Online

2 YOHANA 1 - lunyore bible

2 YOHANA 1

¹Ise Omukhulundu, mandikanga khumukhaye owelwa nende abaana baabe, abandayanza mukatooto. Ne sindi nise sienyene, habula nende yabo bosi abamanya akatooto;

²sichila akatooto kamenyanga mwifwe ma khandi kalibetsanga mwifwe inziayo.

³Esirenda netsimbabasi, nende emilembe echirulanga khu Nyasaye Papa nende khu Yesu Kristo, Omwana wa Papa Nyasaye, bibe n'nefwe inziayo.

⁴Sangalanga hakali muno sichila nyoolanga mbu abalala khubaana baabo bachendanga mukatooto, singa obwa khwalakwa nende Papa.

⁵Ne luno khuhombelesinjia, ibe omukhaye mbu khuyanzane abene khubene, sikali singa ol'la khuhandichilanga lilako liyia tawe, habula nelilako eliakhwali n'nalio okhurula mukhuchiaka.

⁶Buno nibwo obuyanzi mbu khuchendenje munjila yamalako kaake, nalio lilako ndielino singa obwa mwalihulila okhurula mukhuchiaka: muchende mulio.

⁷Okhuba abakaati abenji basalaan'ne musibala siosi, yabo nabandu abaranyala okhuhuchil'la mbu Yesu Kristo yetsa mubukondo bwomundu. Yabo nibo abafukuli ba Kristo.

⁸Mwelinde bulahi abene, mbu mubule okhukosia esiamwatiyila, habula munyoole omukabwa kwenywe mubwitsulu.

⁹Omundu wosi naramenyele mumebaalo ka Kristo nabiril'la muko, siali nende Nyasaye tawe. Ne uyo omenyanga mumebaalo ali n'nabo bombi Papa nende Omwana.

¹⁰Omundu wosi naba niyakhetsa khwinywe naramuler'ra amebaalo yaka, muramwinjisia munyumba; kata muramusiesia emilembe tawe.

¹¹Okhuba oba nasiesania n'naye emilembe, asanganga n'naye mumilimo chichie emibi.

¹²Ndi namang'ana amenji akokhumuhandichila, sinzenya okhukahandika khumakaratasi nende obwino tawe, habula runanga okhwitsa bwitsa khwinywe khubool'lane n'nenywe moni namoni, kho obusangali bwefwe bwitsule.

¹³Abaana ba mbotso wenywe owelwa, bamusiesisie.