Read lunyore 3 YOHANA 1 Bible Online

3 YOHANA 1 - lunyore bible

3 YOHANA 1

¹Ise Omukhulundu, khuhandichilanga ibe Gayo omuyanzwa wanje, owandayanza mukatooto.

²Omuyanzwa wanje, saayanga mbu obe nomulembe mumang'ana kosi khandi mbu obe omulamu. Manyile oli omulamu mumwoyo.

³Okhuba ndali okhwekhoya hakali muno nyinga abaana befwe Abakristo betsa nibakobokhela akobusubilwa bubwo khukatooto. Nimbwo omenyanga mukatooto khasotso.

⁴Sinyala okhuba nobusangali bundi obukali okhuyomba okhuhul'la mbu abaana banje bamenyanga mukatooto tawe.

⁵Omuyanzwa wanje, obetsanga omusubilwa mukokholanga okhukhonya yabo abali abaana befwe abakristo kata olwa bali abacheni khuibe.

⁶Yabo bamal'le okhukobokhela akobuyanzi bwenywe imbeli welikanisa liosi. Yanza obakhonye okhutsilil'la noluchendo lwabwe munjila yokhuyanzisia Nyasaye.

⁷Okhuba barula nibachiaka oluchendo lwabwe mumulimo kwa Kristo nibarahuchil'la khwo esindu siosi okhurula khu yabo abarasubila.

⁸Khulwe yako kakhuhel'le ifwe okhukhonya abandu singa yaba, ma khube abakholi bemilimo halala nende abasiefwe mukatooto.

⁹Ndali okhuhandika ebarwa ndititi khwikanisa; nebutswa Dioterefe, owayanza okhuba omwemeli wabwe siyahuchil'la akakhwaboolamwo tawe.

¹⁰Kho nimba ninzitsa okhumuchendela nilwo olwa ndiboola khukemilimo echiaye akholanga. Obwa akhuralanga ifwe obubi. Ma akene yako konyene sikamuhelanga tawe. Nebutswa omwene siyenjisinjia abaana befwe Abakristo tawe. Ne yabo ababetsanga nibenya okhubenjisia, ye abakayanga nabakhunga okhurula mwikanisa.

¹¹Owandayanza; oralonda akali amabi tawe; habula olonde akali amalahi. Omundu okholanga amalahi niye owa Nyasaye; ne okholanga amabi siyalola Nyasaye tawe.

¹²Abandu bosi bakobokhelanga Demeterio mbu noweifuma indahi, ne akatooto kene nimbwo kali. Nefwe khandi khukobokhelanga akene yako; nawe wamanya mbu akakhuboolanga nakatooto.

¹³Ndi namang'ana amenji akokhukhubool'la nebutswa sinyenya okhukhola mbwo nende ikalamu nobwino tawe.

¹⁴Nayanga okhulolana n'nawe bwangu, ma khul'lome moni namoni.

¹⁵Emilembe chibe khwiwe. Abalina befwe bakhusiesisie. Osiesie abalina siomundu khuliira lilie.