Read lunyore YUDA 1 Bible Online

YUDA 1 - lunyore bible

YUDA 1

¹Ise Yuda omurumikhi wa Yesu Kristo omwana wanga Yakobo, mandichilanga yabo abalangwa na Nyasaye abamenyanga mubuyanzi bwa Nyasaye Papa nende mubulindi bwa Yesu Kristo:

²Tsimbabasi nemilembe nobuyanzi bimeetekhe khwinywe.

³Abandayanza, ndali nesinani siosi okhumuhandichila amang'ana kokhuhonibwa khwefwe fwesi, olwa ndali nobuha bwokhumuhandichila matetekhana okhumuyunjia okhutsilil'la okhulwana khulwo obusubili obwa Nyasaye yahaana khu bandu baabe.

⁴Baliho abandu abarali abalunji abeyinjisisie masilisi mwinywe. Abandu abakalukhanianga amang'ana akesirenda sia Nyasaye wefwe okhuhana obweyangu khutsinjila tsiabwe etsiesifwabwi. Khandi bambakhananga omukhongo wefwe omutelwa, Omwami Yesu Kristo. Amahandiko kekholel'la okhurooba okhukhalachilwa okhwa bamal'le okhunyoola.

⁵Nyenyanga okhumwitsusia, kata olwa mumanyile amang'ana kosi elala, obwo Mwami yamala okhuhonia abandu ba Isiraeli okhurula musibala sie Misiri, nebutswa olweinyuma yali okhwira yabo abarasubila.

⁶Ne abamalaika abaramenya mubweyangu bwabwe, nebutswa abalekha obumenyo bwabwe, yababikha mububohe musiilima sieinziayo okhwola Khwitukhu likali eliesiina.

⁷Singa obwa Sodoma nende Gomora, nende amataala akalondokhana n'nako aka abandu bamwo bali nende ifwo efwanana nende eya abamalaika yabo bali okhwehana okhukhola nende okhulonda ifwo yesifwabwi eyokhwekomba khwo omubili: basalisibwanga mukhukhalachilwa esiina siomul'lo okurasimanga singa obuchetsiyi khubo.

⁸Khandi abandu yaba munjila indelwa iyo bali namalooro akachilanga nibakhola esifwabwi khumibili chiabwe; nibachaaya obunyali bwa Nyasaye, nibanyeka aboluyali mwikulu.

⁹Nebutswa kata Mikaeli, om'malaika omukali, olwa yahingananga nende Setani khumubili kwa Musa, siyatsalikha nokhumuninil'la Setani namang'ana akesilaamo tawe, nebutswa yaboola, “Omwami akhukondokhele.”

¹⁰Nebutswa abandu yaba banyekanga esindu siosi esia baramanyile; ne yako aka bamanyilisianga ifwo yako, singa tsinyama etsirali nende obuchesi, niko akabononianga abene.

¹¹Balitsiboolelwa abandu yabo! Sichila balondanga liiba lia Kaini. Ne khulwa amapesa bamal'le okhwehaana mubusiamu obwa yali okhwera mwo. Bakholanga esikala marwi singa Kora yakhola ma khulwako bamal'lwe pe mukhutiba.

¹²Abandu yabo bafwana singa tsinyanda tsiokhwesikarisia etsili mumasabo kenywe akobuyanzi nyinga balitsanga nenywe. Nabayi abeyayanga abene. Bali singa amalumbesi akarali akeifula akomuyeka kuhilanga yila nende yila. Abandu yabo bafwana nende emisaala echiramanga ebiamo kata m'matukhu akeifula; echiafwa esiakhabili ma echiehelwa elala.

¹³Bafwana singa ebikubuli bieinyanza ebirasibilwa, ne ebikhole biabwe ebies'simba murwe bilolekhanga singa olufilo. Bali singa etsiyasulwe etsikoranga, aba Nyasaye yabikhila obumwamu bwesiilima emihika nemihika.

¹⁴Khandi Enoka owebulwa owa khane nakhataru inyuma wa Adamu, yarooba yaka khubo naboola, “Lole, Omwami yetsanga halala nende abamalaika baabe abatsienukhu,

¹⁵akhalachile abandu bosi esiina, sibafwile bosi abararia Nyasaye khulwe emilimo chiabwe emibi echia bakholanga, nende amang'ana kosi amalulu aka abakholi betsimbi abararia Nyasaye baboolanga khuye.”

¹⁶Abandu yaba bamumuchil'langa nibatula abandi khasotso; abachendanga mukhwekomba khwabwe okhubi. Ne eminwa chiabwe chiboolanga amang'ana akokhutsalikha nibeboola khubandu mbu babayanze.

¹⁷Nebutswa inywe, abandayanza, mwitsul'le amang'ana kabarumwa bo Mwami wefwe Yesu Kristo bamubool'la khale.

¹⁸Bali okhumubool'la mbu, “Mumatukhu kokhumal'likha bakhabeho abandu beinzekhelesi, abachendanga mukhwekomba khwabwe okhubi.”

¹⁹Abene yabo nibo abandu abakholanga obweyahuli, abandu abemel'lwanga nende okhwekomba khwabwe okhwesinamubili abarali no Mwoyo.

²⁰Nebutswa inywe abandayanza, mumeete okhweyombokha mubusibili bwenywe obuli obutsienukhu, ne nimusaaya mubunyali bwo Mwoyo Omutsienukhu.

²¹Mwelindenje mubuyanzi bwa Nyasaye, nimulindil'la tsimbabasi tsio Mwami wefwe Yesu Kristo okhwola khubulamu oburahwa.

²²Mube nende tsimbabasi khubandu abahayahayianga;

²³ne abandi mubahonie nimubehula mumul'lo; ne abandi mubabeele tsimbabasi nende okhuria, nebutswa nimubihil'lwa tsingubo tsiabwe etsilikhwo ebipala biobwoni.

²⁴Khuye onyala okhumulinda mbu murakwa tawe, nende okhumusinjisia imbeli wobukhongo bubwe nimurali nende imbala mubusangali,

²⁵khuye oli Nyasaye omutelwa Omuhonia wefwe, okhubir'ra mu Yesu Kristo Omwami wefwe, oluyali nobukhongo, nokhwamiha nobunyali bibe khuye okhurulana khale nende luno, neinziayo. Amina.