Read lunyore OKHUBISULA 10 Bible Online

OKHUBISULA 10 - lunyore bible

OKHUBISULA 10

¹Khandi ndalola om'malaika undi omukufu niyekhanga okhurula mwikulu. Yali nafuumilwe mwilumbesi ne esitsahi sie ifula siali khumurwe kukwe. Mumoni mumwe mwali singa eliuba ne ebilenje bibie singa etsisiilo tsiomul'lo.

²Yali nakhatapu akhafumbe nikhafunuywe m'mukhono kukwe. Yara esilenje sisie esisatsa khunyanza ne esikhasi khusibala,

³nalanjisia nomwoyo omukali singa okhuhuuma khwesimba. Olwa yalanjisia, tsikhupa tsine natsitaru tsana nitsikalusia nokhuhuuma.

⁴Olwe tsikhupa tsine natsitaru tsial'loma, ndenya okhuhandika. Nebutswa ndahulila omwoyo ngurula mwikulu nguboola, “Amang'ana ketsikhupa tsine n tsitaru yaka namabiso, orakahandika tawe.”

⁵Om'malaika owa ndalola nasinjiye khunyanza nende khusibala yachingula omukhono kukwe omusaatsa ikulu

⁶niyehwaba muliira lia Nyasaye ohindilanga inziayo, owalomba likulu nesibala, neinyanza nende ebili mwo biosi. Om'malaika naboola, “Nyasaye sialasisil'la okhuhesia lichoomo lilie tawe!

⁷Nebutswa olwa om'malaika wakhane nakhataru alikhupa olwika lulwe, kho Nyasaye yakhahesia lichoomo liamabiso kaake, singa yamanyia abarumikhili baabe abaroobi.”

⁸Ma omwoyo okwandahulila okhurula mwikulu nikul'loma n'nase khandi nikuboola, “Tsia obukule akhatapu akhafumba ma akhafunule akhali mumukhono kwom'malaika osinjiye khunyanza nende khusibala.”

⁹Kho ndatsia khumalaika nimusaba mbu yambe akhatapu tsana. Naye niyambool'la, “Bukula okhalie; khalaba akhalulu munda mumwo, nebutswa khalaba akhabuulu singa obuukhi mumunwa kukwo.”

¹⁰Nase ndabukula akhatapu tsana okhurula mumukhono kwom'malaika, nindia, ne khali akhabuulu singa obuukhi mumunwa kwanje. Nebutswa olwa ndali nikhamil'le, inda yanje yalula p'pa.

¹¹Ma nimbool'lwa, “Khatimba alandie amang'ana ka Nyasaye khu aka abandu abenji, tsimbia, abandu betsinonomo tsinyinji nende khu aka abaami.”