Read lunyore OKHUBISULA 11 Bible Online

OKHUBISULA 11 - lunyore bible

OKHUBISULA 11

¹Ndahebwa olusaala olufwana singa oluchelo ma nimbool'lwa, “Tsia ochele Ehekalu ya Nyasaye nende olusambwa, ma obale abandu abekayakayilanga mu Hekalu.

²Nebutswa orachela omukitsi okuli esioba we Hekalu tawe, sichila kuhan'nwe khubetsimbia, nabo balasena Litookho Litsienukhu emiesi amakhumi kane na chibili.

³Ndibaha abakobokheli banje babili abebikhile tsingubo tsiamakunia okhukamba amang'ana ka Nyasaye amatukhu elefu ndala tsimia tsibili namakhumi kasasaba.”

⁴Abakobokheli babili tsana nibo emizeituni chibili khandi ebihani bietsitaya bibili ebisinjilanga imbeli wo Mwami wesibala.

⁵Omundu wosi naba natema okhubasalisia, omul'lo kurulanga muminwa chiabwe nikumulula abasuku babwe; ne omundu wosi owakhateema okhubasalisia alerwa.

⁶Bali nobunyali okhwikala likulu mbu ifula erakwa mumatukhu akabakamba amang'ana ka Nyasaye. Khandi bali nobunyali khubitaho biamaatsi, okhukakalukhania okhukwa amatsahi; khandi bali nobunyali okhuleera khusibala likhupako elie imbila yosi buli lwosi olwa benya.

⁷Ne olwa bakhaba nibamal'le okhukamba ling'ana lia Nyasaye esolo erulanga mukehena elabalwana. Elabaleka nokhubeera.

⁸Emibili chiabwe emifu chilasikala khumuhanda kwelitookho likhongo aha Omwami wabwe yabambilwa. Litookho tsana liali neliira lipakwa mbu Sodoma nohomba Emisiri.

⁹Abandu okhurula mutsimbia tsiosi, nemumahanga kosi, nomutsinzibulo tsiosi nende mutsinonomo balihenga khumibili chiabwe amatukhu kataru nende enusu ne sibakhahuchil'le emibili chiabwe okhuyabilwa tawe.

¹⁰Abandu bokhusibala balasangala khulwo okhufwa khwabakobokheli babili yaba. Balesiaha nibasilania ebihanwa sichila abaroobi babili yaba bali nibakhondokhondia abandu bokhusibala.

¹¹Nebutswa inyuma wamatukhu kataru nende enusu emiiya chiobulamu okhurula khu Nyasaye chienjila mubo, nabo nibasinjila nebilenje biabwe; ne bosi ababalola bali noburi obukali.

¹²Ma abaroobi babili tsana nibahulila omwoyo omukali nikubabool'la okhurula mwikulu mbu, “Mwanichile hano!” Nibanichila mwikulu mwilumbesi abasuku babwe nibalolanga.

¹³Musaa yene iyo khwaliho nokhutechela okhukali okhwesibala, esitonye esielikhumi esielitookho nisikokwa, ne abandu etsielefu tsine natsitaru niberwa. Abandi bosi baria nibetsoomia obukhongo bwa Nyasaye womwikulu.

¹⁴Esirisio siakhabili sibir're, nebutswa esiakhataru siletsa bwangu.

¹⁵Om'malaika wakhane nakhataru yakhupa olwika lulwe, nimbul'la emioyo emikali nichihulilikha okhurula mwikulu nichiboolanga, “Obunyali obwokhwamiha khusibala nobwo Mwami wefwe nende Masihi uwe, naye alamiha inziaiyo.”

¹⁶Ma abakhulundu amakhumi kabili nabane abekhaye khutsiruba tsiabwe imbeli wa Nyasaye nibafung'ama ma nibekayakaya Nyasaye

¹⁷nibaboola, “Khuboolanga embwo khuibe Omwami Nyasaye Owokhunyala Biosi, obetsanga ho, khandi owalinjiho, sichila ibe ubukuye obunyali bubwo obukali, ma uchiachile okhwamiha.

¹⁸Abandu betsimbia tsindi bahambilwe nelirima sichila esaa yoburima bubwo yol'le, esaa yokhukhalachila abafwa. Esaa yol'le yokhuhaana amatani khubarumikhili baabo abaroobi, nende abandu bosi abakali nabati bosi, abafumianga eliiralio. Esaa yol'le eyokhumulula yabo abeeranga nibakhupia abandu esibi!”

¹⁹Nilwo olwe Ehekalu ya Nyasaye mwikulu yekulwa, ne Lisanduku lie Indakano lialolekhamwo. Ma tsimbeni, nende okhuhukuma, netsikhupa, nokhutechela khwesibala nende ifula yamachina amakali nibilolekhaho.