Read lunyore OKHUBISULA 15 Bible Online

OKHUBISULA 15 - lunyore bible

OKHUBISULA 15

¹Khandi ndalola mwikulu esilolelo sindi esiokhuhuka, esikhongo khandi esiokhuchenyia. Baliho abamalaika bane nabataru abali namakhupako kane nakataru, akali akesihesi, sichila niko lirima lia Nyasaye elihesikhile.

²Ma nindola esialolekha singa inyanza inang'i netsokan'ne nende omul'lo. Ne yabo abali nibalekele esolo nesiniini siayo nende okhuleka amabalo keliira liayo, bali nibasinjiye khunyanza inang'i, mbali netsinongoli etsia Nyasaye yali nabahelesisie

³nibemba olwembo olwa Musa, omurumikhili wa Nyasaye, nende olwembo olwe Simeme Sielikondi: “Omwami Nyasaye Owokhunyala Biosi, emilimo chichio nemikali khandi nechiokhuchenya! Omuruchi web'bala, oli omulunji khandi owatooto mutsinjila tsitsio!

⁴Niwina oranyala okhukhuria nokhufumia eliira lilio Omwami? Ibe wenyene oli omutsienukhu. Tsimbia tsiosi tsiakhetse okhukhwekayakaya ibe, sichila ebikhole bibio ebilunji bilolekhanga khubandu bosi.”

⁵Inyuma we yako ndalola Ehekalu eli mwikulu niyikukha, liheema elimanyianga okhubaho khwa Nyasaye nililimwo.

⁶Abamalaika bane nabataru abali namakhupako kane nakataru barula mu Hekalu nibebikhile ekatani isiyikhu elabile tser're, nende tsikhoba tsietsahabu mubilifu biabwe.

⁷Ma silala khubili mwoyo bine nisihelesia abamalaika bane nabataru tsindaabo tsine natsitaru tsietsahabu nitsiitsuye khwo lirima lia Nyasaye obetsanga mwoyo inziayo.

⁸Ne Hekalu yetsula mwo omwosi okwarula khubukhongo nende obunyali bwa Nyasaye, ne siyaliho omundu owanyala okhwinjila mu Hekalu, okhwola amakhupako kane nakataru akalerwa nende abamalaika bane nabataru kali nikahweye.