Read lunyore OKHUBISULA 17 Bible Online

OKHUBISULA 17 - lunyore bible

OKHUBISULA 17

¹Mulala khubamalaika bane nabataru abali netsindaabo tsine natsitaru yetsa khu ise niyambool'la, “Yitsa, nase ndakhumanyia okhukhalachilwa okhwomutamba omukali, ouli litookho likali yilio, eliombokhwa ahembi khumichela eminji.

²Abaruchi besibala bakhola obuheyi n'nalio, ne abandu bomusibala bakholwa khulwa okhunywa amalwa kobusambale bwalio.”

³Omwoyo yambukula, ne om'malaika niyambila musitsiimi. Ebwene iyo ndalola omukhasi niyekhaye khusolo inzakhanyu eyali namera kokhunyeka Nyasaye nikahandichilwe khumubili kwayo kwosi. Esolo tsana yali nemirwe chine nachitaru nende tsinzika likhumi.

⁴Omukhasi yali niyebikhile tsingubo tsisembe khandi tsinzakhanyu kha, niyeng'onihisie netsahabu namachima kobukusi obutinyu netsululu. Yali nesikombe sietsahabu mumukhono kukwe nisitsuuyemwo ebisinyo nende ebifwekhele biobusambale bubwe.

⁵Yali neliira eliahandikwa khubweni bubwe eliali nesifune esiebisu mbu, “Babuloni, Litookho likhongo nyina abasambale bosi nende ebisinyo biosi ebiesibala.”

⁶Nindola omukhasi tsana ukhol'lwe namatsahi kabandu ba Nyasaye nende amatsahi ake yabo aberwa sichila bali abasubilifu khu Yesu. Olwa ndamulola ndachenya okhusila.

⁷Om'malaika niyambool'la, “Ochenyanga busina? Ise ndakhubool'la libiso liomukhasi nende eliesolo emuchingile, esolo eli nemirwe chine nachitaru nende tsinzika likhumi.

⁸Esolo iyo eyoluutsi, yali mwoyo khale nebutswa siesili mwoyo tawe; eli ahembi okhurula mukehena ne elatsia mukhwononibwa. Abandu abamenyanga khusibala aba amera kabwe karahandikwa musitapu siobulamu okhurula esibala nisilombwa, balachenya olwa bahenga khusolo. Yaliho mwoyo; ne siesili mwoyo khandi tawe, nebutswa elalolekha khandi.

⁹“Yaka karunanga amapaalo kobuchesi. Emirwe chine nachitaru nibio ebikulu bine nabitaru, ebiomukhasi yekhalanga khwo. Emirwe yichio khandi nabaruchi bane nabataru,

¹⁰barano khubo bakwiye, mulala yamihanga, ne oundi asili okhubaho; nyinga aliitsa khatimba yamihe hatututu.

¹¹Esolo eyalinji mwoyo nebutswa siesili mwoyo tawe nomuruchi wamunane, naye ni mulala khu bane nabataru yabo ne atsitsanga okhumululwa.

¹²“Tsinzika likhumi etsia walola natsio nabaruchi likhumi abasili okhuchiaka okhwamiha, harali nibo abalahebwa obunyali okhwamiha singa abaruchi halala nende esolo oluhono olwe esaa ndala.

¹³Abaruchi likhumi yaba bali nelichoomo elala, ne bahaananga obunyali bwabwe nende tsingufu tsiabwe khusolo.

¹⁴Abaruchi likhumi nende esolo balalwana Esimeme Sielikondi; nebutswa Esimeme Sielikondi halala nende abalondi basio abasubilwa aba yalanga ma niyela balabaleka. Sichila ye no Mwami wabaami khandi omuruchi wabaruchi.”

¹⁵Khandi om'malaika niyambool'la, “Amaatsi aka walola, akomusambale yekhalangakhwo, kali tsimbia, abandu, emikanda nende tsinonomo.

¹⁶Tsinzika likhumi etsia walola halala nende esolo, balabihil'lwa litamba; balamulekha omutimi khandi esihechenye; balalia inyama yomubili kukwe nibamusamba nomul'lo.

¹⁷Okhuba Nyasaye ubakhol'le okhukhalaka mumioyo chiabe okhukhola aka yenyanga bakhole. Ne kho balahuchilisania halala okhulakhula obunyali bwoburuchi bwabwe khu esolo, okhwola amang'ana kosi aka Nyasaye yachoma kahesikhe.

¹⁸“Omukhasi owoluutsi nelitookho likhongo, eliamihanga khubaruchi besibala.”