Read lunyore OKHUBISULA 18 Bible Online

OKHUBISULA 18 - lunyore bible

OKHUBISULA 18

¹Inyuma we yaka ndalola om'malaika undi niyekhanga okhurula mwikulu. Yali nobunyali obukali, ne obukhongo bubwe bwalabia esibala siosi.

²Yalanjisia nomwoyo omukali naboola “Likwiye! Babuloni likali likwiye! Luno likwiye esimenyo siebisieno nende emioyo chiesifwabwi; tsimbila tsiosi etsia amanyonyi kesifwabi nende akokhusinya kamenyanga mwo.

³Okhuba tsimbia tsiosi tsikwiye khulwa ewaini indulu yobusambale bwalio. Abaruchi besibala bakhola obusambale n'nalio, ne abobukhala besibala bahindihala khulwobunyali bwobwale bwalio oburahwetsanga.”

⁴Ndahulila omwoyo kundi okhurula mwikulu nikuboolanga, “Rule mwo, abandu banje! Rule mwitookho yimwo Murasanga mutsimbi tsialio tawe; murasanga kata khumakhupako kalio tawe!

⁵Okhuba tsimbi tsialio tsikuul'le okhwola mwikulu, ne Nyasaye witsuliye tsinjila tsialio etsiobusiamu.

⁶Mulikhol'le singa obwa liamukhol'la; mulirunge esia khabili okhuyomba emilimo chialo. Mwitsusie esikombe sialio newaini indulu esia khabili okhuyomba ewaini eya liamulombela.

⁷Mulihelesie om'booko nende esibeela esinji, okhuhelana nende ifuma nobwale obwa liehelesia eliene, Sichila liboolanga mumwoyo kwalio: ‘Hano nzikhalanga singa omukhaye omuruchi, sindi omukhutsakhali tawe, sindakhalola esibeela tawe!’

⁸Khusifune yisi lilakhupakwa namakhupako mwitukhu elala obulwaye, esibeela neinzala bilalitsila. Khandi lilasambwa nomulilo, sichila Omwami Nyasaye, olikhalachilanga nowobunyali.”

⁹Abaruchi besibala abaheya nibalia obwale n'nalio balalakaya nibekhula khulwe litookho yilio nyinga balola omwosi okhurula khubuhi bwalio.

¹⁰Balasinjila ehale sichila bali noburi bwokhusanga mubusalili bwalio. Baboola, “Mako obutinyu! Mako esibi! Ibe Babuloni litookho likufu! Khulwe esaa ndala yonyene ukhalachiywe esiina!”

¹¹Abobukhala besibala nabo khandi balalakaya nibekhula, sichila abulaho owokhukula ebindu biabwe khandi tawe;

¹²abulaho okulanga etsahabu, nefetsa, namachina kobukusi obutinyu, netsilulu; nekatani indahi, neingubo isembe ne inzakhanyu, nehalili, nemisaala echirang'ayile nende siesindu esialombwa khumeno keinzofu nende esialombwa khumisaala echiobukusi obutinyu, nende siomukasa, esiesibia, esiamarimari;

¹³nomudalasini, nende ebihunyanga, nende obwali, namafura amabakha, nende emanemane, nende ewaini namafura, nende of'fu obunyukhe neingano, netsing'ombe, namakondi, netsisululu namakaari, nabahambe nende kata obulamu bwabandu.

¹⁴Abobukhala nibalibool'la, “Ebindu ebilahi biosi ebia wekomba okhuba n'nabio bikhurul'le khwo, ne emiandu tsitsio tsiosi halala nobwalebwo, bikhwilukhile, ne siolabinyoola khandi tawe!”

¹⁵Abobukhala, abahindihala khulwa okhukhola obukhala mwitookho yilio balasinjila ehale sichila bali noburi obwokhusanga mukhusalila khwalio. Balalakaya nibekhuula,

¹⁶nibaboola “Mako obutinyu! Mako esibi khwitookho likali! Uyu owaeyabayenje ekatani indahi, isembe neinzakhanyu, niyeng'onihia netsahabu namachina akobukusi obutinyu netsilulu!

¹⁷Ne musaa ndala ukosisie obuyinda tsana!” Abokhuchesia Amaro bosi nende abachingilwe, nabafuki beliaro nende bosi abakholanga emilimochie inyanza, basinjila ehale,

¹⁸nibakhupa etsikhwisi olwa balola omwosi okwobuhi obwalisamba: “Silialikhwoho litaala lindi liosi singa litookho likali yili tawe!”

¹⁹Beyohela olukukhi khumirwe chiabwe, balakaya nibakhupa etsikhwisi nibaboola, “Mako obutinyu! Mako esibeela khwitookho likali! Liali litookho aha bosi abali namaaro kabwe munyanza bahindihala okhurula khubuhinda bwalio. Khulwe esaa ndala yonyene likosisie ebindu biosi!”

²⁰Sangala ibe likulu, khulwa okhumululwa khwalio! Sangale, inywe abandu ba Nyasaye nende abarumwa nabaroobi! Okhuba Nyasaye ukhalachiiye Babuloni esiina khulwe ebikhole bibie khu inywe!

²¹Ma om'malaika omukufu natoola lichina likali singa lierekoreko nalifuba munyanza, naboola, “Nimbwo litookho likali lia Babuloni lilakokwa hasi ne siliakhanyolekhe khandi tawe.

²²Amayoosi akabakhupi abetsinongoli nende abalonyi abokhukhupa amalele nende abakhupi bebikhoobe nende abakhupi abetsinzika sikalahul'likha mwibe khandi kata hati! Omukholi wobukhala bwosi bwosi sialanyoolekha mwibe khandi kata hati; ne liyoka lie irekoreko sililihul'likha mwibe khandi kata hati.

²³Obulafu obwe etaya sibulalolekha mwibe khandi kata hati; nomwoyo okwomukhwi nende okwomweha sikulahul'likha mwibe khandi kata hati. Abobukhala baabo balinji abobunyali musibala siosi, ne wakaata abandu bosi abomusibala nobufumu bubwo obwobubehi!”

²⁴Babuloni liasalisibwa sichila amatsahi kabaroobi nende akabandu ba Nyasaye kanyoolekha mwitookho; nende amatsahi aka abandu bosi aberwa khusibala.