Read lunyore OKHUBISULA 19 Bible Online

OKHUBISULA 19 - lunyore bible

OKHUBISULA 19

¹Inyuma we yaka ndahulila esindu singa omwoyo kwomukanda kwabandu mwikulu nikuboolanga, “Omwami yetsoomibwe obuhonia, nobukhongo, nobunyali nebia Nyasaye wefwe!

²Okhukhalaka khukhwe nokhwatooto khandi nokhulunji! Ukhalachiye litamba likhongo, eliali niliononinjia esibala nobusambale bwalio. Nyasaye umal'le okhuliha es'sialia sichila liera abarumikhili baabe.”

³Khandi bahanzuukha nibaboola, “Omwami yetsoomibwe! Omwosi okhurula khubuhi obusambanga litookho likali kutumanga inziaiyo!”

⁴Abakhulundu amakhumi kabili nabane nende ebilimwoyo bine bakwa hasi nibekayakaya Nyasaye, owikhaye khuluruba nibaboola, “Amina, Haleluya!”

⁵Karula khuluruba tsana, amayoosi komwoyo nikaboola, “Mwitsoomie Nyasaye wefwe, abarumikhili baabe bosi nende abandu bosi, abamuritsanga Nyasaye, abati nabakhongo!”

⁶Khandi ndahulila esindu singa amayoosi komwoyo okwomukanda omukali, nende amayoosi kamaatsi amenji nende aketsikhupa tsingali nikaboola, “Omwami yetsoomibwe! Okhuba Omwami Nyasaye wefwe Owokhunyala Biosi yamihanga.

⁷Chende khusangale nikhwesiela; chende khumuhelesie obukhongo! Sichila esaa eye es'selelo sie Simeme Sielikondi yol'le ne omweha uwe usierechekheye.

⁸Omweha tsana uheywe ekatani elabile isiyikhu mbu yebiikhe.” (Ekatani isiyikhu nebikhole ebilahi ebia abandu ba Nyasaye.)

⁹Ma om'malaika niyamboolela, “Handika kano: Nabeikhabi yabo abalangwa mwisabo lies'selelo sie Simeme Sielikondi.” Khandi nameeta okhuboola, “Yaka namang'ana katooto ka Nyasaye.”

¹⁰Ndakwa hasi habilenje bibie mwekayakaye. Nebutswa yamboolela, “Orakholambwo tawe! Ise ndi omurumikhili wasio khandi owabaana benywe, nende yabo bosi abahandanga khubwatooto obwa Yesu yabisula. Wekayakaye Nyasaye!” Okhuba obwatooto obwa Yesu yabisula nibwo obubakhosisianga abaroobi.

¹¹Khandi ndalola likulu ndikukhile, ne esululi indafu yalimwo. Naye owikhayekhwo okhuchihila alangwanga Omusubilwa khandi Owatooto; akhalakanga esiina nalwana amahe mubulunji.

¹²Tsimoni tsitsie tsiali singa tsinzekhele etsiomul'lo, ne yebiikha tsisimbi tsinyinji khumurwe kukwe. Yali neliira ndihandichilwe khuye eliomundu aramanyile narali omwene.

¹³Ingubo eya yebiikha yali niyin'nwe mumatsahi. Eliira lilie lilangwanga “Ling'ana lia Nyasaye.”

¹⁴Abamahe komwikulu bamulonda khutsisululi tsindafu nibebikhile ekatani indafu isiyikhu.

¹⁵Olukanga olwochi ndurula mumunwa kukwe olwa alaleka tsimbia tsiosi n'nalwo. Alamiha khutsimbia tsiosi nelabusi yesibia, khandi alaseena ewaini musinu siayo esielirima likali elia Nyasaye Owokhunyala Biosi.

¹⁶Khungubo yiye nende khwirango lilie ali neliira eliahandikwakhwo mbu, “Omuruchi wabaruchi khandi Omwami wabaami.”

¹⁷Khandi ndalola om'malaika nasinjiye khuliiba. Yalanjisia nomwoyo omukali khumanyonyi kosi akapulukhanga mumiiya hakari: “Mwitse mwebunjelesie halala khwisabo likali elia Nyasaye!

¹⁸Mwitse mulie inyama yemibili chia abaruchi, nende eyetsichekhe nende eyabalwani abakufu, nende eyetsisululi nende eye yabo abekhalanga khutsio, nende eyabandu bosi, ababohe nabalakhule, abati nabakhongo!”

¹⁹Ma ndalola esolo nende abaruchi besibala namahe kabwe bali nibebunjikhile okhulwana owali niyelusianga esululi nende abelihe lilie.

²⁰Esolo yafumilwa halala nomuroobi wobubehi owakhola akamangalimwa mumoni mwe. (Yarumikhila akamangalimwa yako okhukaata abandu abali nolung'oole lwe esolo nende yabo abekayakaya esiniini siesolo.) Esolo tsana halala nende omuroobi wobubehi bombi bafubwa nibali mwoyo munyanza yomul'lo okwatukhanga nobunora.

²¹Abasikari babwe kerwa nolukanga olurulanga mumunwa okwe uyo owikhaye khusululi. Amanyonyi kosi kalia obwa kanyala inyama yemibili chiabwe.