Read lunyore OKHUBISULA 22 Bible Online

OKHUBISULA 22 - lunyore bible

OKHUBISULA 22

¹Khandi Om'malaika yamanyia omuchela okwamaatsi kobulamu, okung'inang'inanga singa esilang'i nikurulanga khuluruba lwa Nyasaye nende olwe Esimeme Sielikondi.

²Omuchela yikwo kwakhalania mwitookho hakari. Elubeka yiyi nende yiyi olwomuchela kwaliho omusaala kwobulamu, okwamanga ebiamo hali likhumi nakhabili khumuhika, hali l'lala khumwesi, ne amasafu kakwo neindesi eyokhuhonia tsimbia.

³Esindu siosi esialaamwa na Nyasaye sisiakhabe mwitookho imwo tawe. Oluruba lwa Nyasaye nende olwe Simeme Sielikondi lwakhabe mwitookho, ne abarumikhili baabe bakhamwekayakaye.

⁴Balalola Nyasaye moni namoni, ne eliira lilie liakhahandikwe khubweni bwabwe.

⁵Obutukhu sibwakhabeho khandi tawe, ne sibakharune okhuba netsitaya nohomba obulafu bweliuba tawe, sichila Omwami Nyasaye alaba obulafu bwabwe, nabo balaruka singa abaruchi inziaiyo.

⁶Ma om'malaika niyambool'la, “Amang'ana yaka nakatooto akokhusubilwa. Ne Omwami Nyasaye ohaananga Omwoyo uwe khubaroobi waruma om'malaika uwe okhumanyia abarumikhi baabe aketsanga okhwekhola bwangu.”

⁷Yesu aboolanga mbu, “Lola, nzitsanga bwangu! Nabeikhabi abafumilanga amang'ana akoburoobi bwesitapu yisi!”

⁸Ise omwene Yohana, ndahulila khandi nindola amang'ana yaka kosi. Ne olwa ndali nimbuliye ma ningaluutsi, ndakwa hasi habilenje biom'malaika owali niyamanyisie amang'ana yaka, ne ndali ahembi okhumwekayakaya.

⁹Nebutswa yambool'la, “Orakholambwo tawe! Ndi omurumikhi wasio halala nabaana benywe abaroobi nende yabo bosi abafumilanga amang'ana komusitapu yisi. Wekayakaye Nyasaye!”

¹⁰Khandi niyambool'la “Orakhola amang'ana koburoobi bwesitapu yisi okhuba amabiso tawe, sichila esaa eli ahembi olwa amang'ana kosi akaboolwa musitapu yisi nakekhole.

¹¹Naye orali omulunji atsilil'le okhukhola akarali amalunji, naye owesifwabwi atsilil'le okhuba owesifwabwi; Omulunji atsilil'le okhukhola obulunji, ne omutsienukhu atsilil'le okhuba omutsienukhu.”

¹²“Lola, nzitsanga bwangu! Ndeeranga emikabwa chianje okhuha siamulala okhulondokhana nemilimo chichie.

¹³Ise ndi Alfa na Omega, owokhuranga khandi owokhumal'likha, obuchiachilo khandi obumalili.”

¹⁴Nabeikhabi abosianga tsingubo tsiabwe tsirambi. Bali nobunyali okhulia ebiamo okhurula khumusaala okwobulamu nokhwinjila mwitookho okhubir'ra mubilibwa.

¹⁵Nebutswa esioba welitookho netsimbwa, nabafumu, nabasambale, nabeeri babandu, nabekayakayi bemisambwa, nende siomundu oyanzanga obubehi nabukhola.

¹⁶“Ise Yesu mal'le okhuruma om'malaika wanje okhuboola amang'ana yaka khumakanisa. Ndi es'soni okhurula mulwibulo lwa Daudi, nise eyasulwe eyakhanga eyamuyakasio.”

¹⁷Omwoyo nende Omweha baboolanga, “Yitsa!” Omundu wosi ohulilanga yaka naye aboole, “Yitsa!” Omundu wosi oli nobuluho yetse; ahuchil'le amaatsi kobulamu singa esihanwa, wosi oukenyanga.

¹⁸Ise Yohana nzechiyianga omundu wosi oba nahulilanga amang'ana koburoobi bwesitapu yisi; omundu wosi naba nameeta esindu siosi khuko, Nyasaye alameeta khuye amakhupako akahandikwa musitapu yisi.

¹⁹Ne omundu naba nahiniakhwo esindu khumang'ana koburoobi bwesitapu yisi, Nyasaye alahinia khuye omukabwa kwebiamo biomusaala kwobulamu nende okwe Litookho Litsienukhu khukahandikwa musitapu yisi.

²⁰Uyo okobokhelanga khumang'ana yaka aboolanga, “Siahene, nzitsanga bwangu!” Amina. Yitsa, Omwami Yesu!

²¹Esirenda sio Mwami Yesu sibe nabandu ba Nyasaye bosi. Amina.