Read lunyore OKHUBISULA 4 Bible Online

OKHUBISULA 4 - lunyore bible

OKHUBISULA 4

¹Inyuma we yaka ndahenga nindola omuliango nikwikukhile mwikulu. Omwoyo kwokhuranga okwa ndali nimbuliye okwali singa olwika nikul'lomanga n'nase kwali okhumbool'la, “Yitsa ikulu yino nase ndakhumanyia amang'ana aka nakekhole olunyuma we yaka.”

²Nonoho ninzitsula mu Mwoyo. Yaho mwikulu lwaliho oluruba ne omundu nalebe niyekhayekhwo.

³Obwenibwe bwang'inang'ina singa oruchina rwobukusi singa jasipi nende lichina eliakhanyil'lu, ne esitsahi sieifula siafumbila oluruba tsana esifwana emikoche.

⁴Tsiruba amakhumi kabili natsine tsiafumbila oluruba tsana, ne khutsiruba tsana ndalola abakhulundu amakhumi kabili nabane nibekhaye khwo, mbebikhile tsingubo tsindafu, ne tsisimbi tsietsahabu tsiali khumirwe chiabwe.

⁵Okhwakha khwetsimbeni, nende emioyo nende tsikhupa biarula khuluruba tsana. Netsitaya tsine natsitaru tsiomul'lo tsiali nitsiatukhanga imbeli woluruba tsana etsiali emioyo chine nachitaru echia Nyasaye.

⁶Khandi imbeli woluruba tsana hali singa inyanza inang'i, eyafwana singa esilang'i. Khutsimbeka tsiosi tsioluruba bialiho ebili mwoyo bine ebietsula khwo netsimoni imbeli neinyuma.

⁷Esili mwoyo siokhuranga siafwana singa esimba; esiakhabili sifwana singa echulukhi; esiakhataru siali nende obweni obufwana singa obwo omundu; ne esiakhane siafwana singa inditsu epulukhanga.

⁸Buli silala khu ebili mwoyo tsana siali netsimbaha tsisasaba; ne biali nibietsulakhwo tsimoni, mukari nesioba. Nabio biembanga obutukhu nom'basu sila okhuhuluukha mbiboola: “Omutsienukhu, Omutsienukhu, Omutsienukhu, ni Omwami Nyasaye Owokhunyala Biosi, Owalinji ho, oliho, khandi owitsanga.”

⁹Ebili mwoyo bine yibio biembanga tsinyembo tsiobukhongo, noluyali nende etsiokhwitsoomia khu uyo owikhalanga khuluruba, omenyanga inziayo. Olwa bikholanga mbwo,

¹⁰abakhulundu amakhumi kabili nabane bakwitsanga mumakulu ake uyo owikhalanga khuluruba, nibamwitsoomia uyo omenyanga inziayo. Bahinianga tsisimbi tsiabwe nibara imbeli woluruba nibaboola,

¹¹“Omwami khandi Nyasaye wefwe! Okwan'ne okhunyoola obukhongo, noluyali nende obunyali. Okhuba ibe walomba ebindu biosi, ne khulwa obulalilobwo biahebwa obumenyo nende obulamu.”