Read lunyore OKHUBISULA 6 Bible Online

OKHUBISULA 6 - lunyore bible

OKHUBISULA 6

¹Nindola Esimeme Sielikondi nisiboholola esimanyilo siokhuranga khubimanyilo bine nabitaru. Ma nimbulila silala khubili mwoyo bine nisiboola nomwoyo singa okwe ikhupa, “Yitsa!”

²Ndahenga nindola esululi indafu ndala. Owali niyekhaye khusululi tsana yali nobuyingo, nahebwa olusimbi. Ma narula khusululi singa omulechi otsilil'langa okhuleka.

³Esimeme Sielikondi nisiboholola esimanyilo esiakhabili. Nimbulila esili mwoyo esiakhabili nisiboola, “Yitsa!”

⁴Esululi yindi inzakhanyu niyitsaho. Owali niyekhaye khusululi tsana yahebwa obunyali okhuhinia emilembe musibala, kho abandu beerane; nahebwa olukanga olukali.

⁵Esimeme Sielikondi nisiboholola esimanyilo esiakhataru. Nimbulila esili mwoyo siakhataru nisiboola, “Yitsa!” Nimenga nindola esululi imwamu ndala. Owali niyekhaye khusululi tsana yali nebichelo b'bili ebiokhuchela obusiro m'mukhono kukwe.

⁶Nimbulila okwafwana singa omwoyo okhurula khubili mwoyo bine. Nakwo nikuboola, “Ekilo ndala eyobusie bwobulo khulwa edinari[1] ndala, ne etsikilo tsitaru etsiobuswache khulwa edinari ndala. Nebutswa orononia amafura kata ewaini tawe!”

⁷Esimeme Sielikondi nisiboholola esimanyilo siakhane. Nimbulila esili mwoyo siakhane nisiboola, “Yitsa!”

⁸Nase nimenga nindola esululi indabil'lu nesinjiyeho. Owali niyekhaye khusululi tsana, eliira lilie liali Olufu, ne Emakombe yamulonda inyuma. Yabo babili bahebwa obunyali khusitonye esinabine siesibala, okhwira abandu nolukanga, neinzala nolufu, nende etsisolo tsimbalaba tsiesibala.

⁹Esimeme Sielikondi nisiboholola esimanyilo siakharano. Nindola hasi wolusambwa emioyo echie yabo abali okhwirwa khulwa okhukamba Amang'ana ka Nyasaye, khandi bali abasubilwa mubukobokheli bwabwe.

¹⁰Kho, balakaya nomwoyo omukali, “E Omwami, ouli omutsienukhu khandi omusubilwa, nosisil'le okhwola lina okhurunjia es'sialia khubo abamenyele musibala khulwa okhwirwa khwefwe?”

¹¹Nibahebwa simulala ingubo irambi indafu, nibabool'lwa besimilisie hatu, okhwola olwa abarumikhi basiabwe nende abaana babwe, abakherwe singa bo bakhabe nibahesikhile.

¹²Ndahenga olwe Simeme Sielikondi siali nisibohololanga esimanyilo esiakhasasaba. Okhutechela khwesibala okhukali khwali ho. Eliuba ndimwama t'ti, omwesi nakwo nikwakhanya khayi singa amatsahi.

¹³Tsinyininyini tsiahangulukha hasi khusibala, singa omukhuyu kwamulukhanga amakhuyu kakwo amabisi nyinga omuyeka omukali kukutechesinjia.

¹⁴Likulu liakhamulukha singa olubala olufumbilwe; ne esiesikulu nende esikhala chinga biasimulwa mubukono bwabio.

¹⁵Ma abaami besibala, nende abakhongo nende etsijekhe, nende abahinda, nende abakufu, nende abandi bosi siomuhambe nende siomulakhule, bebisa mumangaywa nende mumachina akomubikulu.

¹⁶Ma nibabool'la ebikulu nende tsinyanda, “Mukhukwile mukhubise okhurula khu Uyo owikhaye khuluruba khandi okhurula khwirima elie Esimeme Sielikondi!

¹⁷Litukhu lichoomekhe elielirima liabwe liol'le, ne niwina onyala okhulikal'la?”