Read lunyore OKHUBISULA 7 Bible Online

OKHUBISULA 7 - lunyore bible

OKHUBISULA 7

¹Inyuma we yako ndalola abamalaika bane nibasinjiye khutsimbeka tsine etsiesibala nibekal'la emiyeka chine chiesibala mbu omuyeka kurahungutsa khusibala nohomba khu Nyanza nohomba khumusala.

²Ma nindola om'malaika oundi niyanichilanga okhurula ebukwe, nali nende esimanyilo sia Nyasaye oli mwoyo. Nalanjisia nomwoyo omukali nabool'la abamalaika bane aba Nyasaye yali naheeye obunyali okhwononia esibala nende inyanza:

³Om'malaika naboola, “Murononia esibala kata inyanza, nohomba emisala tawe okhwola olwa khubikha esimanyilo khubweni bwa abarumikhili ba Nyasaye wefwe.”

⁴Ma nimbul'la amabalo ake yabo abali okhurebwakhwo esimanyilo sia Nyasaye khubweni bwabwe. Bosi halala bali etsielefu emia ndala, namakhumi kane natsine. Barula mutsinzibulo likhumi natsibili tsia Baisiraeli.

⁵Olwibulo lwa Yuda bali abandu etsielefu likhumi natsibili Olwibulo lwa Rubeni, etsielefu likhumi natsibili, Olwibulo lwa Gadi etsielefu likhumi natsibili,

⁶Olwibulo lwa Asheri etsielefu likhumi natsibili, Olwibulo lwa Nafutali etsielefu likhumi natsibili, Olwibulo lwa Manase etsielefu likhumi natsibili,

⁷Olwibulo lwa Simioni etsielefu likhumi natsibili, Olwibulo lwa Lawi etsielefu likhumi natsibili Olwibulo lwa Isakari etsielefu likhumi natsibili

⁸Olwibulo lwa Sabuloni etsielefu likhumi natsibili Olwibulo lwa Yosefu etsielefu likhumi natsibili Olwibulo lwa Benjameni etsielefu likhumi natsibili.

⁹Inyuma we yako ndahenga nindola omukanda omukali kwabandu okwomundu aranyala okhubala, okhurula mu sioluyia nende mutsinzibulo nende mubandu bosi nende mutsinonomo tsiosi. Ne bali nibasinjiye imbeli woluruba nende imbeli we Simeme Sielikondi, nibebikhile tsingubo tsirambi tsindafu mbali namaru mumakhono kabwe.

¹⁰Ne balanjilisia nomwoyo omukali mbaboola: “Obuhonia burulanga khu Nyasaye wefwe owikhalanga khuluruba, nende khu Esimeme Sielikondi!”

¹¹Abamalaika bosi nibasinjila okhubotokhana oluruba, nende abakhulundu nende ebili mwoyo bine. Nibakwa imbeli woluruba mafung'ama, nibekayakaya Nyasaye,

¹²mbaboola, “Amina! Olukoosi, nobukhongo, nobuchesi, nokhuboola embwo, noluyali, nobunyali nende obukufu bibe khu Nyasaye wefwe inziaiyo. Amina.”

¹³Mulala khubakhulundu niyareeba, “Yaba abebikhile tsingubo tsirambi tsindafu nibena? Ne barul'le hena?”

¹⁴Nase nimukalusia, “Omwami wanje, ise simanyile tawe. Ibe umanyile.” Naye niyambool'la, “Yaba nibo ababira musiloli esikali nomulembe. Abasaaba tsingubo tsiabwe tsirambi mumatsahi ke Esimeme Sielikondi, nitsilaba tser're.

¹⁵Niko akachila nibali imbeli woluruba lwa Nyasaye. Bamurumikhilanga Nyasaye obutukhu nom'basu mu Hekalu yiye. Naye owikhalanga khuluruba alabakala liheema lilie okhubalinda.

¹⁶Inzala sielabaluma khandi tawe, kata obuluho sibulabahamba khandi tawe. Eliuba kata om'basu omululu sibilabasamba tawe;

¹⁷sichila Esimeme Sielikondi Esili hakari woluruba silaba omwayi wabwe, silabemel'la okhwol'la mubitaho biamaatsi kobulamu. Khandi Nyasaye aleya amasika kosi mumoni tsiabwe.”