Read lunyore OKHUBISULA 9 Bible Online

OKHUBISULA 9 - lunyore bible

OKHUBISULA 9

¹Ma om'malaika wakharano nakhupa olwika lulwe. Nase nindola eyasulwe eyali nehangulukhile khusibala okhurula khwikulu. Eyasulwe tsana nehebwa olufungo lwomukehena.

²Kho eyasulwe y'yo yekula obuko obwe ing'ani, ma omwosi nikutuuma mwo, singa omwosi kwes'sambilo esikali. Eliuba nende likulu biamwama khulwomwosi okwe mukehena.

³Tsisiche tsiarula mumwosi tsana nzitsia khusibala ne tsiahebwa obunyali obuhelana nende obwa amakatia.

⁴Nyasaye natsiboolela tsilekhe okhwakasia obunyasi bwesibala, nohomba esindu siosi esibisi kata emisaala tawe; nebutswa tsiakasie abandu abarali nesimanyilo siomuhuri kwa Nyasaye khubwene bwabwe bonyene.

⁵Tsisiche yitsio sitsiahuchil'lwa okhubeera tawe, harali tsiahuchil'lwa okhubakhondokhondia emiesi chirano. Obukubila bwobukhondokhondi bwatsio bwali singa obukubila bwelikatia nyinga lilumachile omundu.

⁶Mumatukhu yako, abandu baliruna olufu, ne sibalilunyoola tawe; baliekomba okhufwa, nebutswa olufu lwakhabelukhe.

⁷Amakondo ketsisiche tsana kafwana netsisululi etsierechekhele okhutsia mwihe. Khumirwe chiatsio chiali nebindu singa tsisimbi tsietsahabu, ne mumoni mwatsio tsiali singa mumoni mwabandu.

⁸Liswi liatsio liali singa liswi liabakhasi, ne ameno katsio kali singa ameno ketsisimba.

⁹Ebilifu biatsio biafuunikhwa nende ebindu singa ebitsengwa biebibia, ne liyoka liamabaha katsio liali singa liyoka liamakaari amenji akelusibwanga nende etsisululu etsilukhanga okhutsia mwihe.

¹⁰Khandi tsiali nemisila etsiemibano singa etsiamakatia, ne obunyali bwokhwakasia abandu khulwe emiesi chirano buli mumisila chiatsio.

¹¹Omwami watsio nom'malaika osinjiliye Ekehena. Eliira lilie mu Luheburania ni Abadoni, ne mu Luyunani alangwanga Apolioni (eliboolanga, “Owokhutibia”).

¹²Esirisio siokhuranga sibir're; bisili ebirisio bibili okhwitsa.

¹³Om'malaika wakhasasaba yakhupa olwika lulwe. Nimbulila omwoyo okhurula mutsinzika tsine etsiolusambwa lwetsahabu oluli imbeli wa Nyasaye.

¹⁴Omwoyo tsana kwaboolela om'malaika wakhasasaba, “Boholola abamalaika bane ababohelwa enamuchela kwa Efurate.”

¹⁵Abamalaika bane yabo babohololwa abali nibarechekhelwe khusaa nende litukhu, nomwesi nende omuhika yikwo mbu beere esitonye esinabitaru siabandu.

¹⁶Ndabool'lwa amabalo akabandu abanin'ne khutsisululi; bali etsimil'lioni tsimia tsibili.

¹⁷Ne mubusukhi bwanje ndalola etsisululi nende abatsihilanga; bali nebitsengwa ebiakhanyu singa omul'lo, nende buluu nende ebiamayayi. Emirwe chietsisululi tsiali singa emirwe tsietsisimba, ne omul'lo, nomwosi nende obunora biarula muminwa chiatsio.

¹⁸Esitonye esinabitaru siabandu sierwa namakhupako yako kataru: Omul'lo, omwosi nende obunora okhurula muminwa chietsisululi.

¹⁹Okhuba obunyali bwetsisululi buli muminwa chiatsio, nende mumisila chiatsio. Emisila chiatsio chifwana tsinzokha etsili nemirwe, ne tsisalisinjia abandu n'natsio.

²⁰Abandu abasikala, bosi abarairwa namakhupako yako, sibalekha emilimo chiabwe echiabakholanga tawe. Sibalekha okhwekayakaya ebisieno tawe nohomba emisambwa chietsahabu nende echiefetsa nende echiamachina, nende echiemisala echiranyala okhulola, nohomba okhuhulila nohomba okhuchenda tawe.

²¹Kata sibalekha obwiri nohomba obufumu, nohomba obusambale kata obwibi bwabwe tawe.