Read lunyore RUTSI 1 Bible Online

RUTSI 1 - lunyore bible

RUTSI 1

¹Khale muno, mumatukhu kabakhalachi barukanga, inzala ingali yali musibala. Kho omundu undi owali niyamenya Betselehemu mu Yuda, yatsia nomukhasiwe nende abaana babwe babili okhumenyakhwo musibala sia Moabu.

²Eliira liomundu uyo liali Elimeleki, neliira liomukhasiwe Naomi. Amera kabaanabe babili kali Mahaloni nende Kilioni.

³Bali abolwibulo lwa Eufurata. Batsia musibala sia Moabu ma nibamenya yo. Nebutswa Elimeleki, omusaatsa wa Naomi nafwa ma Naomi nalekhwa yenyene nende abasianibe babili.

⁴Abasiani yabo bamala nibalera abakhasi khubakhaana ba Moabu. Mulala yalangwanga Oripa ne oundi Rutsi olwa bali nibamenyele yo emihika likhumi,

⁵Mahaloni nende Kilioni nibafwa, ma Naomi nalekhwa yenyene, nabula omusaatsa nende abasiani.

⁶Inyuma woluhono nalebe Naomi yahul'la mbu OMWAMI walaamila abandu babe tsikhabi khulwa okhubahelesia amachese amenji.

⁷Ma narula halala nende abakhasi babasianibe babili yabo, nibachaaka oluchendo lwokhukalukha Yuda.

⁸Nebutswa olwa bali khunjila Naomi yabool'la abakhasi babili babasianibe “Kalukhe owenywe mumenye nende abamama benywe. OMWAMI amukholele obulahi singa inywe mwakhol'la ise nende abafwa obulahi.

⁹OMWAMI amunyal'le okhunyoola abasaatsa mulerwe khandi mube netsinzu tsienywe abene.” Ma Naomi nabatsunzuna khulwokhubasebula. Nebutswa bachiaka okhukhupa etsikhwisi,

¹⁰nibaboola, “Tawe, khukalukha n'nawe khubandu benywe.”

¹¹Nebutswa Naomi yababool'la, “Okhwola mukalukhe owenywe, abakhaana banje. Busina mwenyanga okhutsia n'nase? Mupaalanga nyala okhwibula abasiani bandi abakhamutesia?

¹²Kalukhe ingo wenywe, ise ndakhunguha sindi onyala okhutesibwa khandi tawe. Kata nindakhaba sili nobunaayi ma nimba nende omusaatsa obutukhu bwan'nondi ma nzibule abasiani,

¹³mwakhalinda okhwola Olwa bakhaba nibakhul'le? Ikhabi yanje neimbi okhusila okhuyomba eyenywe, sichila OMWAMI undereye eminyakhano eminji.”

¹⁴Makhandi nibachaaka okhukhupa etsikhwisi, nibalakaya. Ma Oripa natsunzuna nyakhusala nyene ma namusebula nakalukha ingo, nebutswa Rutsi yamuhandakhwo.

¹⁵Naomi namubool'la, “Lola mwalikhwawo ukalukhile owabwe khandi khu nyasayewe. Nawe londa mwalikhwawo.”

¹⁶Nebutswa Rutsi yakalusia, “Orambool'la khurulekhwo tawe, lekha khutsie n'nawe. Hosi ahanotsie nase nanzieho, hosi hanomenye nase namenyeho. Abandubo nababe abandu banje, ne Nyasayewo nabe Nyasaye wanje.

¹⁷Hawakhafwile nase ndakhafwileho ma niho handakhayabilwe. Ndesuhanga khu Nyasaye mulala mbu sibulaho esiakhanzabukhania n'nawe, nikhurali okhufwa.”

¹⁸Olwa Naomi yalola mbu Rutsi ureeyekhwo omwoyo okhutsia n'naye, siyaralakhwo ling'ana lindi tawe.

¹⁹Batsilil'la noluchendo okhwola olwa boola Betselehemu. Olwa boolayo abelitaala bosi bachenya ma abakhasi nibareeba, “Tooto uyu ni Naomi?”

²⁰Naomi nakalusia, “Murananje Naomi[1] tawe. Munanje Mara[2], okhuba Nyasaye Owokhunyala Biosi yakhol'le obulamu bwanje okhuba obululu.

²¹Olwa ndarula hano ndali nindi omwitsulu, nebutswa OMWAMI ungalusisie nimbulakhwo esindu siosi. Munanganga mbwena Naomi olwo MWAMI Owokhunyala Biosi yaifukuye ma niyara khusibi?”

²²Nimbwo Naomi yakalukha okhurula Moabu nali nende Rutsi omukoko Omumoabu owali omukhasi womwanawe. Boola Betselehemu okhuchesa khwobule nikhuchiakanga.