Read lunyore 1 SAMWELI 1 Bible Online

1 SAMWELI 1 - lunyore bible

1 SAMWELI 1

¹Yaliho omundu owalangwanga Elikana owomulwibulo lwa Efuraimu ne yamenyanga mwitaala lia Rama eliali musibala siebikulu esilangwanga Efuraimu. Yali omwana wa Yerohamu omwitsukhulu wa Elihu oweinyumba ya Tohu musilibwa sia Sufu.

²Elikana tsana yali nabakhasi babili, mulala yalangwa Hana ne oundi Penina. Penina yali nabaana nebutswa Hana siyalikhwo no mwana tawe.

³Buli muhika, Elikana yarulanga Rama okhutsia Shilo okhwekayakaya nende okhuhaana omusango khu MWAMI Owokhunyala Biosi. Ebwene iyo, Hofuni nende Fenihasi abasiani ba Eli babili balinji abesaalisi bo MWAMI.

⁴Buli lwosi olwa Elikana yahaananga omusangokwe, yahaananga esitonye silala esie inyama khu Penina ne esitonye sindi khu siamulala khubaana ba Penina.

⁵Nebutswa khu Hana yamuhelesianga esitonye silala esikali sichila yali niyamuyanza ne OMWAMI yali niyekala inda yiye.

⁶Ne sichila OMWAMI yali niyekala inda yiye, Penina mwalikhwa nyene yamubool'langa amang'ana kokhumubiyia omwoyo nende okhumuchaaya.

⁷Yaka katsilil'la buli muhika. Buli lwosi olwa batsitsanga munyumba yo MWAMI, Penina yachemanga Hana lirima okhusila. Yaka kachilanga Hana alakaya amasika ma asuula okhulia ebiokhulia.

⁸Omusaatsawe Elikana yamureebanga mbu, “Hana, busina olakayanga? Busina oralitsanga? Ne esichilanga nobeelela khasotso nisina? Ise sindi nobukhala khuibe okhuyomba abasiani likhumi?”

⁹Litukhu elala olwa bali nibamal'le okhulia nende okhunywa nibali Shilo, Hana yasinjila. Omwesaalisi Eli yali niyekhaye khundebe yiye hamuliangokwe Hekalu yo MWAMI.

¹⁰Hana yali nesibeela esinji ma nasaaya khu MWAMI ne nalakaya bululu.

¹¹Yehwaba naboola mbu, “OMWAMI Owokhunyala Biosi unzitsul'le ise omurumikhi uwo! Olole omunyakhano kwanje ma unzitsul'le! Oranzibil'la tawe. Niwakhambelesia omwana omusiani, nase ndakhamuhaana khuibe okhukhurumikhila mubulamubwe bwosi, ne liswi lilie siliakhabekwakhwo tawe.”

¹²Hana yatsilil'la okhusaaya khu MWAMI oluhono olurambi ne Eli yahenga omunwakwe.

¹³Yali nasaayanga mumwoyokwe, omunwakwe kwali nikumwendamwendanga nebutswa amayoosi sikahul'likha tawe. Kho Eli yapaala mbu Hana ukhol'lwe namalwa.

¹⁴Kho yamala namubool'la mbu, “Olatsilil'la okhukholwa namalwa khulwa luhono sina? Olekhe obunywi ma obe tsimoni tsindafu.”

¹⁵Hana namukalusia naboola mbu, “Sikhol'lwe namalwa tawe, Omwami. Sinyweyekhwo ewaini tawe! Ndi namanyakhano, ne ndakhasaayanga nimbiikha amanyakhano kanje khu MWAMI.

¹⁶Orapaala mbu ndi omukhasi owesifwabwi tawe. Ndakhasaayanga mbwo khulwe esibeela esikali esiandi n'nasio.”

¹⁷Eli naboola, “Otsie nomulembe, ne Nyasaye wa Isiraeli akhuhe esiomusabile.”

¹⁸Hana nakalusia naboola mbu, “Niwakhayanza umengengekhwo oluboni khasotso.” Ma natsia nalia esiokhulia ne siyatsilil'la okhuba nesibeela tawe.

¹⁹Omukamba kwalondakhwo Elikana nabeinyumbaye babuukha nikusili khale ne olwa bamala okhwekayakaya OMWAMI, bakalukha Rama ingo wabwe. Elikana yamala nakona nomukhasiwe Hana, ne OMWAMI nakalusia okhusaaya khwa Hana.

²⁰Kho Hana yamala nabelekha ma niyebula omwana omusiani. Yamukulikha eliiralie Samweli[1]; naboola mbu, “Ndasaba omwana uyu okhurula khu MWAMI.”

²¹Khandi olwe inyinga yoola, Elikana nabeinyumbaye batsia Shilo okhuhaana omusango kwa buli muhika khu MWAMI nende okhuhesia ebiesuho bibie.

²²Nebutswa olwene yilwo Hana siyatsia n'nabo tawe. Yabool'la omusaatsawe mbu, “Olwomwana nabe nalekhele okhununa, namuhile munyumba yo MWAMI aha namenye obulamubwe bwosi.”

²³Elikana namukalusia naboola mbu, “Okhole kosi akololanga namalahi; omenye hango okhwola olwo omwana alilekha okhununa. Ne OMWAMI akhukhonye okhuhesia lisubisio lilio.” Kho yamenya ingo nanunia omwana okhwola olwa yalekha okhununa.

²⁴Olwomwana yali nalekhele okhununa, Hana yamuhila Shilo munyumba yo MWAMI. Yamuhila halala nende echulukhi yemihika chitaru, etsikilo likhumi chiobusie, nende esimuka esitsuyemwo ewaini.

²⁵Olwa bali nibasinzile echulukhi tsana, bahila omwana khu Eli.

²⁶Ma Hana nabool'la Eli mbu, “Omwami, wakhanzitsul'la? Ise nise omukhasi owawalola nasinjiye hano nasaayanga khu MWAMI.

²⁷Ndamusaba omwana uyu, naye yambelesia esia ndamusaba.

²⁸Kho muhaananga khumulimo kwo MWAMI. Oluhono olwa nabe nasili mwoyo nabe owo MWAMI.” Ma niyekayakayila OMWAMI Shilo.