Read lunyore 1 SAMWELI 10 Bible Online

1 SAMWELI 10 - lunyore bible

1 SAMWELI 10

¹Kho Samweli nabukula akhachupa khamafura ma nakatsukha khumurwe kwa Saulo namutsunzuna ma naboola mbu, “OMWAMI akhutsukhangakhwo amafura okhuba omuruchi wabandube Abaisiraeli. Nawamihe abandu baabe ma nobasinge okhurula khubasuku babwe bosi. Ne yisi nisio esimanyilo khuibe mbu OMWAMI ukhwel'le ibe okhuba omuruchi wabandube.

²Olwa witsa okhwabukhana n'nase litukhu lino, witsa okhwakaana nabandu ahembi nende esilindwa sia Raeli esili Selisa mulusoma lwa Benjameni. Betsa okhukhubool'la mbu etsipunda etsiamukhabilenje tsinyoolekhele kho papawo sasili nesihenda mwoyo khulwatsio tawe, nebutswa esihenda mwoyo sisie sili khulwe ibe, ma atsilil'langa okhureeba mbu, ‘Nakhole mbwena khulwomwana wanje?’

³Olatsilil'la noluchendo okhwola Tabori hamusaala omutsienukhu aha witsa okhubukaana nende abandu bataru nibatsitsanga okhuhaana omusango khu Nyasaye mwitaala lia Betseli. Mulala khubo yetsa okhuba nakhomanga ebimeme bietsimbusi bitaru, ne oundi nachinjile emikaati chitaru; owakhataru naye nachingile esimuka esitsuyemwo ewaini.

⁴Betsa okhukhusiesia ma bakhuhelesie emikaati chiabwe chibili, echio okwana okhubukula.

⁵Ma otsie khusikulu sia Nyasaye mu Gibea ahekambi ya Bafilisiti eli. Mubwinjil'lo bwelitaala mulabukaana nende omukanda kwabaroobi nibarulanga khulusambwa oluli khusikulu nibakhupanga amatungu, ebikuti, amalele nende obukhana. Betsa okhuba nibasinanga ne nibarooba.

⁶Nonoho omwoyo wo MWAMI yetsa okhwinjila mwiwe mutsingufu, nawe witsa okhurooba halala n'nabo ne witsa okhukalukhana okhuba omundu undi.

⁷Olwa amang'ana yaka nakekhole, okhole aka Nyasaye yetsa okhukhwemel'la okhukhola.

⁸Witsa okhuuranjil'la okhutsia Giligali aha nzia okhukhunyoola, nzia okhuhaana emisango chiokhusambwa nende emisango chiobuhambani. Nolinde amatukhu kane nakataru okhwola olwa nanzitse okhukhumanyia esiokhola.”

⁹Olwa Saulo yakhupa Samweli omukongo, Nyasaye yahelesia Saulo liiba lindi. Ne kosi aka Samweli yali namubooleye, kekholekha litukhu yilio.

¹⁰Olwa Saulo nende omurumikhiliwe boola Gibea, omukanda kwabaroobi kwabukaana n'naye, nonoho omwoyo wa Nyasaye niyenjila muye mutsingufu, naye narooba n'nabo.

¹¹Abandu abali nibamumanyakhwo khale, bamulola naroobanga halala nabaroobi bandi, bareebana mbu, “Nisina esikwiliye omusiani wa Kishi uyu? Saulo naye akhali mulala khubaroobi noho?”

¹²Omundu mulala owamenyangaho nareeba mbu, “Abaroobi bandi yaba nabo mupaalanga abasamwana nibena?” Nimbwo okhuboola yikhu khwachiaka mbu, “Saulo naye akhali omuroobi noho?”

¹³Olwa Saulo yali namal'le okhurooba, yatsia khulusambwa oluli khusikuli.

¹⁴Samwana Saulo undi yamulola nali nomurumikhiliwe, ne namureeba, “Orula hena?” Saulo nakalusia mbu, “Rula okhukhaaba etsipunda. Olwakhubul'le okhutsinyoola khutsiye okhulola Samweli.”

¹⁵Samwana Saulo uyo namureeba, “Kho amubooleye sina?”

¹⁶Saulo namukalusia mbu, “Akhubooleye mbu etsipunda tsinyoolekhele.” Nebutswa Saulo siyabool'lakhwo samwana uyo aka Samweli yali namubooleye mbu nabe omuruchi tawe.

¹⁷Samweli yalanga abandu halala okhwebunjikha Misipa,

¹⁸ma nababool'la mbu, “OMWAMI Nyasaye wa Isiraeli aboolanga mbu, ‘Ndamuhinia okhurula Emisiri ma nimusoola okhurula khumukhono kwa Bamisiri nende khubandu bandi bosi abali nibamusandianga.

¹⁹Ise nise Nyasaye omusoolanga okhurula mumanyakhano kenywe kosi khandi nende mubutinyu bwenywe bwosi. Nebutswa olwaleelo mwali okhuusuula ne mureebele mbu muhelesie omuruchi. Yako sikali amabi tawe. Kho mwebunjikhe imbeli wanje mutsinzibulo tsienywe nende mubilibwa bienywe.’ ”

²⁰Ma Samweli nalanga siolwibulo okhwitsa imbeli ne OMWAMI niyela olwibulo lwa Benjameni.

²¹Ma Samweli nalanga ebilibwa biolwibulo lwa Benjameni okhwitsa imbeli ne esilibwa sia Matiri nisielwa okhurula mubo. Ma abasaatsa besilibwa sia Matiri nibetsa imbeli, ne Saulo omusiani wa Kishi niyelwa mubo. Bamuruna ne olwa baramunyoola,

²²bareeba OMWAMI, “Khusilikhwho nomundu undi wosi?” OMWAMI nakalusia mbu, “Saulo ali hala ne webisile mumisiiko.”

²³Kho batsia malibiri nibaleera Saulo khubandu, ne nibalola mbu abandu bosi bamuhel'langa khumabeka sichila yali omurambi.

²⁴Samweli nabool'la abandu mbu, “Uyu niye omundu owo MWAMI yali okhwela! Abulaho omundu wosi mwifwe oli singa ye.” Abandu bosi nibaboola nomwoyo omukali, “Omuruchi ahindile inziayo!”

²⁵Samweli yabool'la abandu obunyali bwomuruchi nende emilimo chichie, ma nakahandika musitapu esiabiikhwa habundu ahatsienukhu. Ma nasebula abandu bosi batsie ingo.

²⁶Saulo naye khandi yatsia ingo wabwe Gibea. Abandu abalala betsingufu aba Nyasaye yali natiil'le khumioyo chiabwe batsia halala n'naye.

²⁷Nebutswa abandu abarali matsami baboola mbu, “Omundu uyu nakhusoole mbwena?” Bachaaya Saulo ne sibamuleer'rakhwo ebihanwa biosi tawe.