Read lunyore 1 SAMWELI 11 Bible Online

1 SAMWELI 11 - lunyore bible

1 SAMWELI 11

¹Omuruchi wa Amoni olangwanga Nahashi yatsia nabasikaribe okhuseera litaala lia Yabeshi elili musibala sia Gileadi ma nibalibotokhana. Abandu ba Yabeshi nibabool'la Nahashi mbu, “Olie n'nefwe emuma nikhuhuchil'langa mbu nokhwamihe.”

²Nahashi nakalusia naboola mbu, “Nandie emuma n'nenywe nimuba nimwakhahuchil'la ling'ana lino: nanjomole imoni yomukhono musaatsa ya bulimundu ma ndere es'simba murwe khu Baisiraeli.”

³Abemeli ba Yabeshi nibamubool'la mbu, “Okhuhe amatukhu kane nakataru mbu khurumilemwo abarume musibala sia Isiraeli siosi. Omundu wosi naba narakhusoola kho nakhuhuchil'le okhwamihe.”

⁴Abarume yabo boola Gibea aha Saulo yamenyanga, ne olwa baribula amang'ana kabwe, abandu bachiaka okhwekhuula.

⁵Saulo yali nachelelanga okhurula mumukunda nende tsing'ombe echilimanga, kho yareeba mbu, “Nisina esibi? Busina abandu bosi balakayanga?” Nibamubool'la akabarume okhurula Yabeshi bali nibabooye.

⁶Olwa Saulo yakahul'la Omwoyo wa Nyasaye yetsa khuye ma naba nelirima likali.

⁷Yabukula tsing'ombe tsiokhulimila tsibili ma natsiremania mubitonye, naruma abarume okhutsia nebitonye yibio musibala sia Isiraeli siosi nende lichetsiyio yili: “Omundu wosi owanobule okhulonda Saulo nende Samweli mwihe, tsing'ombetsie etsiokhulimila tsiakhatonywe mubitonye singa yibi!” Abandu ba Isiraeli baria ako MWAMI yakhabakhol'la, ma bosi bebunjikha halala sila omundu kata mulala okhusikala.

⁸Saulo yababunjikha habundu ahalangwanga Beseki ne; bosi bali halala abandu etsielefu etsimia tsitaru abarula Isiraeli ne etsielefu amakhumi kataru barula Yuda.

⁹Babool'la abarume okhurula Yabeshi mbu, “Mubool'le abandu benywe mbu mukamba etsisaa tsisasaba nitsiroola, nabasoolwe.” Olwa abandu ba Yabeshi bahulila amang'ana yako bali nobusangali obukali,

¹⁰nibabool'la Nahashi mbu, “Mukamba nakhwehaane abene khuibe, nawe onyala okhukhola kosi akawenyele khu ifwe.”

¹¹Mukamba tsuli okwalondakhwo, Saulo yakabula abandube mumikanda chitaru, ne mumabwebwe benjila mukambi yabasuku babwe ma nibaseera Abaamoni. Etsisaa tsisasaba om'basu yikwo bali nibabeer're. Abahonokokha basaalana buli mundu niyelukhanga okhwesoola omwene.

¹²Abandu ba Isiraeli nibabool'la Samweli mbu, “Bali hena abandu ababoola mbu Saulo arabba omuruchi wefwe tawe? Obaleere khu ifwe ne khulabeera!”

¹³Nebutswa Saulo naboola mbu, “Abulaho owitsa okhwirwa olwaleelo, okhuba lino nelitukhu elio MWAMI yali okhusoola Isiraeli.”

¹⁴Ne Samweli naye nababool'la mbu, “Chende khutsie Giligali fwesi ma khwemekhe Saulo khandi singa omuruchi wefwe.”

¹⁵Kho bosi batsia Giligali, habundu hatsienukhu yaho, ma nibemekha Saulo singa omuruchi. Bahaana emisango chiobuhambani ne Saulo halala nabandu ba Isiraeli bosi nibasangal'la omulukha yikwo.