Read lunyore 1 SAMWELI 12 Bible Online

1 SAMWELI 12 - lunyore bible

1 SAMWELI 12

¹Samweli yabool'la abandu ba Isiraeli mbu, “Mal'le ukhukhola kosi aka mwali okhuureeba okhukhola. Muhelesisie omuruchi okhu mwamiha.

²Ne luno muli halala n'naye okhumwemel'la. Ise luno ndi Omusakhulu wetsimbutsi ne abasiani banje bali halala n'nenywe. Ndabeyenje omwemeli wenywe okhurula nindi omubuukha okhwola luno.

³Nise uno. Nimba nindakhola esindu siosi esibi munzaale imbeli wo MWAMI nende imbeli womuruchi owa yali okhwela. Mbula ndabukulakhwo ing'ombe yo mundu wosi? Mbula ndakaatakhwo omundu wosi nohomba kata okhumusandiakhwo? Mbula ndabukulakhwo ebihetso khumundu wosi? Nimba ndakholakhwo elala khumangana yaka narunge esiandakhaba ndabukula.”

⁴Abandu nibakalusia nibaboola mbu, “Tawe osili okhukhukaatakhwo kata okhukhusandiakhwo ifwe; osili khubukulakhwo esindu siosi okhurula khumundu wosi.”

⁵Samweli nakalusia naboola mbu, “OMWAMI halala nomuruchi owayali okhwela omwene nabokobokheli olwaleelo mbu inywe simunyooyekhwo esikha siosi mwise tawe.” Nibakalusia nibaboola mbu, “Yee OMWAMI nomukobokheli wefwe.”

⁶Samweli nameeta khuboola mbu, “OMWAMI niye owahula Musa nende Haruni ma nahinia abakuka benywe okhurula Emisiri.

⁷Luno sinjile hamuli yaho, nase nzia okhumuyaala imbeli wo MWAMI khulwo okhwimwitsusia emilimo chiobunyali echio MWAMI yakhola okhumusoola inywe nende abakuka benywe.

⁸Olwa Yakobo halala nende abeinyumbaye batsia Emisiri ma Abaamisiri nibabasandia, abakuka benywe balakaya khu MWAMI mbu abakhonye, naye yaruma Musa nende Haruni ababahinia Emisiri ma nibachila nibamenya musibala sino.

⁹Nebutswa abandu bebil'la OMWAMI Nyasaye wabwe, khulwako OMWAMI yalekha Abafilisiti nende omuruchi wa Moabu nende Sisera etswoni yabasikari belitookho lia Hasori okhubalwana nende okhubaleka.

¹⁰Ma abandu yabo nibalakaya khu MWAMI mbu abakhonye nibaboola, ‘Kwayona sichila khwakhukhupa omukongo nikhwekayakaya ebifwanani bia Baali nende Asitarete. Okhusoole okhurula khumukhono kwabasuku befwe, nefwe khulakhwekayakaya.’

¹¹Ma OMWAMI naruma Gideoni, nalondakhwo Baraki, nende Yefetsa ma olwokhumalikha niyaruma ise. Siamulala khu ifwe yamuhonia okhurula khubasuku benywe, nenywe mwamenya mumulembe.

¹²Nebutswa olwa mwalola omuruchi Nahashi owesibala sia Amoni nali ahembi okhumuseera mwasuula OMWAMI okhuba singa omuruchi wenywe ma nimumbool'la mbu, ‘Khwenyanga omuruchi wokhukhwamiya.’

¹³“Luno omuruchi wenywe owamwela ali hano, mwali okhumwekomba ne luno OMWAMI umuhelesisie khu inywe.

¹⁴Kosi nakamukaasile nimuba nimuhelesia OMWAMI Nyasaye wenywe oluyali nimumurumikhila nokhumuhulila nende okhulonda amalako kaake ma inywe nende omuruchi wenywe nimuhulila amang'ana kaake.

¹⁵Nebutswa nimuba nimurahulila OMWAMI khandi nimurafumila amalako kaake, yakhamufukule halala nomuruchi wenywe.

¹⁶Kho musinjile hamuli yaho nenywe mulalola ebindu ebikali ebio MWAMI yetsa okhukhola.

¹⁷Kano sikali amatukhu kesimi? Nebutswa nzia okhusaaya ne OMWAMI alaleera okhuhukuma khwelikulu nende ifula. Olwe yaka kekhola ne mwitsa okhumanya mbu mwakhol'la OMWAMI tsimbi tsingali olwa mwamusaba omuruchi.”

¹⁸Kho Samweli yasaaya ne khwitukhu liene yilio OMWAMI yaleera okhuhukuma khwelikulu nende ifula. Ma abandu nibahambwa noburi khu MWAMI nende khu Samweli,

¹⁹nibabol'la Samweli mbu, “Noyanza omwami okhukhusaayila khu MWAMI Nyasayewo mbu khurafwa tawe. Luno khumanyile mbu okhumeeta khutsimbi tsiefwe tsindi, khwayona khulwokhusaba omuruchi.”

²⁰Samweli nakalusia mbu, “Muraria tawe, kata nimuba nimwakhola ling'ana liibi yili, murakhupa OMWAMI omukongo tawe, nebutswa mumurumikhile nomwoyo kwosi.

²¹Muralonda abanyasaye abarali abatooto tawe. Sibali abanyala okhumukhonya nohomba okhumuhonia tawe okhuba sibali abatooto tawe.

²²OMWAMI umal'le okhwesuha ne siyakhamulekhe tawe, okhuba uchoomele okhumwela inywe okhuba abandu baabe.

²³Ne nase khubwanje sikambel'le kata hati okhwonela OMWAMI khulwo okhubula khumusaayila tawe, nebutswa namwibaal'le okhukhola akali amalahi khandi akahabwene.

²⁴Murie OMWAMI ma mumurumikhile mubusubilwa nomwoyo kwosi. Mwitsul'le ebindu ebikhongo ebia yamukhol'la.

²⁵Nebutswa nimutsilil'la okhukhola tsimbi, inywe halala nomuruchi wenywe namumululwe.”