Read lunyore 1 SAMWELI 13 Bible Online

1 SAMWELI 13 - lunyore bible

1 SAMWELI 13

¹Saulo yali nemihika amakhumi kataru olwa yachaaka okhuruka, ne yali niyaruchile Isiraeli khulwemihika chibili.

²Saulo yeela abandu etsielefu tsitaru okhurula mu Baisiraeli. Abandu etsielefu tsibili basikala nende Saulo mu Mikimashi nende musibala siomubikulu bia Betseli, ne abandu elefu ndala nabaruma halala nomusiani uwe Yonatsani okhutsia Gibea musibala siabandu ba Benjameni. Saulo yaseebula abandi bosi okhukalukha ingo wabwe.

³Yonatsani yaleka abasikari abekambi yabwe yali Geba, ma Abafilisiti bosi nibakahulila. Ma Saulo nakhupa olwika okhulanga Abaheburania okhurula musibala siosi okhwitsa mwihe.

⁴Abaisiraeli babool'lwa mbu Saulo yali nalekele abasikari ba Bafilisiti, ma khandi mbu Abafilisiti bali okhubasinyikhila. Kho abandu barula nibatsia okhwebunjikha Giligali aha Saulo yali nali.

⁵Abafilisiti bebunjikha okhuseera Abaisiraeli; bali nende amakaari kamahe etsielefu amakhumi kataru, abalwani bokhutsisululi etsielefu tsisasaba, nende abasikari abenji singa omuyekhe kwokhunyanza. Batsia Mikimashi, ebukwe wa Betsi Aweni ma nibebunjikhaho.

⁶Ma nibaseera obulwani obululu khu Baisiraeli nibabara musibi esikali. Abalala khu Baisiraeli bebisa mutsinyanga nende mumako, nende mubilindwa nende mumayabo nende mumatubango;

⁷abandi bakhalania omuchela kwa Yorodani nibatsia musibala sia Gadi nende Gileadi. Saulo yali nasili Giligali ne abandu abali halala n'nawe batechela khulwoburi.

⁸Yalindil'la Samweli khulwa amatukhu kane nakataru singa obwa Samweli yali namulachile okhulinda, nebutswa Samweli yali nasili okhwola Giligali. Abandu nibachaaka okhwilukha okhurula khu Saulo;

⁹kho nababool'la mbu, “Munder're emisango chiokhusambwa nende emisango chiobuhambani.” Yamala nahaana omusango kwokhusambwa,

¹⁰ne olwa yali namalilanga okhukuhaana, Samweli niyoolaho. Saulo yatsia okhumwakan'na nende okhumwinjisia,

¹¹nebutswa Samweli namureeba, “Nisina esiokhol'le yisi?” Saulo namukalusia mbu, “Abandu bali nibanzilukhanga nawe siwali niwitsile litukhu elia walaka nawitse tawe. Okhumeeta khukene yako, Abafilisiti bebunjikhile ha Mikimashi.

¹²Kho ndali okhupaala mbu, ‘Abafilisiti betsa okhuseer'ra ha Giligali hano, ne sindali nikhol'lekhwo esindu siosi okhuyanzisia OMWAMI tawe.’ Kho ndali okhulola mbu muhaan'ne omusango.”

¹³Samweli namukalusia mbu, “Yilio liali ling'ana liobusilu okhukhola. Solindile lilako elio MWAMI Nyasayewo yakhuhelesia tawe. Olaba nolilindile, khane Nyasaye yakhalekhele ibe nende abolwibulo lulwo okhuruka Abaisiraeli khulwe inziayo.

¹⁴Nebutswa luno oburuchibwosi bulatsil'la tawe. Sichila solindile lilako lilie tawe, OMWAMI alanyoola imbila yomundu owa yenyanga amukhole okhuba omuruchi wabandu baabe.”

¹⁵Samweli narula Giligali ma natsia. Abandu bandi bosi balonda Saulo olwa yatsia khubasikari baabe. Batsia okhurula Giligali ma niboola Gibea musibala sia Benjameni. Saulo yabala abasikari baabe ne bosi halala bali ahembi etsimia tsisasaba.

¹⁶Saulo halala nomusianiwe Yonatsani ma nende abandu abali halala n'nabo bakhupa ekambi yabwe Geba musibala sia Benjameni ne ekambi ya Bafilisiti yali ha Mikimashi.

¹⁷Abasikari ba Bafilisiti barula mumikanda chitaru okhutsia okhuseera Abaisiraeli. Omukanda mulala kwatsia Ofura musibala sia Shuali,

¹⁸omukanda kundi kwatsia Betsi Horoni, ne okundi nikutsia khulwakho oluhenga Mwibanda lia Seboimu nende musitsiimi.

¹⁹Abaruli sibalikhwo mu Isiraeli tawe sichila Abafilisiti bali nibarakhwo omwoyo okhwikal'la Abaheburania okhulomba tsinganga nende amafumo.

²⁰Kahachianga Abaisiraeli okhutsia khu Bafilisiti khulwo okhuyiakala amachoki kokhulimila, amajembe, tsimbatso, nende tsinjeso.

²¹Omurungo kwokhuyiakala tsimbatso nende tsinjeso kwali esilingi ndala ne omurungo kwokhuyiakala amajembe nohomba amachoki kwali etsisilingi tsibili.

²²Kho khwitukhu liokhulwana, abulaho kata mulala khubasikari ba Baisiraeli owali nolukanga kata lifumo narali Saulo nende omusianiwe Yonatsani.

²³Abafilisiti baruma omukanda kwabasikari okhulinda olung'anyi lwokhwinjila Mikimashi.