Read lunyore 1 SAMWELI 14 Bible Online

1 SAMWELI 14 - lunyore bible

1 SAMWELI 14

¹Litukhu elala Yonatsani omusiani wa Saulo yabool'la omusiani owachinganga ebilasan'nwebie mbu, “Chenda khwambukhe khutsie oluchelekha lundi aha Bafilisiti bebunjikhile.” Nebutswa Yonatsani siyabool'lakhwo samwana tawe.

²Saulo yali namenyanga khundulo khwesikulu sia Gibea hamusaala okulangwanga omukomamanga mwitaala lia Mikironi. Yali nende abandu etsimia tsisasaba.

³Mulala khubo yali Ahija owali niyebikhile ingubo yomwesaalisi elangwanga efoti. Yali omusiani wamwabo nyene Ikabodi olangwanga Ahitubu omusiani wa Fenihasi, owali omusiani wa Eli Omwesaalisi wo MWAMI owamenyanga Shilo. Abandu yabo sibaali nibamanyile mbu Yonatsani yali narul'le khubo tawe.

⁴Mulung'anyi lwa Mikimashi olwa Yonatsani yali nabiriyemwo okhutsia khukambi ya Bafilisiti, khwaliho namachina amakali amoki kabili, buli elala khulubeka l'lala lwolung'anyi. Elala lialangwa Bosesi ne elindi Sene.

⁵Elala liali esinyolu wolung'anyi khulubeka lwa Mikimashi nelindi liali enandete khulubeka lwa Geba.

⁶Yonatsani yabool'la omubuukha owachinganga ebilasan'nwe bibie mbu, “Chenda khutsie ahekambi ya Bafilisiti abanasibala eli. Haundi OMWAMI alakhukhonya ne naba nakhukhonya sibulaho esiakhamwikal'la okhukhuhelesia obulechi kata nikhurali abenji.”

⁷Omubuukha uyo yamukalusia namubool'la mbu, “Khola kosi akochoomele okhukhola, ise ndi halala n'nawe.”

⁸Yonatsani naboola mbu, “Nobulahi khwambukhe oluchelekha kho Abafilisiti bakhulole.

⁹Nibaba nibakhubool'la khulinde okhwola olwa betsa khu ifwe, khulabalindaho.

¹⁰Ne nibakhubool'la khutsie ahabali kho khulatsia sichila yisio silaba esimanyilo mbu OMWAMI ukhuheye obulechi khubo.”

¹¹Kho bemanyia khu Bafilisiti ma Abafilisiti nibaboola mbu, “Lole! Abaheburania barulanga mumako kabali nibebisilemwo!”

¹²Kho nibalanga Yonatsani nende omubuukha wachinganga ebilasan'nwebie nibaboola “Yitse ino, khumumanyie, esindu.” Yonatsani nabool'la omubuukha uyo, “Nonda, okhuba OMWAMI uhan'ne obulechi khu Baisiraeli.”

¹³Yonatsani namoola namasikamo nende amakhono okhwanichila ahabali ne omubuukha uyo namulonda. Yonatsani yaseera Abafilisiti ma nabakoka hasi ne omubuukha owachinga ebilasan'nwe uyo nabeera.

¹⁴Mubwiri bwokhuranga Yonatsani nende omubuukha uyo beera abandu abahela amakhumi kabili abali habundu ahahela enusu yeheka ndala.

¹⁵Abasikari bosi bahambwa noburi obukali. Yabo abali nibali mukambi nende musikuuri esioba, nende yabo abali nibalindile eminaara nende abasikari. Ma esibala nisirenga. Yibwo bwali oburi obwa Nyasaye yaruma.

¹⁶Abalindi ba Saulo abali Geba, musibala sia Benjameni balola Abafilisiti nibelukhanga okhutsia yiyi nende yiyi.

¹⁷Kho Saulo nabool'la abandube mbu, “Baale abasikari bosi mulole niwina orali hano n'nefwe.” Babala abandu ne nibanyoola mbu Yonatsani nende omubuukha owamuchingilanga ebilasan'nwe sibaliho tawe.

¹⁸Kho Saulo nabool'la omwesaalisi Ahija mbu, “Leera Lisanduku lie Indakano hano.” Olwene yilwo liali nilili mu Baisiraeli.

¹⁹Olwa Saulo yali nal'lomanga nende Omwesaalisi, omutandano kwameetekha okhuba omukali mukambi ya Abafilisiti. Kho Saulo nabool'la omwesaalisi mbu, “Khubulakhwo inyinga yokhusaaya khu MWAMI.”

²⁰Kho Saulo halala nabandube batsia mwihe okhuseera Abafilisiti abali nibeerananga abene khubene khulwe ingoyani ingali.

²¹Abaheburania abali khulubeka lwa Bafilisiti khandi abali nibatsia n'nabo mukambi yabwe bamala nibabakalukhana ma nibeyonga khu Saulo nende Yonatsani.

²²Abalala abali nibebisile mubikulu bia Efuraimu bahulila mbu Abafilisiti bali nibelukhanga kho beyongamwo nibaseera Abafilisiti,

²³nibalwana okhwola Betsi Aweni. OMWAMI yasoola Isiraeli litukhu yilio.

²⁴Abaisiraeli bali abatofu khulwe inzala sichila Saulo yali niyesuhile ma nalachile mbu, “Esilaamo sibe khumundu wosi owakhaliakhwo esiakhulia siosi olwaleelo nisili okhurunga es'sialia khubasuku banje.” Kho abulaho owaliakhwo esindu siosi litukhu yilio liosi.

²⁵Betsa m'mutsuru ma nibanyoola obuukhi habundu hosi.

²⁶Omutsuru kwali nikulimwo obuukhi obwinji nebutswa abulaho owabuliakhwo, sichila bosi bali nibariye esilaamo sia Saulo.

²⁷Nebutswa Yonatsani siyali nahuliye obwa samwana yali narisisie abandu nesilaamo tawe; kho yasokonda mubuukhi neindabusi eyayali n'nayo ma nalia obuukhi. Nonoho yehul'la bulahi okhusila.

²⁸Nebutswa mulala khubasikari yabo namubool'la mbu, “Fwesi khutofuye khulwe inzala sichila papawo yali okhutechesia nesiesuho naboola mbu, ‘Esilaamo sibe khumundu wosi owakhaliakhwo esiakhulia olwaleelo!’ ”

²⁹Yonatsani nakalusia naboola mbu, “Papa wanje ukholeye abandu obubi okhusila. Lola obwa ndehuliye bulahi olwa ndali okhulia obuukhi.

³⁰Abandu bakhehuliye obulahi okhusila olwaleelo nibakhaliye khubiokhulia ebia baali okhubukula olwa balechele abasuku sichila Abafilisiti siber'rwe abenji olwaleelo tawe.”

³¹Litukhu yilio Abaisiraeli baleka Abafilisiti. Balwana okhurula Mikimashi okhwola Aijaloni. Olwene yilwo Abaisiraeli bali nibatofuye okhusila khulweinzala.

³²Kho belukha nibatsia okhubukula amakondi nende tsing'ombe etsiabali nibanul'le abasuku, ma nibatsiira habwene nahabwene nibatsilia amatsahi nikasili munyama.

³³Saulo yabool'wa mbu, “Lola abandu bonanga khu MWAMI olwa balitsanga inyama nesilimwo namatsahi.” Saulo naboola butinyu mbu, “Inywe muli abasiemani! Kongomie lichina likali litse hano bwangu.”

³⁴Khandi nalaka mbu, “Tsie khubandu bosi ma mubabool'le baleere hano tsing'ombe tsiabwe nende amakondi. Beere ma balile hano; baronela OMWAMI khulwo okhulia inyama nesilimwo amatsahi tawe.” Kho obutukhu yibwo, bosi baleera tsing'ombe tsiabwe ma nibatsiir'raho.

³⁵Saulo niyombokhela OMWAMI olusambwa. Nilwo olwali olusambwa lwokhuranga olwa yali okhwombokha.

³⁶Saulo nabool'la abandube, “Chende khutsie okhuseera Abafilisiti mubutukhu khubayaake okhwola mumabwebwe ma khubeere bosi.” Nabo nibakalusia mbu, “Khola kosi akololanga namalahi.”

³⁷Saulo nareeba OMWAMI Nyasaye mbu, “Mbula nyala okhutsia okhuseera Abafilisiti? Olakhuhelesia obulechi?” Nebutswa Nyasaye siyamukalusia litukhu yilio tawe.

³⁸Kho Saulo nabool'la abemeli babandu mbu, “Mwitse hano khurunilisie tsimbi tsiabandu bakhol'le lunondi.

³⁹Ndesuhanga khu MWAMI oli mwoyo ohaananga obulechi khu Isiraeli mbu omundu wesikha yetsa okhwirwa kata nali omwana wanje Yonatsani.” Nebutswa abulaho owakalusiakhwo esindu.

⁴⁰Ma Saulo nababool'la mbu, “Inywe mwesi musinjile hala ne Yonatsani halala n'nase khulasinjila hano.” Nabo nibakalusia, “Okhole akololanga namalahi.”

⁴¹Saulo yabool'la OMWAMI Nyasaye wa Isiraeli mbu, “OMWAMI, busina orangalusisie olwaleelo? OMWAMI Nyasaye wa Isiraeli ungalusisie mumachina amatsienukhu. Esikha nisiba nisili esia Yonatsani nohomba esianje, ungalusisie mwichina lia Urimu. Ne nisiba nisili esiabandu ba Isiraeli ungalusisie mwichina lia Tsumimu[4]. Likalusio liamanyia mbu Yonatsani nende Saulo nibo abali nesikha.”

⁴²Ma Saulo naboola, khupe imbulu hakari wanje nende omusiani wanje Yonatsani. Ma Yonatsani nanyoolekha nesikha.

⁴³Ma Saulo nareeba Yonatsani mbu, “Nisina esiokhol'le?” Yonatsani nakalusia naboola mbu, “Ndali okhubukula obuukhi buti khulusaala lwanje ma nimbulia. Nise uno ndehaan'ne okhufwa.”

⁴⁴Saulo namubool'la mbu, “OMWAMI yanzire ise, ibe norerwa.”

⁴⁵Nebutswa abandu nibabool'la Saulo mbu, “Yonatsani yakherwa mbwena nali niye Oleereye Isiraeli obulechi? Tawe, khwesuhanga khu Nyasaye oli Mwoyo mbu kata sinakosiekhwo liswi elala khumurwe kukwe tawe. Akakhol'le n'nondi kakhol'lwe khulwo obukhonyi bwa Nyasaye.” Kho abandu bahonia Yonatsani mbu arerwa tawe.

⁴⁶Inyuma we yako Saulo yalekha okhulondel'la Abafilisiti, ma bamala nibakalukha musibala siabwe abene.

⁴⁷Olwa Saulo yali nakhol'lwe omuruchi wa Isiraeli, yaseera abasukube bosi habundu hosi. Yaseera abandu ba Moabu, abandu ba Amoni nende aba Edomu. Khandi yaseera abaruchi ba Soba nende Abafilisiti. Habundu hosi ahayaseeranga yalekanga.

⁴⁸Yalwana nolutswoni ma naleka kata nende abandu ba Amaleki. Yasoola Abaisiraeli okhurula khubasuku babwe.

⁴⁹Abasiani ba Saulo bali Yonatsani, Isiwi, nende Malikishua. Omukhaanawe omukhulundu yalangwa Merabu ne omutu yalangwanga Mikali.

⁵⁰Omukhasi uwe yalangwanga Ahinoamu, omukhaana wa Ahimasi. Omukhongo wabasikaribe yali mufiala nyene owalangwanga Abineri omusiani wa Neri samwana Saulo undi.

⁵¹Samwana Saulo, Kishi nende samwana Abineri, Neri bali abasiani ba Abieli.

⁵²Oluhono lwa Saulo yali nasimenyele yalwana butinyu okhuseera Abafilisiti. Kho lwosi olwa yakaananga nende omusaatsa omukufu nohomba, owolutswoni, yamwinjisianga mubasikaribe.