Read lunyore 1 SAMWELI 15 Bible Online

1 SAMWELI 15 - lunyore bible

1 SAMWELI 15

¹Samweli yabool'la Saulo mbu, “Nise owo MWAMI yali okhuruma okhwitsa okhukhutsukhil'lakhwo amafura okhuba omuruchi wa Isiraeli. Luno hulila ako MWAMI Wokhunyala Biosi aboolanga.

²Yetsa okhuhaana esinyasio khu Abaamaleki sichila abakuka babwe bafukula Abaisiraeli olwa bali nibarulanga Emisiri.

³Luno tsia oseere Abaamaleki ma omulule ebindu biosi ebia bali n'nabio. Oralekhakhwo esindu siosi tawe. Wire abasaatsa, abakhasi, abaana bati nende abatoro bosi; khandi wire tsing'ombe, amakondi, tingamia nende etsipunda.”

⁴Saulo yalanga emikanda chiosi echiabasikaribe ma nababasisia habundu halangwa Telemu. Bosi halala bali abasikari etsielefu tsimia tsibili okhurula mu Isiraeli ne etsielefu likhumi okhurula Yuda.

⁵Nilwo olwa ye halala nabasikaribe batsia mwitookho lia Bamaleki ma nababekonekhela mwibanda.

⁶Ma narumila Abakeni ling'ana okhubachetsiyia, abandu ababakuka babwe bakhol'la Abaisiraeli obulahi olwa barula musibala sie Misiri. Yababool'la mbu, “Rule yaho mutsie ma mulekhe Abamalaki bonyene, khase ndakhamwira halala n'nabo.” Kho Abakeni nibarula mu Bamaleki.

⁷Saulo yaleka Abaamaleki, nabalwana okhurula Hawila okhwola Shuri esili ebukwe we Emisiri.

⁸Yatiila Akaki omuruchi wa Amaleki nali mwoyo ne niyeera abandu bandi bosi.

⁹Nebutswa Saulo nende abasikari baabe sibayira Akaki tawe, kata khandi sibayira amakondi amakhomefu nende tsing'ombe tsikhomefu, nende ebimoosi nende ebimeme nende esindu siosi esiali esilahi tawe. Harali beera ebindu biosi ebiali nibichaayilwe kata ebirali nobukhala.

¹⁰OMWAMI yabool'la Samweli mbu,

¹¹“Mbeeleye sichila ndemekha Saulo okhuba omuruchi. Ukhupile omukongo ma salondele amalako kanje tawe.” Samweli yali nelirima ne obutukhu bwosi yamulakayila OMWAMI.

¹²Mukamba tsuli litukhu elialondakhwo yatsia okhuruna Saulo. Yahul'la mbu Saulo utsiye mwitaala lia Karimeli aha yali okhweyombokhela lichina liesitsusio, ma ubir're okhutsia Giligali.

¹³Samweli yatsia aha Saulo yali. Saulo yamusiesia naboola mbu, “OMWAMI akhulaamile ikhabi ibe Samweli! Khol'le kosi ako MWAMI alachile.”

¹⁴Samweli namureeba mbu, “Ne busina mbul'langa okhwana khwetsing'ombe nende okhwamakondi?”

¹⁵Saulo nakalusia naboola mbu, “Abasikari banje banul'le Abaamaleki. Baali okhubiikha amakondi amakhomefu nende tsing'ombe tsikhomefu okhuhaana omusango khu MWAMI Nyasayewo; ne ebindi biosi khwali okhwira.”

¹⁶Samweli nabool'la Saulo mbu, “Lekha yako, ne nzia okhukhubool'la oko MWAMI yambooleye obutukhu bwolwabeye.” Saulo naboola, “Mbool'la.”

¹⁷Samweli nakalusia naboola mbu, “Kata noba niwelolanga mbu obula obukhala niwe omwemeli wolwibulo lwa Baisiraeli. OMWAMI yakhutsukhakhwo amafura singa omuruchi wa Isiraeli,

¹⁸ma nakhuhelesia lilako okhumulula abandu ba Maleki ababi yabo. Yali okhukhubool'la mbu abaseere okhwola olwoba nobeer're bosi.

¹⁹Kho nisina esichil'le noralonda lilakolie? Busina niwilukhan'na okhuyaaka emiandu chiabwe ma khulwako nokhola akarayanzisianga OMWAMI?”

²⁰Saulo nakalusia naboola mbu, “Ndali okhuhesia Lilako lio MWAMI. Ndali okhutsia singa yali okhuruma, nindeera omuruchi Akaki ma ninzira Abaamaleki bosi.

²¹Nebutswa abasikari banje sibaali okhwira amakondi amakhomefu nende tsing'ombe tsikhomefu etsia bali okhutiila tawe, harali baali okhubileera Giligali hano khulwo khuhaana omusango khu MWAMI Nyasayewo.”

²²Samweli naboola mbu, “Nisina esio MWAMI ayanzanga? Mbula ayanzanga obuhulili nohomba ebihanwa nende emisango? Nobulahi okhusila okhumuhulila okhuyomba okhumuhan'na omusango kwamakondi amakhomefu.

²³Okhukhol'la OMWAMI indiri khuli butswa singa obufumu, ne omwekhonyo nomubi butswa singa tsimbi tsiokhwekayakaya abanyasaye abenji. Ne sichila waali okhufuluka lilako lio MWAMI, ye umal'le okhukhusuula singa omuruchi.”

²⁴Saulo nakalusia naboola mbu, “Yee khol'le tsimbi. Simbesisie lilako lio MWAMI nende amebaalo kaako tawe. Ndaali okhuria abasikari banje ma ndali okhukhola aka baali nibenyele.

²⁵Nebutswa luno khuhombanga, undekhele tsimbi tsianje ma otsie n'nasio Giligali, mbu ndekayakaye OMWAMI.”

²⁶Samweli namukalusia naboola mbu, “Sinyala okhutsia n'nawe tawe, ibe waali okhufukula lilako lio MWAMI, naye umal'le okhukhusuula singa omuruchi wa Isiraeli.”

²⁷Kho Samweli yarula okhutsia nebutswa Saulo yahanda khukanzo yiye ma nerandukha.

²⁸Samweli namubool'la mbu, “OMWAMI uranduye obwami bwa Isiraeli okhurula khuibe olwaleelo, ma ubuhan'ne khumundu undi omulahi okhuyomba ibe.

²⁹Nyasaye wa Isiraeli wobukhongo sabehanga kata okhukalukha inyuma mumakani tawe. Ye sali omundu tawe. Sakalukhanga inyuma tawe.”

³⁰Saulo nakalusia naboola mbu, “Khol'le tsimbi, nebutswa umbekhwo oluyali imbeli wabemeli banje nende imbeli wa Baisiraeli bosi. Okalukhe n'nase Giligali mbu ndekayakaye OMWAMI Nyasayewo.”

³¹Kho Samweli natsia halala nende Saulo Giligali ne Saulo niyekayakaya OMWAMI.

³²Samweli naboola mbu, “Munder're hano omuruchi Akaki.” Akaki niyetsa khuye natechelanga khulwoburi napaalanga mumwoyokwe mbu, “Siahene obululu bwesibi siokhufwa bubir're.”

³³Nebutswa Samweli naboola mbu, “Singa olukanga lulwo lwakhola abakhasi okhuba abakumba, kho luno mamawo alaba omukumba.” Ma nakhalania Akaki mubitonye imbeli wolusambwa oluli Giligali.

³⁴Ma Samweli natsia Rama ne omuruchi natsia ingowe Gibea.

³⁵Oluhono olwa Samweli yatsilil'la okhumenya, siyalolakhwo Saulo khandi tawe; nebutswa yabeelela khulwa ye. OMWAMI yabeelela sichila yali niyamukhola Saulo okhuba omuruchi wa Isiraeli.