Read lunyore 1 SAMWELI 16 Bible Online

1 SAMWELI 16 - lunyore bible

1 SAMWELI 16

¹OMWAMI yabool'la Samweli mbu, “Notsilil'le okhubeelela khulwa Saulo okhwola lina? Mal'le okhumusuula ne salaba omuruchi wa Isiraeli tawe. Nebutswa luno bukula amafura komuseituni ma otsie Betselehemu khumundu olangangwa Yese sichila mal'le okhwela mulala khubasianibe okhuba omuruchi.”

²Samweli nareeba mbu, “Busina khole mbwo? Saulo nakahul'le ma nayanzire.” OMWAMI namukalusia naboola mbu, “Obukule esimoosi otsie n'nasio ma oboole mbu witsileho okhuhaana omusango khu MWAMI.

³Olange Yese yetse khumusango yikwo, nase nzia okhukhubool'la esiokhola. Witsa okhutsukhil'la amafura khumundu wanzia okhukhubool'la.”

⁴Samweli yakhola ako MWAMI yali namubooleye ma natsia Betselehemu. Abemeli belitookho betsa khuye nibatechelanga ma nibamureeba mbu, “Witsanga khukomulembe noho?”

⁵Naye nabakalusia mbu, “Yee nzitsile okhuhaana omusango khu MWAMI. Mwesiiye abene ma munonde.” Khandi yabool'la Yese nende abaana baabe besiiye ma nabalanga okhwitsa khumusango.

⁶Olwa boolaho, Samweli yalola omusiani wa Yese olangwanga Eliabu, ma naboola mumwoyo kukwe mbu, “Omundu osinjiye imbeli wo MWAMI uyu siahene niye owo MWAMI amal'le okhwela.”

⁷Nebutswa OMWAMI namubool'la mbu, “Orahenga khuburambibwe nohomba khubukondo bubwe obulahi tawe. Mal'le okhumusuula sichila simenganga khubindu biomundu ahengangakhwo tawe. Omundu ahenganga khubukondo bwesioba nebutswa ise menganga khumwoyo.”

⁸Ma Yese nalanga omusianiwe olangwanga Abinadabu namuleera khu Samweli. Nebutswa Samweli naboola mbu, “OMWAMI siyel'le kata uyu tawe.”

⁹Ma Yese naleera Shama imbeli wa Samweli. Ma Samweli naboola, “Tawe, OMWAMI siyel'le kata uno tawe.”

¹⁰Munjila yiyi Yese yaleera abasianibe bane nabataru khu Samweli. Ne Samweli namubool'la mbu, “Tawe, OMWAMI siyel'lekhwo kata mulala khu yaba tawe.”

¹¹Ma Samweli nareeba Yese mbu, “Olikhwo nende abasiani bandi?” Yese nakalusia naboola mbu, “Usikaye owokhumalilikha khu bosi nebutswa khayanga amakondi.” Samweli namubool'la mbu, “Mulange yetse hano sichila sikhunyala okhuhaana omusango nasili okhwola tawe.”

¹²Kho Yese narumania mbu alangwe. Yali omusiani omubuukha owelikondo lilahi khandi owomubili omulahi netsimoni tsitsie tsiakhanga. OMWAMI nabool'la Samweli mbu, “Uyu niye owatsana. Sinjila omutsukhil'lekhwo amafura.”

¹³Khe Samweli nabukula amafura ma natsukhil'la khu Daudi imbeli wabasiani babwe. Nonoho omwoyo wo MWAMI niyetsa mu Daudi ma natsilil'la okhuba n'naye okhurula litukhu liene yilio. Ma Samweli nakalukha Rama.

¹⁴Omwoyo wo MWAMI yarula khu Saulo ne omwoyo omubi okwarumwa nende OMWAMI kwamukhondokhondia.

¹⁵Abarumikhili baabe nibamubool'la mbu, “Khumanyile mbu omwoyo omubi okurumilwe nende Nyasaye kukhukhondokhondianga.

¹⁶Kho khulake khukhukhaabile omundu owamanya okhukhupa obukhana. Ma olwo omwoyo omubi kwitsanga khuibe, omundu uyo akhupenje obukhana ma nawe oba bulahi!”

¹⁷Saulo nababool'la mbu, “Rune omundu wamanya okhupa obukhana bulahi ma munder're.”

¹⁸Mulala khubatendi baabe namubool'la mbu, “Yese owomwitaala lia Betselehemu ali nomusiani omwembi omulahi. Nomundu wolutswoni khandi owelikondo lilahi. Nomusikari omululu khandi owamanya okhul'loma, ne OMWAMI ali halala n'naye.”

¹⁹Kho Saulo yaruma abarume khu Yese naboola mbu, “Nder'ra omusiani uwo Daudi owayanga amakondi.”

²⁰Yese naruma Daudi khu Saulo ma namuha esimeme sieimbusi nende epunda echingiile emikaati nende esimuka nisitsuyemwo ewaini mbu ahil'le Saulo.

²¹Daudi yatsia hango ha Saulo ma nachaaka okhumukhol'la emilimo. Saulo yamuyanza okhusila ma namwela okhuchinga ebilasan'nwebie.

²²Kho Saulo naruma abarume khu Yese naboola mbu, “Nyanzile Daudi, olekhe amenye hano niyakhol'langa emilimo.”

²³Okhurula olwene yilwo, olwo omwoyo omubi okurumilwe na Nyasaye kwetsanga khu Saulo, Daudi yabukulanga obukhana bubwe ma abukhupa. Omwoyo omubi kwarulanga mu Saulo ma aba omulamu.