Read lunyore 1 SAMWELI 17 Bible Online

1 SAMWELI 17 - lunyore bible

1 SAMWELI 17

¹Abafilisiti bebunjikha okhulwana lihe habundu halangwanga Soko, litaala elili mu Yuda. Bakhupa ekambi yabwe habundu halangwanga Efesi Damimu; hakari wa Soko nende Aseka.

²Ne Saulo nende Abaisiraeli bebunjikha ma nibakhupa ekambi yabwe mwibanda lia Ela ma niberechekha okhulwana nende Abafilisiti.

³Abafilisiti basinjila khusikulu silala ne Abaisiraeli nabo nibasinjila khusikulu sindi, ne olubanda lwali hakari wabwe.

⁴Omundu olangwanga Goliati okhurula mwitookho lia Gatsi yetsa okhurula mukambi ya Bafilisiti okhulwana Abaisiraeli. Yali noburambi obuhela etsimiita tsitaru,

⁵ne yali niyebikhile esitsengwa siomukasa esiobusiro obuhela etsikilo amakhumi karano natsine natsitaru nende esikutu siomukasa khumurwe kukwe.

⁶Ebilenjebie biali nibifuunikhilwe nende esitsengwa siomukasa, ne yali nelifumo liomukasa khwibekalie.

⁷Olubango lwelifumo lilie lwali olusiro singa omuhini kwelichembe, ne omubano kwelifumo kwali nobusiro obuhela etsikilo tsine natsitaru. Omusikari yachendanga imbeli uwe namuchinjiye esikhumbasie.

⁸Goliati yasinjila nabool'la Abaisiraeli nomwoyo omukali mbu, “Mukholanga sina yaho? Sinjile khulwane. Ise ndi Omufilisiti, nenywe muli abasumba ba Saulo. Mwele omundu mwinywe yetse khulwane.

⁹Naba niyandeka ma yanzire, ifwe nakhube abasumba benywe. Nebutswa ise nimuleka ma mwire, inywe mulaba abasumba befwe.

¹⁰Luno nanganga abasikari ba Isiraeli betse khulwane. Mureebanga mbu mumbelesie omundu yetse khulwane n'naye.”

¹¹Olwa Saulo halala nabasikaribe bahul'la akene yako, bali neindenga ingali.

¹²Daudi yali omusiani wa Yese, owolwibulo lwa Efurate okhurula Betselehemu litaala elili mu Yuda. Yese yali nabasiani munane, ne olwa Saulo yali nali omuruchi, Yese yali omusakhulu okhusila.

¹³Abasianibe abakhulundu bataru bali nibatsiye nende Saulo mwihe. Omukhulundu khubosi yali Eliabu, owalondakhwo yali Abinadabu, ne owakhataru yali Shama.

¹⁴Daudi yali omusiani owokhumal'likha khubosi, ne olwa basiani bakhulundu bataru bali na Saulo,

¹⁵Daudi yabalekhanga ma atsia Betselehemu khase na khase okhwaya amakondi ka samwana.

¹⁶Khulwa amatukhu amakhumi kane, buli mukamba namukolooba, Goliati yabool'langa Abaisiraeli barume omundu okhulwana n'naye.

¹⁷Litukhu elala Yese yabool'la omusianiwe Daudi mbu, “Bukula etsikilo likhumi tsiobuswache obukhalange yibu nende emihayila chiemikaati likhumi yitsi ma ohile bwangu khubasiani benywe abali mukambi.

¹⁸Khandi ohil'le omukhongo wabasikari amabumba kamafura likhumi kano. Ma oreebelesie obwabasiani benywe batsilil'langa, ma oleere esindu siokhumanyia mbu ubaluutsi khandi nabalamu.

¹⁹Omuruchi, nabasiani benywe halala na Baisiraeli bandi bosi bali mwibanda lia Ela ne balwananga Abafilisiti.”

²⁰Litukhu elialondakhwo, Daudi yarula mukamba tsuli, nalekhela omundu undi okhwaya amakondi, nabukula ebiokhulia ma natsia singa Yese yali namubooleye. Yoola mukambi olwa Baisiraeli bali nibatsitsanga habundu hobulwani, nibakhupanga liyoka liobulwani.

²¹Abasikari ba Bafilisiti nende aba Baisiraeli nibenjila mubukono bwokhulwana nibahengananga.

²²Daudi yalekhela omukhongo owalindanga ebindu, ebiokhulia bia yali n'nabio, ma niyelukha okhutsia ahabalwan'nanga. Yatsia khubasiani babwe nabareeba obwa batsilil'langa.

²³Ne olwa yali nasil'loma n'nabo, Goliati yetsa ahembi aha bali, ma nabatechesia singa yali nakhol'le olwokhuranga. Ne Daudi yamuhulila.

²⁴Olwa Abaisiraeli balola Goliati belukha muburi.

²⁵Babool'lana abene khubene mbu, “Muhengakhwo! Hulile amang'ana kaake! Omuruchi Saulo usubisisie mbu yetsa okhuhaana esihanwa esikali khumundu wosi owakhamwira. Omuruchi khandi yetsa okhumuhelesia omukhaanawe amuteesie ne abeinyumba yasamwana sinabarunge obusuru tawe.”

²⁶Daudi nareeba abandu abali nibasinjiye aha yali mbu, “Nisina esiomundu yakhanyoola owakheera Omufilisiti uyu ma ahinie es'simba murwe khu Isiraeli? Kata mbwo Omufilisiti omunasibala uyu niwina owakhachaaya abasikari ba Nyasaye oli mwoyo?”

²⁷Nabo nibamubool'la akakhakhol'lwa omundu owakheera Goliati.

²⁸Eliabu omusiani wanga Daudi omukhulundu yahul'la Daudi nal'lomanga khubandu. Yasinyikhila Daudi ma namubool'la mbu, “Okholanga sina hano? Niwina owayanga amakondi kaako musitsiimi? Ibe omwana wokhwekholokhosia, witsile butswa okhuhenga obwabandu balwananga!”

²⁹Daudi nareeba mbu, “Khe nisina esia khol'le? Sindi onyala okhureebakhwo lireebo liosi tawe?”

³⁰Nasukhana khumundu namureeba lireebo litelwa yilio. Ne lwosi olwa yareebanga, yanyoolanga likalusio litelwa yilio.

³¹Abandu abalala bahulila aka Daudi yali nabooye, ma nibabool'la Saulo ne Saulo namulanga.

³²Daudi nabool'la Saulo, “Omwami omukhongo, omundu wosi arakhabakhwo noburi khu Mufilisiti uyu tawe! Nzia okhulwana n'naye.”

³³Saulo namukalusia naboola, “Tawe, wakhamulwana mbwena? Ibe oli butswa omwana muti, naye abetsanga omusikari amatukhu kosi mubulamu bubwe.”

³⁴Daudi naboola mbu, “Omwami omukhongo, Ise, omurumikhiliwo nzayanga amakondi ka papa wanje. Nyinga esimba nohomba linani libukulanga esimeme sielikondi,

³⁵ndilondel'langa nindikhupa ma mbinia esimeme mumunwa kwalio. Ne olwe simba tsana nohomba linani liirumangakhwo, ndietsumbanga mwikosi mwalio ma ndikhupaka okhwola olwa lifwa.

³⁶Ise ndayira etsisimba nende amanani, ne luno nzia okhukhola mbwo khu Mufilisiti omunasibala uyo, omal'le okhuchaaya abasikari ba Nyasaye oli mwoyo.

³⁷OMWAMI owambonia okhurula khutsisimba nende khumanani yetsa okhumbonia okhurula khu Mufilisiti uyo.” Saulo namubool'la mbu, “Tsia ne OMWAMI abe n'nawe.”

³⁸Ma Saulo nahelesia Daudi ebiesingo biokhulwan'na mbu yebiikha; yamuha esikutu siomukasa esia yamubiikha khumurwe kukwe nende likoti liesibia.

³⁹Daudi yeboha olukanga lwa Saulo khubiesingobie ma nateema okhuchenda n'nabio, nebutswa siyanyala tawe sichila siyali niyanala okhwebikha tawe. Ma Daudi nabool'la Saulo mbu, “Sinyala okhulwana nebindu yibi biosi tawe, sichila sindabinala tawe.” Kho nabinabuula biosi.

⁴⁰Ma nabukula indabusi eyayayilanga amakondi, nende amachina amarelele karano okhurula mumuchela ma nakara mumutata kukwe. Ne olwa yali narechekhele omukoye kukwe kwokhulasa, yesunda ahembi ha Goliati yali nali.

⁴¹Goliati nachaaka okhwesunda aha Daudi yali nali ne owamuchinjilanga esikhumba sisie niyemeye imbeliwe. Goliati yatsilil'la okhwesunda ahembi.

⁴²Ne nyinga yalola Daudi bulahi yamuchaayilisia sichila yali butswa omwana muti owelikondo lilahi.

⁴³Omufilisiti uyo nabool'la Daudi mbu, “Indabusi y'yo ne yasina? Opaalanga ise ndi imbwa?” Ne nalaama Daudi nebilaamo biabanyasaye baabe.

⁴⁴Omufilisiti nabool'la Daudi mbu, “Yitsa hano ne nzia okhuhaana omubili kukwo khumanyonyi kokhwikwikulu nende tsinyama nabulimo tsikulie.”

⁴⁵Daudi namukalusia naboola mbu, “Witsanga okhunwana nochinjile olukanga, lifumo nende olutaakha, nebutswa ise nzitsanga okhukhulwana muliira lio MWAMI Owokhunyala Biosi, Nyasaye wamahe ka Baisiraeli akomal'la okhuchaaya.

⁴⁶Litukhu eliolwaleelo OMWAMI yetsa okhukhura mumukhono kwanje, nzia okhukhwiira ma khalake omurwe kukwo. Khandi nzia okhuhaana emibili chiabasikari ba Bafilisiti khumanyonyi kokhwikulu nende tsinyama nabulimo okhutsilia. Nilwo olwe esibala siosi silamanya mbu aliho Nyasaye mu Isiraeli,

⁴⁷ne abandu bosi abali hano betsa okhulola mbu OMWAMI sarumikhilanga tsinganga nohomba amafumo okhusoola abandu baabe tawe. Ye nomulechi mubulwani naye alahaana inywe mwesi mumukhono kwefwe khandi.”

⁴⁸Goliati nachaaka okhwesunda aha Daudi yali nali, ne Daudi niyelukha bwangu okhutsia aha Bafilisiti bali okhumulwana.

⁴⁹Yatumba omukhono mumutata kukwe ma nahiiniamwo lichina elia yaboyokhania khumukoye ma nalilasa ma nilitiaba Goliati mubweni, niliaraka esihanga siomurwekwe ma Goliati nakwa hasi mafung'ama.

⁵⁰Kho Daudi yaleka Goliati ma namwira narumikhilanga omukoye nende lichina sila olukanga.

⁵¹Yelukha natsia aha yali namusenakhwo, nachomola olukanga lwa Goliati okhurula mulwoola ma nakhalaka omurwe kukwe namwira. Nyinga Abafilisiti balola mbu omulika wabwe ufwiye, belukha.

⁵²Abasikari ba Isiraeli nende Yuda bakhupa liyoka nibabalondel'la. Babalondel'la okhwola Gatsi nende khubilibwa bia Ekironi. Abafilisiti abali nibasaaliye bakwa khunjila eyokhutsia Shaaraimu, kata okhwola Gatsi nende Ekironi.

⁵³Olwa Baisiraeli bakalukha nibarulanga okhulondel'la Abafilisiti bayaaka emiandu echiali mukambi ya Bafilisiti chiosi.

⁵⁴Daudi yabukula omurwe kwa Goliati nakuhila Yerusalemu, nebutswa yabiikha ebilasan'nwe bia Goliati mwiheema lilie.

⁵⁵Olwa Saulo yalola Daudi natsitsanga okhulwana Goliati yareeba Abineri, omukhongo wabasikaribe mbu, “Abineri, uyu nomusiani wawina?” Abineri nakalusia naboola mbu, “Simumanyile tawe omwami.”

⁵⁶Saulo naboola, “Kho tsia omanyilisie.”

⁵⁷Kho olwa Daudi yakalukha mukambi namal'le okhwira Goliati, Abineri yamuhila khu Saulo. Yaho Daudi yali nasili nomurwe kwa Goliati mumukhono kukwe.

⁵⁸Saulo namureeba, “Omubuukha ibe, oli omwana wa wina?” Daudi nakalusia, “Ise ndi omwana womurumikhili uwo Yese okhurula Betselehemu.”